على هامش موسم رمضان والأعمال الفنية الكثيرة المتقدمة فيه، إلا إنه مع الوقت الجمهور يبدأ يتفاعل مع بعض الحالات، أو يبدأ يعمل مقارنات، بالإضافة إلى الهجوم على بعض الأعمال أو الإشادة بالبعض الآخر.
وكمان بيبدأ مناقشة بعض الأفكار اللي بتتقدم في الأعمال دي، ومن بينها مثلا مسألة الجواز، والعلاقة بين الراجل والست في مسلسلات رمضان وتحديدا الضراير.
طبيعي أي عمل فني بيقدم واقع اجتماعي هيكون فيه اتنين متجوزين، وحسب طبيعة العمل بقى بيكون شكل العلاقة، ولكن اخترنا نناقش إزاي دراما رمضان شايفة علاقة الضراير ببعض من خلال عدد من المسلسلات واللي أظهرت الأمور بتتم بشكل غريب وفي بعض الأحيان غير واقعي تماما وأقرب للخيال العلمي.
عندنا عدد من الأعمال قدم موضوع الضرة ده ومنهم مسلسل «علاقة مشروعة» واللي بيلعب بطولته الفنان ياسر جلال، واللي بيدخل في قصة حب وعلاقة ثم جواز من مي عمر اللي بتلعب دور بثينة في المسلسل.
المفروض إن الفنانة داليا مصطفى اللي بتعمل دور عاليا هي الزوجة المعروفة، للفنان ياسر جلال في المسلسل، وهي بتقوم بدور الزوجة الطيبة اللي على نياتها، واللي مريحة جوزها في كل حاجة ومبتدخلش في حياته، ولكن اللي بيحصل إن مي عمر زوجته اللي هي متعرفش عنها حاجة، بتروح بيتها وبتعرف منها تفاصيل عن حياته وبيحب ايه ومبيحبش ايه، عشان تروح تعمل الحاجات اللي تريحة.
شكل العلاقة دي معصب الجمهور، لأنهم بيبقى نفسهم ينطوا من الشاشة يروحوا ينبهوا عاليا بإن جوزها بيخونها مع بثينة، ولكن هي مش واخدة بالها من الإشارات لحد دلوقتي.. ربنا ينور بصيرتها في الحلقات الجاية إن شاء الله.
عندنا كمان حالة فريدة من نوعها بيقدمها محمد رمضان ومحمد سامي في مسلسل «جعفر العمدة» أو مش فريدة يعني ما هي اتعملت قبل كدة في مسلسل «عائلة الحاج متولي»، بس جعفر العمدة مأفورين يعني بالمرة مع سياق الأحداث الأوفر كلها.
الفنان محمد رمضان في المسلسل متجوز أربعة، قبل ما يطلق واحدة منهم ومعيشهم مع بعض في مكان واحد، وبيعاملهم معامة مريبة مش عارفين بتوع حقوق المرأة والفيمنست مش بيتكلموا عليها ليه لحد دلوقتي، الفكرة بقى إن زوجاته في الأوقات اللي مش بيكونوا بيضايقوا بعض فيها، هتلاقيهم متعاطفين مع بعض وبيحبوا بعض وقاعدين يرغوا مع بعض، لدرجة إنه لما طلق واحدة منهم الباقيين زعلوا عليها.
كمان عندنا في مسلسل المداح في علاقة عجيبة بتحصل، مبنشوفهاش على أرض الوقع، ودي لما حسن اللي بيلعب دوره الفنان خالد سرحان، اتجوز أحلام اللي بتجسد شخصيتها رانيا فريد شوقي على زوجته الأولى منال اللي بتقدمها دنيا عبدالعزيز.
الفكرة إنه دخل عليهم البيت وهو مبتسم وبيقولهم دي مراتي، وبعدين بعد كام مشهد فيهم حزن، بقت أحلام ومنال حبايب، وبالعكس ده كمان بقت منال بتخدم أحلام وبتدافع عنها وبتقول للناس دي طيبة لو عرفتوها هتحبوها، في حين إن هي أصلا بتعمل دور شر.
الواضح من العلاقات دي كلها إن الستات الطيبة هي اللي بتتخان وبيتجوز عليها، لأن كل واحدة منهم مخدوعة وبيتضحك عليها بكلمتين، وبتاكل الموضوع وبيعدي.
