أشادت الفنانة بشرى، بدور الفنان في الدولة، والذي ترى أنه لا يقل عن دور الوزارات بل أنه أسرع منه توصيل الكفاءة.
وقالت بشرى، في تصريحات صحفية: “شايفة إن الفنان جزء لا يتجزأ من المجتمع، ويقع عليه فعل الفاعل وكل الظروف العالمية اللي بتحصل في أي مجتمع وسط أي شعب، إحنا من الشعب مش من أفلام كرتون، عندنا شخصيات حقيقية، عندنا مشاكلنا وظروفنا الاقتصادية، وولادنا اللي عايزين نعلّمهم، والتعليم بقى غالي”.
وتابعت: “الفنان عنده أقساط، ومش كل الفنانين بتقبض فلوس كتير، والناس لازم تفهم الفرق بين 4 أو 5 نجوم كبار جدًا علشان عندهم قوة شرائية في أفلامهم وغير الغالبية الساحقة من الفنانين، والناس دول كلهم في نقابة واحدة، ومفيش فرق بين واحد معاه وفلوس والتاني، كلنا بتسري علينا القوانين واللوائح، وبنتكفل ببعض كلنا بشكل أسري، والحياة صعبة ولازم نقدّر بعض”.
وكانت الفنانة بشرى تحدثت عن تكريم الفنان محمد رمضان في مهرجان الأقصر في دورته الـ 12، حيث قالت: محمد رمضان عنصر يمثل الشباب وله شعبية كبيرة في مصر والوطن العربي وشمال إفريقيا، وتكريمه ما يعتبرش تكريم لأنه لسه صغير ونقدر نقول دفعة للأمام إنه يشيل مسؤولية التكريمات لأنه يقدم الأفضل والأحسن والأجود علشان الناس اللي وثقت فيه واحترمته وكرمته.
