قالها يا بيبي ؟؟ طبعا كلكم فاكرين هذا الافيه بصوت كريم عبد العزيز في فيلم حرامية في كي جي تو ، والذي جمعه بالنجم وصديق عمره ماجد الكداوني ، ومازالن صداقتهم الحلوة مستمرة ويضرب بها المثل.
ماجد وكريم صحاب من حوالي 20 سنة، مش مجرد زملا مهنة واحد ومثلوا مع بعض كام فيلم ، لأ ده في الحقيقة علاقتهم اقوى بكتير، واقفين في ضهر بعض في الفرح والشدة مش مشهدين بنشوفهم على الشاشة ، مش بيجمعهم مهنة واحدة بس لكن جمعهم عشرة ومواقف وصداقة كبيرة.
الوسط الفني مليان علاقات وصداقات كتير ، لكن قليل اما تلاقي اتنين محافظين على علاقتهم كل السنين دي ومسمحوش لحد يخربها زي ما بيحصل كتير في الوسط ده وبنسمع كل يوم، لكن الحقيقة من زمان وكلنا بنحب كريم عبد العزيز وماجد الكدواني حتى شخصياتهم في الحقيقة تتحب وتحسهم ليهم دماغ لوحدهم ومش بيحبوا الظهور الكتير عمال على بطال.
من يومين احتفل ماجد الكدواني بفرح ابنه يوسف على عروسته كارلا منصور، وعمله فرح كبير في الغردقة ، وعزم كتير من نجوم الوسط الفني ، وشوفنا ممثلين كتير في الفرح ، لكن اللقطة اللي كانت تريند الحفلة والاهم على الاطلاق كانت ظهور كريم عبد العزيز واللي عمله في فرح يوسف.
كريم اعتبر ان ده فرح ابنه زي ما وصفه ، ومسك الدف وفضل يطبل ويغني ويصقف ويهيص بشكل اول مرة نشوفه في الحقيقة ، ده مش مشهد في فيلم ، لا ده كريم فعلا فرحان بابن صاحب عمره وكان متألق في فرحه ولا كأنه ابنه بالظبط ، ووقف جنب ماجد الكدواني وفضل يطبل على الدف بنفسه من غير ما يتكسف ولا يخاف من الكاميرات تصوره والفيديو يتنشر طبعا على السوشيال ميديا.
كان كل همه يفرح مع صحبه بجواز ابنه ، وكتبله على تويتر : مبروك يوسف ماجد الكدواني.. ابن أخويا وابني.. ربنا يسعد أيامكم ويبارك فى حياتكم يا حبيبى أنت وعروستك الجميلة».
كريم عبد العزيز في العادي مبيحبش يظهر كتير ، ولا بنشوفه في لايف ولا لقاءات كتيرة على التلفزيون ، هو مش بيحب الشو وخلاص ، لكن ظهوره بالشكل ده في فرح ابن صاحبه دليل على قوة علاقته بماجد وفرحته بابنه من قلبه ، واحنا من زمان مشوفناش كريم عبد العزيز في اي فرح اصلا ، لكن ده فرح الغالي على قلبه.
الحقيقة فيديو كريم وهو واقف يطبل ويغني ويهيص مبهج وعمل حالة حلوة على السوشيال ميديا ، والناس ركزت معاه جامد وسابوا الفرح والعريس والعروسة ، واتكلموا عن صداقة كريم وماجد اللي عمرها 20 سنة.
كريم وماجد نجحوا مع بعض وعملوا افلام كتير حلوة سوا وكلها نجحت ، وكانت البداية الي جمعتهم في فيلم حرامية في كي جي تو سنة 2001 ، وبعدها فيلم حرامية في تايلاند سنة 2003 ، وبعدها مظهروش تاني مع بعض الا بعد سنين كتير لكن صداقتهم فضلت مستمرة بعيد عن الشاشة والكاميرات.
ورجعنا شوفنا ماجد وكريم تاني سوا في فيلم نادي الرجال السري سنة 2019 ، وبعدها فيلم البعض لا يذهب للمأذون مرتين في 2021 ، وكمان ظهر ماجد الكدواني ضيف شرف في اعمال كتير قدمها كريم عبد العزيز زي الاختيار 2 وفيلم فاصل ونعود.
كريم وماجد اتكلموا عن صداقتهم في لقاءات على الهوا ، وقال ماجد الكدواني :”أعرف كريم عبد العزيز من اكتر من 20 سنة، وهو تركيبة ساحرة جدا وحساس أوي وعنده كم من المصداقية رهيب، بالنسبة لي أخ وصديق وبتعلم منه ومن حكمته وتصرفاته وردود أفعاله طول الوقت، ربنا يحفظه ويديمه نعمة في حياتي، مبيعرفش يتكلم غير من قلبه، وعشرة عمر بجد، ودايما مابينا فضفضة ومن الناس القليلة اللي برتاح وانا بتكلم معاها وحاسس بأمان، وهو ممثل كبير ومختلف”.
اما كريم بقى قال عن الكداوني : ماجد من أجمل الناس اللي ممكن تقابلهم، صاحب صاحبه، أخلاق وجدعنة، وحالة استمتاع كبيرة لما أشتغل معاه”، وكتبله كريم على فيسبوك : الصاحب الجدع والسند والرزق .. شكرا يا صاحبي.
