تخيلوا إنها إعلامية قدرت تحمل هم مشاكل الأسر المصرية على مدار أكثر من 3 عقود .. نعم هذا ما حدث من الإعلامية القديرة فايزة واصف التي ودعت دنيانا في ساعة مبكرة يوم الأحد 11 يونيو 2023 وتركت ورائها تاريخ ومشوار إعلامي كبير جداً.
ده كفاية برنامج حياتي يبقى في السي في بتاعها.. الله يرحم فايزة واصف اللي هتكون نجمة الفيديو اللي معايا واللي هحكيلكم فيه كواليس وأسرار وهتعرفوا إزاي قدرت تنجح بالشكل ده وتستضيف فنانين كتير يشاركوها حل المشاكل بتاعة المجتمع.
من كام ساعة رحلت عننا الإعلامية الكبيرة فايزة واصف بعد معاناة مع الشيخوخة.. واللي أعلن رحيلها بشكل رسمي ابن أخوها محمد توفيق واصف واللي كتب على حسابه في فيسبوك: “عمتي الغالية الإعلامية القديرة فايزة واصف البقاء لله”.. وطبعاً الناس افتكرتها بكل خير وفضلت تدعي ليها كتير جداً عشان تاريخها اللي يشرف أي حد.
كفاية إنها من الجيل الدهبي للتلفزيون المصري يعني موجودة من وقت الإرسال بتاعه وبدأت شغلها من سنة 1963 وكان أول برنامج ليها اسمه “أغنية اليوم” بس البرنامج ده مكانش على مستوى طموحها.. هوب بالسلامة شافت اللي بعدها وكان اسمه “رسالة” وعندها فيه مبدأ إنها مش هتكشف عن أصحاب المشكلة وهما بيعرضوها وكانت بتستخدم مؤثر على وشوشهم عشان يعرفوا يتكلموا براحتهم.. لكن في الفترة دي بقى جاتلها فكرة برنامج “حياتي” اللي غير مسارها في الإعلام وكمان صنعت لسه تاريخها كله.
حياتها في برنامج
أول ما جت فكرة برنامج حياتي بدأت تنفيذها علطول مش هتستنى بقى وكانت بتعرض فيه المشاكل الاجتماعية بتاعة الأسر المصرية والفكرة هنا إنها كانت بتستضيف فنانين كبار جداً وقتها وبيعملوا تمثيل للمشكلة بشكل درامي عشان توصل للجمهور .
يعني شارك معاها يوسف شعبان وسميحة أيوب وليلى طاهر وحمدي أحمد وغيرهم كتير.. ولما تعرض المشكلة كانت تجيب ضيف تتناقش معاه عشان سحل المشكلة يعني برنامج متكامل في كل حاجة.. وقعدت تقدم البرنامج ده سنين كتير جداً وصلت 36 سنة وكمان قدمت برنامج اسمه “ربيع العمر” وكانت بتهتم فيه بحب مشاكل كبار السن والمسنين عامة.
زيجة وحيدة
اتجوزت فايزة واصف في حياتها مرة واحدة من السفير شريف ياسين واتكلمت عنه في حلقة من برنامجها حياتي وقالت عن جوزها اللي رحل عن دنيتنا من كام سنة إنه كان راجل محترم جداً وعمره ما اتدخل في شغلها الفني خالص وكان بيصرف على البيت وهي كانت بتخلي مرتكبها معاها تصرفه على نفسها وبس.
بدون مقابل
البرنامج بتاع حياتي ده كان كل حياة فايزة واصف بجد وبتقول إنها مخدتش ولا جنيه مقابل تقديم برنامجها وفضل يتعرض سنين وكانت الأسر المصرية بتستناه باليوم والساعة والثانية وكان قادر يعمل مشاهدات كبيرة جوه مصر وبراها.. ده كمان اشتغل في البرنامج معاها 10 مخرجين من الكبار في التليفزيون المصرى ده غير من المعدين وأغلبهم بردوا كانوا بيشتغلوا ببلاش.
وقالت فايزة في مقابلة تلفزيونية ليها من فترة إحنا مكناش نبص على الفلوس.. كنا بنجيب كبار الفنانين وكان أكبر واحد فيهم بياخد 40 جنيه ده النجم اللى فيهم.. وهي شخصياً مكانتش بتاخد حاجة. البرنامج ده كان صادق جداً في كل اللي ما بيطرحه مفيش رياء والطاقم اللي شغال بيحبوا بعض ومخلصين لشغلهم عكس دلوقتي زي ما قالت كله عاوز ياخد فلوس وبس”.
