عودة العندليب من جديد تشعل السوشيل ميديا فما القصة؟

قريبا سنرجع نرى العندليب من جديد ، بشكل ثاني وتفاصيل اكثر عن حياته بعد ما اعلنت اسرته انها تجهز لانتاج عمل قوي عن قصة حياة عبد الحليم حافظ لكن هذه المرة ستكون حقيقة فعلا.

مش اي حكايات وخلاص زي ما شوفنا قبل كدا ، طب ياترى مين بقى اللي هيعمل دور حليم المرادي وياترى هيعرف يقلده فعلا ولا هنقعد نضحك عليه ومنقدرش نكمل فرجة ؟

طبعا كلكم فاكرين مسلسل العندليب اللي اتعرض سنة 2006 وعمل البطولة شادي شامل ،، هو اجتهد وحاول يقلد حليم على اد مايقدر بس واضح ان ادائه معجبش اسرة عبدالحليم وكمان قالوا ان كتير من القصص والمعلومات اللي اتقدمت مكنتش صحيحة ، عشان كدا قرروا دلوقتي انهم يقدموا حياة العندليب من جديد وعلى الاغلب هيكون فيلم سينمائي

التحضير شغال وكمان اختاروا اللي هيقوم بالدور ، وهو الفنان محمود الغندور اللي اسرة عبد الحليم معجبة بيه جدا وشايف ان هو ده اللي هيعرف يجيب شخصية عبد الحليم احسن بكتيييير من شادي شامل
محمد شبانة ابن اخو العندليب معجب بمحمود ومقتنع بيه جدا وقابله وقعد معاه كتير، وقال عنه : شاب شاطر وبيحب عبد الحليم وغير ده كله بيعرف يمثل غير الناس التانين.

بس اشمعنة محمود الغندور اللي رشحته اسرة العندليب عشان يعمل الدور الكبير ده رغم ان في نجوم كتير جدا ممكن يجتهدوا ويعملوه ، والغندور لسة فنان صاعد ومش معروف اوي ؟
انا هقولك .. الحظ هو اللي جاب الفرصة دي لمحمود الغندور وهتكون وش السعد عليه ، هو خريج المعهد العالي للفنون المسرحية واكتشفه المخرج خيري بشارة ، و اهم حاجة عملها لحد دلوقتي هي مسرحية ” حبيبتي من تكون” في موسم الرياض في 2021.
وكانت بتحكي عن عبدالحليم حافظ وحبيبته وسيرته الذاتية ، وقدم محمود شخصية العندليب باحترافية وده خلى اسرة النجم تعترف انه نجح في الدور وهو ده اللي بيدوروا عليه من زمان ، ولما خلاص لقوا الشخص المناسب قرروا يقدموا العمل اللي متأجل من سنين .. يا حظك يا غندور.
المسحرية دي تحديدا اتصرف عليها مبالغ كبيرة جدا عشان تطلع بالشكل ده لدرجة انهم استعانوا بمتخصصين بريطانيين عشان يعملوا مسرح خاص ليها ، وكمان عرضوا فيها مقتنيات خاصة بالعندليب لأول مرة نشوفها من ساعة وفاته ، وكانت تجربة مسرحية هايلة في موسم الرياض من سنيتن بنشكرهم عليها.
طبعا محمود الغندور مش مصدق نفسه ان اسرة حليم كلها اختارته هو ، حس ان الدنيا بتفتحله ايديها في اهم عمل هيقدمه في حياته الفنية.

قال ايه بقى الغندور ؟
اتمنى طبعا أقدم شخصية عبد الحليم في عمل فني مرة أخرى بعدما قدمتها في عمل مسرحي ، وعملت شخصيته بصعوبة بسبب حب الجماهير ليه وكنت قلقان اغلط ، أي فنان هيقدم شخصية عبد الحليم حافظ، هيكون في ضغط ومحدش هيقدر يوصل لـ عبد الحليم حافظ، لأنه كان قريب من الجمهور، دي كانت أكتر حاجة خوفتني في البداية.

كمان قال : وأنا بذكر الشخصية، كنت بذاكر تفاصيل حياته نفسها علشان أقدر اقنع الجمهور، وحاولت أذاكره من خلال لقائه التلفزيوني وهو بيتكلم ومن خلال تسجيلات صوته وهو في المنزل، كنت بحاول أقرب من روحه، وهو كان بسيط ومتواضع وبيعمل خير كتير، والأستاذ محمد شبانة كان بيحكيلي عن حياته والناس بتحبه قد إيه

وبعد ما المسرحية اتعرضت ، الناس انبهرت ان في حد قدر يجيب شخصية حليم بالشكل ده ، وواضح كدا ان محمود الغندور هو اللي هيمحي شادي شامل من ذاكرة الناس بعد اللي عمله في مسلسل العندليب زمان

ده غير بقى ان الغندور طلع محظوظ وضمن حب ودعم اسرة عبد الحليم حافظ من غير ما يبقى خايف ولا متوتر ولا مستني انتقاد وهجوم عليه بعد ما يعمل الدور زي ما حصل مع شادي شامل

كلنا مستنين عرض الفيلم او المسلسل الجديد اللي هنشوف فيه قصة حياة عبد الحليم الحقيقة بقى وخاصة حكاياته مع الحب والجواز اللي مكنش ليه نصيب فيهم مع انه كان نجم الرومانسية واستاذ العواطف.