الفنان أحمد فهيم يقدم شخصية مميزة جدا من خلال مسلسل جعفر العمدة، للدرجة التى جعلت المخرج محمد سامي يقول، نفسي أقدم عمل من بطولته.
وطلب من الجمهور ميحصرهوش في شخصية خاله الفنان خالد صالح، لأنه قادر يحقق نجاحات كتير، شخصية فيهم في المسلسل بتفكرنا بشخصية من السينما العالمية.. شخصية فريدو في الأب الروحي..
فيلم الأب الروحي واحد من أيقونات السينما العالمية، وهو بيتكلم عن العائلات اللي انتقلت من إيطالبا لأمريكا، واللي بقت بتتحكم في أنواع كتيرة من التجارة الممنوعة، وبيحكمهم مجموعة من العادات والتقاليد الخاصة بيهم.
الفيلم مبني على قصة عائلة كورليوني، ومؤسسها فيتو كورليوني، واللي قدمه الممثل العظيم مارلون براندو، واللي بيتحكم في الشارع مع عدد من العائلات التانية، ولكن الأحداث بتتطور لإنه بيكبر وبيسلم الراية لواحد من ولاده.
كان المفروض والطبيعي إن اللي يتسلم الراية بتاعة العيلة الأخ الأكبر سوني، ولكنه كان عصبي وكان دايما مورط نفسه في مشاكل كتير، لحد ما تم إنهاء حياته في مرة من المرات، وبالتالي مكنش فاضل غير فريدو وهو الأخ الأوسط اللي بقى الكبير، ومايكل اللي هو الأصغر.
الفكرة من هنا بدأت تبقى شبه جعفر العمدة، لأن اللي حصل إن اللي تولى المسؤولية هو الأصغر، وده بيفكرنا بجعفر العمدة، واللي تولى المسؤولية هو جعفر في حين إن سيد هو الأكبر.
شخصية سيد وفريدو مرسومة في العملين بنمط متشابه جدا، هو أخ كبير، متهور، مش ذكي ومش حكيم، ولكن طول الوقت عايز يتصدر في أي مشهد وبيحاول يقدم نفسه على إنه كبير، بيجيب الإهانة لعيلته، وطول الوقت بيسبب مشاكل وبيكون الأخ الأصغر واللي متولي المسؤولية مضطر يحلها.
شخصية سيد وفريدو مرتبطين في إن شخصيتهم مهزوزة، وعايزين يثبتوا إنه كبار لكن مش قادرين، بيحبوا أخوهم الأصغر اللي بيدير، ولكن في نفس الوقت حاسين بزعل لأنهم الأكبر.
يمكن شوفنا مشهد لسيد وهو بيعيط وبيقول لو كنت أنا اتخلقت الأصغر مكنش هيفرق معايا حاجة، أهو بتحامة في أخويا الكبير، ولكن أنا الكبير وبتحامى في أخويا الصغير.
لكن المهم هنا، نهاية النوع ده من الشخصيات بيكون ايه؟ قدامنا طريق من اتنين، في الدراما الطيبة هيفضل سيد موجود، المخرج والمؤلف هيدوله شوية مكتسبات نفسية في بعض المواقف، تخليه يحس إنه كبير أو إنه شاطر، أو إنه ناجح في شيء، وده هيحسن الحالة المزاجية للجمهور المتعاطف معاه.
لكن في الدراما الواقعية واللي بتميل للشر أكتر، وده اللي حصل في فيلم الأب الروحي، إنه فريدو خان أسرته، لصالح شريكه في الفندق، باع عيلته عشان يثبت إنه شاطر وإنه يقدر يعمل حاجة، لحد ما أمر مايكل بإنهاء حياة أخوه.
شخصية مايكل مختلفة عن شخصية جعفر، لأن مايكل بيعتمد على الترهيب والتخويف ومعندوش المبادئ والقيم وبعض الأخلاقيات اللي كانت عند الأب، في حين إن جعفر طالع في المسلسل أكثر طيبة وحنية وعقل وحكمة، وبشكل عام مش مجرم، وبالتالي في حال إن سيد هيتكشف نوع من الخيانة ليه خلال العمل، فبالتأكيد تصرف جعفر مش هيكون بنفس طريقة الأب الروحي.
