كثير من الناس لا يعرفون أن قصة رحيل وداد حمدي على يد الريجيسير الخاص بها تكررت مع الفنانة فاتن فريد التي كانت تشبه الفنانة وردة بشكل كبير جدا فما هي قصتها وكيف كان رحيلها؟
الجوازة التانية بداية القصة
الفنانة فاتن فريد اتجوزت مرتين والمرة الأولى قعدت فترة طويلة وكانت من خارج الوسط الفني وخلفت خمس بنات هما: “سمر وهويدا ومنال ودلال وغزال”، وقبل ما ترحل بسنة واحدة اتجوزت للمرة التانية ودي كانت بداية القصة اللي اتعرضت ليها على إيد عامل عند جوزها، ووقتها اتجوزت من رجل أعمال كان بيمتلك بنزينة، واللي حصل إن جوزها طرد أحد العمال اللي شغال معاه واسمه ياسر علي عبدالله، واللي بعدها راح على منزل فاتن عشان يطلب منها تتوسطله عشان يرجع الشغل وفجأة شاف ياسر سكينة في صالة الشقة راح واخدها بسرعة وأنهى بيها حياة فاتن فريد.
فاتن والعبرة في الحياة
وكانت فاتن فريد بتمتاز إنها حريصة بشكل كبير في تعاملاتها مع الناس يعني مثلًا مبتسمحش إن شخص غريب يدخل بيتها، وده عشان هي واخدة عبرة في الحياة من مين بقى؟، من الفنانة وداد حمدي اللي رحلت على إيد الريجسير بتاعها واللي أنهى حياتها بالسكين بردوا عشان يلهف دهبها، ورغم كده مقدرتش تمنع إن يحصلها زي اللي حصل لوداد.
اكتشاف اللي حصل وموقف بنتها
بعد ما انتهت حياة فاتن فريد على إيد العامل إياه انطلقت صرخات الضحية واتجمع الجيران بس المتهم هرب لكن حارس العقار جري وراه لحد ما مسكه وسلمه لرجال المباحث، ووقتها هويدا بنت فاتن قالت إن مامتها كانت صديقتها وكمان جارتها في العمارة اللي جنبها وقبل رحيلها بدقايق كانت بتكلمها في التليفون حوالي ساعة ودار كلام عن أمور الدين وفضل سورة يس في القرآن، واكتشفت إن حياتها انتهت بعد ما سمعت صرخات الجيران وهوب شافت مامتها راقدة على الأرض وحياتها بتنتهي فاحتضنتها جامد وقعدت تعيط وسمعت منها كلمات بتقول فيه: “ياسر خلص عليا وبعدها متكلمتش تاني ودخلت في غيبوبة واتنقلت مستشفى الهرم واللي منها أعلنوا إنها فارق الحياة.
مين هي فاتن فريد وإيه مشوارها الفني؟
وفاتن فريد اسمها الحقيقي نبيلة عباس مرسي، درست في القسم الحر بمعهد الموسيقى العربية واتخرجت منه سنة 1975، واشتغلت في السينما بعد ما لمعت كمغنية في سوريا ولبنان، ويعتبر فيلم “وحوش الميناء” مع فريد شوقي وبوسي وفاروق الفيشاوي ومن إخراج نيازي مصطفى، هو بداية تقديمها للجمهور كبطلة مطلقة وبعدها قدمت فيلم “امرأة تدفع الثمن” مع فريد شوقي ومحمود ياسين وهشام عبدالحميد وإخراج حسن إبراهيم، وبعدها “الخطيئة السابعة” مع فاروق الفيشاوي وعايدة رياض وإخراج عبداللطيف زكي، وأنتجت فاتن فريد فيلم “بياضة” وهو بطولة رشدي أباظة ويسرا.
ومن أبرز أعمالها في السينما أفلام: “الرغبة، والضياع، وعاشق الروح، ووحوش الميناء، وصراع الأقوياء، وامرأة تدفع الثمن، والجدعان الثلاثة، وعاشق الروح، والعتبة جزاز، ونوارة”، وغيرها من الأعمال اللي ختمتها بمسلسل “بطة واخواتها” بطولة غادة عبدالرازق وأحمد بدير سنة 2004، وفضلت بعدها 3 سنين مش بتشارك في أي أعمال فنية، وكمان تألقت في تقديم الأغنية الشعبية وكان من أهم أغانيها: “اللي تعبنا سنين في هواه، ونص كلامك كدب، وإن كنت ناسي، وغدارين، ووفر دواك، ويا أنا يا هية، وخليك على عومي”.
