أعلنت الفنانة عارفة عبد الرسول، أنها تعاني من حالة اكتئاب حاد بسبب ما حدث معها في كواليس برنامج رامز نيفر إند الذي قدمه الفنان رامز جلال خلال شهر رمضان الكريم 2023.
وشاركت عارفة عبد الرسول، منشور دونته عبر حسابها الشخصي، على موقع تبادل التواصل الاجتماعي فيسبوك.
وقالت عارفة، خلال المنشور: “اتصلت بيا واحده وبكل الحب قالتلى احنا بنفتخر بيكى ونفسنا تحضرى معانا افتتاح محل فى البوليفارد…من فرحتى مسالتش محل ايه لان كان نفسي اروح السعوديه وكل اللى شغلنى الوقت وزنقه رمضان، بس البنت كانت شاطره وعرفت تدبر الميعاد”.
وتابعت: “اخلص تصوير واطلع ع المطار الحق اخر طياره افتتح المحل واطلع ع المطار، كده يعنى صد رد ولكم ان تتخيلوا الارهاق والتعب، من اول ماحطيت رجلى فى المطار وانا باعامل كملكه، خدمه مرحبا وكبار زوار وحوسه، وصلت اخدتنى عربيه فارهه الى فندق هيلتون الرياض ونزلت فى حته نتفه سويت يجرى فيه الخيل وكل حاجه تاتش بقيت خايفه المس حاجه تفرقع فى وشى”.
وأضافت: “الروم سيرفز كل شويه يخبطوا جايبين تحيه من مدير الاوتيل وكارت بالانجليزى معناه ان اداره الاوتيل فى غايه الانفشاح لاستقبالى، افتح التليفزيون الاقى صورى بفيديو لطيف وقد ايه احنا مش مصدقين انك معانا، تخيلوا معايا بس الحاله اللى انا فيها، الصبح جم بنات كوافير وماكيير والبنت اللى اتصلت بيا واسمها شريفه، بقت تسالنى اسئله عرفت بعدين انها بتشوف شغلها”.
وأوضحت: “اطمنت عليا لانى جايه من تصوير واصرت انى اطلب اكل واكل قبل ماننزل، وصلت قابلتنى المذيعه الجميله كارلا المريحه للعين والقلب وخضت تجربه السهم والخيل وانا فرحانه وقصيت الشريط بمقص تحفه ودخلت ع المطعم اللى كل حاجه فيه بتلمع قوى والشياكه والجمال وانا بازداد سعاده وفرحه مافرحتهاش عمرى، ووصل الشيف الكبير هو انا فعلا استغربت شكله وقولت لنفسى انه شبه الارهابيين اسود ف اسود كده”.
وأشارت: “وأنا مشرئبه قوى وحاسه انى يسرا ولا مرفت أمين، هوب لبست التورتايه، انتوا متخييلين، طلعت سابع سما ونزلت على جدور رقبتى، مش مهم المقلب، صدمتى النفسيه محتاجه علاج فعلا، أنا باحب رامز من زمان وعارفه أنه الواد الشقى بتاع العيله وفرحانه بيه انه ماسك فى الواد ده ومش بيتغير حتى افلامه شقيه، لكن برضه مش كده”.
وأختتمت: “يعنى افرض جرى لى حاجه، انا طول عمرى صريحه معاكم وفعلاً ماكنتش اعرف وده اللى حصل، اما الست شريفه والسيد رامز ليهم روقه بس اتعالج من الصدمه الاول”.
