خلال الساعات الماضية انتشرت أنباء انفصال جديد بين اثنين من المشاهير، ويمكن شهرتهم ليست بسبب إنهم نجوم ومعروفين في مجالاتهم فقط، ولكن لأنهم معروفين بجوازاتهم وانفصالاتهم، وتقلباتهم المتكررة، يمكن المعلومات حتى الآن ليست مؤكدة، ويمكن تكون غير حقيقية، ولكن بطلة القصة عملت الحركة التي يفعلها مشاهير كثير وقت الانفصال، وهي حذف الصور من على إنستجرام.. هي حلا شيحة وهو معز مسعود.
الداعية الشهير معز مسعود والفنانة المعتزلة حلا شيحة كانوا هما حديث السوشيال ميديا الساعات اللي فاتت بعد ما حلا مسحت صورها مع معز، ونزلت شوية ستوريز ليها احتفالا بعيد ميلادها وكانت مش محجبة طبعا، وعلى طول الجمهور ربط بين ده وبين انفصالها عن معز.
على الناحية التانية معز مسعود مكنش ليه أي رد فعل، ومنزلش حاجة ولا ظهر ليه أي ردود فعل خالص، ولسة لحد دلوقتي الاتنين متابعين بعض على إنستجرام، ويمكن معز مسعود مش متابع غير شخصية واحدة وهي حلا شيحة.
سبب التكهنات الكتير بالانفصال ما بينهم، لأنه معروف إن الطرفين متعددين الزيجات والانفصال، وكمان حلا شيحة متغيرة المزاج بشكل كبير، كل فترة تقلع الحجاب وتلبسه، وترجع الفن وتعتزل، فاللي هو يعني محدش فاهملها حاجة.
حلا على موضوع الحجاب، قالت أنا زي بنات كتير، بلبس طرحة يعني، ومتكبروش الموضوع، ووالدها الفنان التشكيلي أحمد شيحة، اعتبر إن بنته يعني مش محجبة أوي هي بتحط طرحة على نص راسها وبتغطي بيها رقبتها.
عموما يعني موضوع الحجاب بتاع حلا مش شاغل بال معز مسعود أوي، ولا هو الفيصل في علاقتهم لأن في صور ليهم مع بعض وهي من غير حجاب، هو الملف بس إنها مسحت صورته.
ومن المعروف إن معز مسعود اتجوز أربع مرات، أول مرة من بنت اسمها سارة، وبعدها حصل الانفصال، وبعدين اتجوز المرشدة السياحية والمدونة بنست نور الدين، وحصل الانفصال بعد 6 شهور، وهي كتبت على صفحتها وقتها الجملة الشهيرة «ليست الأشياء كما تبدو».
بعدها بفترة اتجوز من الفنانة شيري عادل، واستمر معاها فترة قصيرة وباردو طاردتهم شائعات الانفصال لحد ما حصل فعلا، وخد هدنة فترة قصيرة وبعدين اتجوز الفنانة حلا شيحة.
معز مسعود من المعروف ميله للجواز الكتير، وده حقه طبعا محدش يقدر يتدخل فيه، ولكن انفصاله المتكرر هو اللي بيعزز فكرة إن ممكن يكون حصل مؤخرا انفصال بينه وبين حلا شيحة.
كمان في شائعات منتشرة حاليا عن وجود علاقة بين معز مسعود وبين نجمة شهيرة، وإن ده ممكن يكون سبب الانفصال بين معز مسعود وحلا شيحة.
ولكن مصادر كشفت لمواقع صحفية، إن الظهور المتكرر لمعز مسعود مع الفنانة الشهيرة متعلق بعمل فني جديد، ومش موضوع ارتباط ولا حاجة، ولكن محدش كشف هي مين الفنانة ولا ايه العمل الفني ده.
