كثير من الموهوبين العرب ياتوا إلى مصر من أجل العمل ، ويكون هذا هو باب الخير والشهرة والنجومية، كما حدث مع معظم المشاهير والفنانين.
لأن مصر تعتبر البوابة اللي من خلالها الممثلين أو المطربين العرب بيقدروا يوصلوا لكل الوطن العربي مش بس الاكتفاء بالجمهور المصري، ولكن خلال الفترة الأخيرة حصل شوية كلام حوالين النقطة دي خصوصا مع الحفلات اللي بقت بتتعمل في دول شقيقة تاني..
شوفنا خلال الفترة الأخيرة تصريحات من بعض النجوم، اللي البعض اعتبرها نكران للجميل، أو بشكل ما تقليل للقوة الناعمة في مصر اللي هي متمثلة في الفن والثقافة، وفي الطريق ده حصل جدل كتير وكلام مكنش موفق من أصحابه مهما حاولوا يدافعوا عنه بعد كدة.
مؤخرا كانت تصريحات الفنانة أصالة لما قالت إنها الفضل كله في نجاحها للسعودية، وده كان شيء غريب ومزعج جدا للمصريين، اللي عملوا حملة عليها لما كان عندها حفلة في مصر مؤخرا، وسبب الهجوم مكنش عشان اسم دولة تاني شقيقة ولكن لأنها أنكرت البلد صاحبة الفضل الحقيقي عليها، خصوصا إن أصالة سبب شهرتها في الوطن العربي هو الأغاني اللي باللهجة المصرية وتعاونها مع صناع الأغاني المصريين.
من قبلها كان في تصريحات للفنان محمد عبده، اللي قال إن مصر أم الدنيا والسعودية أبوها، وهنا كان بيتكلم عن أهمية الدور اللي بتقوم بيه السعودية خلال السنين الأخيرة والتطوير اللي حاصل هناك، وده طبيعي من واحد بيشجع بلده، ولكن اللفظ اتفهم بطريقة مش لطيفة.
ومن قبلهم ميريام فارس لما قالت إنها بطلت تعمل حفلات في مصر عشان هي بقت تقيلة على المصريين، بمعنى إن هي بتاخد فلوس منظمين الحفلات ميقدروش يدفعوها، ولكن اللي هي متعرفوش، إن بيتدفع أكتر من أجرها لنجوم تاني ولكن بتكون حفلاتهم هتعوض الفلوس المدفوعة دي، يعني أكيد هي مش هتيجي حاجة جنب عمرو دياب مثلا.
الحقيقة إن النوع ده من الكلام وإن كان مبيقللش من قيمة الفن المصري، ولا بيزود أي طرف تاني، ولكن باردو يمكن محتاجين نفتكر مع بعض ليه مصر؟ بمعنى اشمعنى مصر هي المكان اللي كل الناس بتنجح منه مش أي بلد تاني؟
لو جينا نبص على بلد زي المملكة العربية السعودية الشقيقة، ولما قررت تعمل موسم الرياض وتعمل حفلات مختلفة ومهرجانات وتكريمات للفنانين، كان دايما على رأس النجوم دول هما المصريين، شوفنا أنغام وشيرين وشوفنا عمرو دياب ومنير، وغيرهم كتير من النجوم، وحفلات لصناع الفن المصريين، وكمان عروض مسرحية مصرية بتنتج في السعودية، بمعنى إن راس الحربة في التسويق للنجاح السعودي في مسألة الانفتاح والتطوير هو القوة الناعمة المصرية.
طيب ليه السعودية اختارت النجوم وصناع الفن المصريين؟ لأنه الجمهور المستهدف من التطوير السعودي هو الجمهور العربي، ومفيش أي لهجة أو نوع فن عربي منتشر في كل البلدان الناطقة باللغة العربية غير الفن المصري.
وممكن نسأل سؤال.. هل مسرحية كوميدية بتتعرض في بلد خليجية هتنجح في المغرب؟ أو في أي دولة من شمال إفريقيا؟ هل الدول دي هتفهم الإيفيه الخليجي واللكنة بتاعته وتتفاعل مع نجوم العروض دي؟
ويمكن إن إحنا نقيس على ده في كل مجالات الفن، الأغنية باللهجة المصرية بتنتشر في كل مكان بيستخدم اللغة العربية، في حين الأغنية بأي لكنة تاني مش بتقدر تحقق النجاح ده، يمكن أغنية مرة تضرب وتنجح، ولكن في المجمل اللهجة اللي بتكسب هي المصرية.
أغلب النجوم والمشاهير العرب المعروفين بشكل كاسح جم هنا مصر واشتغلوا فيها مثلوا بلغتها وغنوا بلغتها، وكلوا وشربوا وعاشوا ونجحوا وكأنهم من ولاد مصر، وحققوا فيها شهرة مكنتش هتحصل في بلدهم، والموضوع شبه النجوم اللي بيخرجوا يروحوا هوليود عشان يقدروا يوصلوا للعالم كله.
هوليود بتقدم فن ليه لغة عالمية، كل الناس من كل حتة بتفهمها، ومصر بتقدم فن كل الدول الناطقة بالعربية بتفهمه.
طيب مين في الوطن العربي ميعرفش عادل إمام وأفلامه؟ إيفيهات محمد هنيدي وأفلام يسرا ونور الشريف وأحمد زكي ومحمود عبدالعزيز، وعبدالحليم وأم كلثوم ومحمد عبدالوهاب ومن قبلهم كتير ومن بعدهم نجوم طالعين كتير.
ليه مصر؟ لأن اللي بيحبه المصريين كل الوطن العربي بيحبه، واللي مبيحبوش المصريين بتكون دي وثيقة نهايته، وهي البلد اللي أي دولة في الوطن العربي عايزة تعمل دعاية لحفلة ليها أو فاعلية أو مهرجان، لازم يكون فيه مصريين، عشان دول هما ضمانة النجاح.
طبيعي إن كل الدول ليها حق مشروع في إن هي تقدم شغلها وتنجح، وطبيعي إن كل واحد يدافع عن بلده، بس اللي مش طبيعي إن حد ينكر فصل مصر، ولا يفتكر إن في لحظة معينة فيها شوية أزمات، إن أم الدنيا فقدت دورها وريادتها.
