بسمة بوسيل جعلت تامر حسني خاين في نظر جمهوره، وقصي خولي وغيرهم من النجوم ربنا رزقهم بستات فضحوهم ولا راعوا عشرة ولا أولاد ولا أي شئ، وفي التقرير التالي سنكشف العديد من الاسرار في حياة المشاهير وما حدث لبعصض المشاهير بسبب زوجاتهم.
النهايات أخلاق
بيقولوا إن النهايات أخلاق، بس إزاي ده عالم الفن هو بوابة الشهرة والنجومية اللي كل فنان بيتمناها، ولو بصينا هتلاقي نجوم صف أول معلمين مع الناس وليهم قاعدة كبيرة من الجمهور بس حظهم في الحياة الخاصة مش مطاوعهم وربنا رزقهم بستات طلعوا فضحوهم.. ما هو ربنا مش بيدي كل حاجة فعلاً.
وكإن الستات دول كده هيكسبوا بنط وشعبية النجم هتقل بقى وجمهوره هيغضب عليه.. لكن ده في الغالب بيطلع على فاشوش وطلعوا الستات الفضاحين اللي ضربوا اجوازهم على قفاهم معملوش الصح في الآخر وبياخدوا رد فعل يعلم على قفاهم.
عمل اللي هو عاوزه
محدش ميعرفش جوازة الفنان اللبناني وائل كفوري من أنجيلا بشارة وقصة جوازهم وطلاقهم والبنتين اللي بينهم والنفقة والكلام ده كله، بس اللي محدش يعرفه إن وائل كفوري تقيل بطبعه وعارف يسكن امتى ويخلص مشواره امتى وهكذا.
وده اللي عمله ساب أنجيلا تطلع تقول كل اللي هي عاوزاه وتفضحه في موضوع الطلاق والمحكمة بس هو في النهاية قعد مع المحامين وكتب عقد اتفاق يضمن بيع إنه بشوف بناته ويتربوا تحت عينيه وكمان يصرف عليهم باللي يقدر عليه وطليقته وافقت ورجعت بعدها تشتكي من الغلاء وإن الفلوس مش مكفية، بس بردوا كل ده وهو متجاهل الموضوع وعارف بيعمل إيه هو فتى أحلام بنات كتير ليه أكيد عشان تقله ده
المعاملة أهم
الفنان السوري قصي خولي بردوا قدر يدينا درس في المعاملة والأخلاق الكويسة ومردش بنص كلمة على أم ابنه التونسية مديحة الحمداني اللي طلعت وقالت إنه مخلف منها ولد ولازم يسأل عليه ويكون مسؤول منه، ومع شوية تحابيش في الكلام مع بلوك على إنستجرام الناس عرفت الموضوع كله وبدأت تسأل في إيه وقصي خولي ولا رد ولا عبر حد.
وفجأة قدر يقول إن لو داريت على شمعتك هتئيد، وفعلاً شوية وفقنا العلاقة بقت أحلى بينه وبين أم ابنه وبقت تقول عنه كلام في حقه يبين إنه مهتم بابنه وبيربيه ويفسحه، وهي كمان أوقات تروح معاهم الفسح والخروجات وكل الناس معجبة بطريقة معاملتهم دلوقتي وده بسبب جدعنة قصي أصلا من الأول وبيتمنوا يرجعوا لبعض.
لمحت للخيانة
ومن كام يوم طلعت بسمة بوسيل وكتبت إن كل شيء قسمة ونصيب بينها وبين جوزها وأبو ولادها تامر حسني، والتاني استسلم لقرارها وخلاص راضيين بالأمر الواقع وكانت النهايات حلوة بينهم والجمهور صقفلهم، ومعداش يومين تلاتة وكلنا شوفنا هالة عمر وهي بتتزف على عريسها وتامر حسني اللي يعتبر زي أبوها غنالهم في الفرح والحياة جميلة.
وكمان لأول مرة الناس تعرف علاقتهم ببعض، ومن وقتها بسمة بوسيل مش على بعضها ورمت بوست واتحولت على تامر حسني ورزعته إلغاء متابعة.
وبعديها قالت بسمة بوسيل، حسبي الله ونعم الوكيل فيكي يا هالة، مع الرسالة الغامضة بقى إن احترام العشرة بيبتدي باحترام مشاعر الغير بالذات لو حد كان سبب رئيسي في خراب بيتك وهدم حياة ولادك، ودار الشريط من وقتها والعلاقة انكشفت وكل حاجة بقت على عينك يا تاجر.
ومن وقتها والجمهور ربط موضوع هالة عمر بخيانة تامر حسني لبسمة بوسيل وتوقعوا إن هالة هي السبب في معرفة تامر بيارا السكري ملكة جمال مصر وإن هي دي سبب خراب البيت وتامر متجوزها في السر وحكايات ملهاش آخر، لكن موقف تامر حسني كان كله جدعنة وشهامة ولحد دلوقتي لا طلع فضح ولا رد ولا دافع عن نفسه ولا اتكلم نص كلمة.. ناصح اسم الله عليه وعارف هو بيعمل إيه وشوية والموضوع هيخلص.
