ياما فنانين دخلوا الوسط الفني ومثلوا وقيل عليهم داخلين بالواسطة وليس لديعم موهبة سواء كانوا أزواج فنانين اخواتهم أبنائهم كله موجود.
لكن الغريبة بقى إن يكون في إخوات في الوسط يرفضوا يساعدوا إخواتهم ويسيبوهم يمثلوا لوحدهم وميظهروش معاهم في أعمال فنية، وكل واحد طبعًا ليه المبرر بتاعه، وفي الفيديو اللي معانا هنعرف مين هما الفنانين اللي رفضوا يظهروا مع اخواتهم في أعمال فنية أو يبقى بيمنعوا القيل والقال ويتقوا الشبهات.
أمير كرارة قال دي مش جدعنة
معروف عن الفنان أمير كرارة إنه رسم خط حلو لنفسه وبقى من نجوم الصف الأول بعد ما كان ليه أعمال مبتحققش النجاح اللي منتظره الجمهور يعني الدنيا كانت مخصماه لحد ما ظهر في مسلسل كلبش من كام سنة وبقى لقب باشا مصر ملازمه رغم إنه ظهر في اعمال كتير بعدها لكن المسلسل ده فرق كتير في مشواره وحاطه على طريق النجومية وده اللي هو قاله قبل كده في تصريحات ليه.
وبعدها بقى من نجوم الصف الأول اللي ليهم مسلسل كل سنة زي الاختيار وسوق الكانتو وغيرهم، وأمير ليه أخ اسمه أحمد كرارة بيمثل بردوا واسمه بقى معروف في الوسط وقدر يثبت نفسه من غير ما يظهر في عمل مع أخوه وده ممكن يخلي الواحد يقول دول متخاصمين ولا حاجة لا سمح الله بس أمير طلع في برنامج تلفزيوني وقال مبرره إن ده ميحصلش عشان ده مش صح وظهور أخوه معاه مش حلو عشانه وكمان هو كويس من غيره عشان ميتقالش إنه بياخد أخوه معاه واللي عمله ده جدعنة معاه.
نقيب الممثلين موقفه محرج
ورغم إن الفنان أشرف زكي أكتر حد يقدر يتوسط لأي حد إنه يظهر في عمل فني بحكم منصبه كنقيب للممثلين وبالتالي يقدر يتوسط لأخته الفنانة ماجدة زكي وتظهر في عمل فني بس للأمانة ماجدة فنانة تقيلة وعندها موهبة وكاريزما جبارة تخليها تقدر تشتغل لوحدها بس بردوا هما الاتنين مظهروش في عمل مع بعض لا وهو مش نقيب لأن الموقف كمان بقى حساس، ولما اتكلم عن اخته في لقاء ليه قبل كده قال إنه لما مامته رحلت عن الدنيا بقت أخته ماجدة هي الأم وهي الأخت وهي كل حاجة بالنسبة له.
إيناس مكي مبتحبش المساعدة
بيتهيألي مفيش حد في مصر ميعرفش أحمد مكي وهو الصراحة غني عن التعريف ده كفاية “الكبير أوي” في تاريخه كله، وهو في الحقيقة قدم شخصيات مميزة خلته يعرف طريق النجومية بدري بدري، بس لو بصينا للناحية التانية هنلاقي إن أخته.
الفنانة إيناس مكي شهرتها وأعمالها محدودة والاتنين مظهروش مع بعض بس إيناس معروفة من وقت مسلسل “لن أعيش في جلباب أبي”، ولما سألوا ليه مظهرتش مع أخوها في عمل فني قالت إنه أخوها وبتحبه ومش شرط يظهروا سوا في عمل ويمكن كل واحد ليه طريقته في التمثيل وهي مش زعلانة إنه مش بيرشحها لعمل أو حاجة وهي مش محتاجة المساعدة دي.
ياسمين عبدالعزيز وأخوها بينهم مصانع الحداد
تمر الأيام والسنين وتفضل الفنانة ياسمين عبدالعزيز في حالها وأخوها الفنان وائل عبدالعزيز في حاله ده طبعًا على مستوى الفن بس على مستوى الحياة الشخصية بينهم وبين بعض مصانع الحداد وبعيدًا عن قصتهم مع بعض وتفاصيلها خلينا في الفن أحسن.
ياسمين حققت نجاحات كتير سواء في السينما ولا التلفزيون وليها أعمال كتير وبقت نجمة كوميدية تقيلة وليها تقريبًا كل سنة عمل فني بتظهر فيه، ويمكن تكون المشاكل الشخصية بينهم سبب رئيسي إنهم ميظهروش سوا وتحديدًا من وقت جوازها من الفنان أحمد العوضي لكن وائل عبدالعزيز ليه تصريحات قال فيها إنه رافض فكرة الشغل مع أخته ياسمين عشان ميتقالش إنه اتشهر بسببها وأكد إنه بيترشح لأي عمل فني باسمه مش باسم حد تاني مفيش مجاملات في الفن بالذات في مجالنا إحنا.
روبي وأختها لونهم مختلف
الفنانة روبي حققت نجاح كبير بأعمالها الفنية الفترة اللي فاتت رغم إنها من وقت ظهورها في أعمال من كام سنة كانت أنجح من دلوقتي زي سجن النسا وبدون ذكر أسماء.
ومع الوقت الجمهور اتفاجئ إن روبي ليها أخت هي الفنانة ميريهان مجدي وده لإنها بتبعد حياتها الشخصية عن الوسط الفني ويمكن السبب ورا عدم ظهورهم سوا لأن كل واحد فيهم ليه لونه المختلف في الشغل وهما مش أخوات شقايق زي ما قالت روبي بس مامتهم زرعت فيهم حبهم لبعض لدرجة إن كل واحدة تتمنى ترحل من الدنيا قبل التانية.
كريم فهمي وأحمد فهمي مش عاوزين يقعوا
الفنان كريم فهمي وأخوه أحمد فهمي من النجوم الموهوبين على الساحة الفنية وكل واحد فيهم بيألف وبيمثل والحياة كويسة معاهم يعني لو اشتغلوا مع بعض مش ههيتقال دي واسطة والكلام ده، عشان الطبيعي إن كل واحد فيهم ثابت وجوده وأعمالهم الفنية كتير لكن ظهروا كضيوف شرف بس في أعمال بعض ولما كريم اتسأل كريم في الموضوع ده قال يمكن الظروف اللي مش جايبانا مع بعض ويمكن خايفين من الخطوة دي، وكان في بينهم حكاية كده وقت فيلم “حسن وبقلظ” وأحمد قال لكريم لو الفيلم ده وقع محدش فينا هيلحق التاني لأن أحمد فهمي كان هيعمل دور بقلظ قبل على ربيع.
شريف سلامة ومنال سلامة مبيحبوش الواسطة
كلنا بنشوف الفنانة منال سلامة لما تظهر في عمل فني بتعمل قلبان وبتمثل من 30 سنة زي دور الشريرة اللي قدمته الفترة الأخيرة في مسلسل “الأصلي”، وطبعًا ليها اخ في الوسط الفني هو الفنان شريف سلامة وظهر في دراما رمضان اللي فات بمسلسل كامل العدد مع دينا الشربيني وحقق نجاح كبير الحقيقة، ومع شهرة كل واحد فيهم ليهم طريق مستقل والاتنين مبيحبوش الواسطة وكل واحد فيهم ليه اللون بتاعه في الوسط الفني ومحد شافهم في عمل فني قبل كده مع بعض.
