لا أحد يعرف ماذا ينتظره في المستقبل وماذا سيكون العوض له، وهذ يتضح في قرارات بعض الفنانين، حيث أننا ومن خال هذا التقرير سنفاجئك بأعمال فنية مشهورة جدا وحققت نجاح كبير، رفضها نجوم لتكون وجه الخير على نجوم آخرين.
كلاسيكيات
كلنا عارفين إن في أعمال بتعتبر من كلاسيكيات الدراما ومهما اتفرجنا عليها هتفضل عاملة حالة غريبة كده محدش هيعرف يفسرها، وده اللي حاصل مع “رأفت الهجان، دموع في عيون وقحة، الشهد والدموع، أرابيسك، وحديث الصباح والمساء والوتد ولن أعيش في جلباب أبي”، وغيرهم كتير، كمان في أفلام كل ما تيجي على التلفزيون تحب تشوفها تاني بسبب جمال قصتها والنجوم اللي بيمثلوا فيها، وفي أعمال من اللي ذكرناها دي هنحكي عن اللي حصل فيها مع نجوم كبار.
سواق الأتوبيس
الفيلم ده رفضه الفنان أحمد زكي وندم عليه جدًا بعد ما راح الدور للفنان نور الشريف وحقق بيه نجاح كبير جدًا، لدرجة إن النمر الأسود قال إن قرار رفض الفيلم ده من أغبى القرارات اللي خدها في حياته.
نصف ربيع الآخر
المؤلف محمد جلال عبدالقوي قال إن جاله تليفون من الفنان العالمي عمر الشريف وقاله عاوز يعمل مسلسل من كتاباته ووقتها كتب “نصف ربيع الآخر” لكن بعدها عمر الشريف رفض يقدم الدور وتقريبًا معجبهوش، بس الدور ده راح للفنان يحيى الفخراني ونقله نقلة تانية فعلًا.
أرابيسك
المسلسل ده حقق نجاح كبير جدًا وقت عرضه واللي محدش يعرفه إن المسلسل ده كان هيعمله الفنان عادل إمام ويظهر بشخصية حسن أرابيسك وزي ما بيقول المخرج جمال عبدالحميد إنه اتفق مع المؤلف أسامة أنور عكاشة على إن الدور يكون للزعيم بس بردوا طلب تعديلات على السيناريو.
ووقتها جمال كان رايح مخصوص لعادل وهو بيصور فيلم “الإرهاب والكباب” في مجمع التحرير بس التعديلات اللي طلبها اترفضت من المؤلف وقال أنا مبشتغلش ترزي عند حد اللي أسند الدور بعدها للفنان صلاح السعدني وكان الدور وش الخير عليه.
لن أعيش في جلباب أبي
محدش فينا اتخيل في وقت من الأوقات إن شخصية الحاج عبدالغفور البرعي يعملها فنان تاني ويمكن لو كان عملها فنان تاني مش هتكون بالنجاح ده سبحان الله هي أرزاق ومقسمها الخلاق، وفعلًا الشخصية دي كان هيجسدها الفنان محمود عبدالعزيز بس هو اعتذر عنه وبدون أسباب.
وكمان شخصية الحاج سردينة كان مترشح ليها الفنان محمود ياسين لكنه بردوا اعتذر عنها وراح الدور للفنان عبدالرحمن أبو زهرة واللي عمله بشكل مميز جدًا، وفي الناحية التانية كانت شخصية الحاج متولي في مسلسل “عائلة الحاج متولي” مكتوبة للفنان محمود عبدالعزيز زي ما قال المخرج محمد النُقلي لكنه اعتذر ووقتها بسبب انشغاله بفيلمين هما “النمس وسوق المتعة” وراح الدور لنور الشريف.
اضحك الصورة تطلع حلوة
الفيلم ده وحيد حامد قال إنه اتكتب للفنان عادل إمام بس هو رفضه عشان كان خايف ميجيبش إيرادات وراح وقتها الدور للفنان أحمد زكي وبردوا فيلم “سوق المتعة” كان المفروض هيعمله عادل إمام ولما رفضه الدور راح للفنان محمود عبدالعزيز، وياما أفلام اتحولت من أحمد زكي للزعيم ومن الإمبراطور لعادل إمام، بس عشان معروفة للجمهور مفيش داعي نعيدها من تاني.
رأفت الهجان
بعد النجاح الكبير اللي عمله مسلسل “دموع في عيون وقحة” قرر صُناعه يشتغلوا تاني مع بعض في مسلسل “رأفت الهجان” ووقتها عادل إمام اعترض وطلب تعديلات على السيناريو أهمها إن طريقة الفلاش باك تتلغي ورأفت الهجان ميرحلش في أول المسلسل وبعدين يبدأ الحكي.
ووقتها المؤلف رفض وراح الدور للفنان محمود عبدالعزيز ولما بدأ الساحر في التحضير للدور رجع عادل إمام في كلامه وقال هيعمل المسلسل بس كان خلاص بقى، ووقتها حصل خلاف على الدور ده بين الساحر والزعيم لدرجة إن محمود عبدالعزيز كان في السعودية بيعمل عمرة وقابل الرئيس الراحل حسني مبارك بالصدفة ولما قاله على اللي حصل أمر مبارك بإن اللي يعمل الشخصية محمود عبدالعزيز، ولما الزعيم قابله في مرة قاله مبروك عليك الدور.
الخواجة عبدالقادر
مين كان يعرف إن الفنان يحيى الفخراني لما عمل دور الخواجة عبدالقادر مكانش راضي عنه بشكل كبير ومكانش عاوزي يعمله أصلًا؟، وده عشان هو شايف الشخصية دي محتاجة حد أصغر منه في السن، بس بعدها الناس قالت إن ده من أحسن الأدوار اللي عملها في حياته وده حقيقي، طيب الدور ده كان هيعمله مين الأول الفنانين محمود عبدالعزيز ونور الشريف اتعرض عليهم ورفضوه.
عمارة يعقوبيان
الفنان محمود حميدة ممكن يكون رفض أدوار كتير في حياته عشان خلافات على الأجر ومحدش يعرف لكنه عشان بيجادل في موضوع الفلوس ده ممكن يكون ده حصل، لكن اللي نعرفه إنه رفض دور قوي في فيلم “عمارة يعقوبيان” عشان خلاف على الأجر وصراحة مكانش حد يعرف يعمل الدور ده زي ما عمله خالد الصاوي اللي كان نقلة في حياته بالمناسبة.
جعفر العمدة
الفنان أحمد فهيم انضم للمسلسل ده قبل ما يتصور بيومين وقعد يذاكر الدور وفعلًا عمل بيه نقلة محترمة في حياته الفنية وخد حقه كممثل بعد ما كان بيظهر في أدورا مش بتلفت الأنظار زي دور “سيد” واللي عرفناه بعد كده إن الدور ده كان هيعمله الفنان أحمد فتحي، وتقريبًا كده زعل لما رفضه عشان راح ظهر في مسلسل “الحاج إكسلانس” مع محمد سعد اللي محققش أي نجاح خالص.
