المخرج خالد يوسف برغم الشهرة الكبيرة والضجة التي يتسبب فيها، لكن ستجد عدد اعماله قليله، قد يصل إجمالي أعماله الإخراجية 14 عمل بين أفلام ومسلسلات.
وفي آخر عشر سنين لم يقدم سوى 3 أعمال فقط. هو معروف بإثارته للجدل، سواء بسبب أعماله وقضيتها، أو مشاهدها الجريئة، وكمان معروف بحاجة تاني، موهبته في اكتشاف نجمات للأدوار الجريئة.
المخرج خالد يوسف ليه ناس بتحبه وناس مبتحبوش، هو شخص جدلي وعنده وجهات نظر مختلفة، ومخرج على الطريقة القديمة لما كان المخرج ليه هيبة وطلة معينة كدة، وبيكون ليه دماغ متحكمة في كل شيء ولازم العمل يكون بيعبر عنه وبيقدم بصمته، على عكس مخرجين كتير دلوقتي بيكونوا أبسط في التعامل وبيقدموا أعمال حلوة بدون ما تحس إن هو بيعبر عن رأيه من خلال العمل.
عموما دي مدارس في الإخراج، في مخرجين ومنهم مثلا يوسف شاهين أستاذ خالد يوسف، كانت مدرسته إنه يكتب العمل أو يكون صاحب الفكرة، ولازم يشرف على كل تفصيلة، لأنه بالنسباله ده مكنش مجرد فيلم ولكن ده شيء بيخرج منه وبيعبر عنه وبيتكلم بلسانه.
لما بتشتغل مع مخرج من نوعية خالد يوسف فإنت في شوية حاجات بتكون مضمونة بالنسبالك، وهي إن العمل يتشاف، وإن العمل يكون جدلي، وإنك تقدم لون جديد مقدمتوش قبل، لأنه بيهتم جدا بتفصيلية التمثيل والممثلين وأدائهم، ونقدر نقول إن دي مش متوفرة عند مخرجين كتير.
لكن مع كدة، أداء الممثلين مش لازم يكون كويس بشكل عام لأي حد، لكن لازم يكون مرضي لغرور خالد يوسف نفسه، ويكون مكمل للفكرة اللي في دماغه هو حتى لو مش بتخدم العمل بشكل عام.
لكن فوق ده عنده قدرة على تقديم مشاهد الإغراء وبيقدر يجيب نجمات من كل مكان عشان يقدموا بالطريقة اللي بيحبها، وكمان بيحول نجمات للعب أدوار مكنش ممكن يعملوها، زي مثلا الفنانة داليا إبراهيم، في فيلم كلمني شكرا واللي عملت مشاهد جريئة جدا وكلها إغراء في حين إن هي إصلا كانت بتقدم أدوار هادية ورومانسية، ولكن عملت وحد من أشهر مشاهد الإغراء في السينما مع المخرج خالد يوسف.
قبل «كلمني شكرا» بسنة اتعرض فيلم «دكان شحاتة» واللي كان بوابة هيفاء وهبي للتمثيل وقتها، واتقال إن الفنانة الاستعراضية اللبنانية قدرت إن هي تكون ممثلة لأول مرة مع خالد يوسف، ولكن ده ميمنعش إنه كان في لبس ضيق ودلع وحركات عشان تقدر تلعب الشخصية.
قبلها في فيلم الريس عمر حرب، قدر إنه يعمل مجموعة من المشاهد الجريئة بطلاتها الفنانة غادة عبدالرازق، والفنانة رانيا يوسف، واتنفذت بشكل مبالغ فيه بشكل مش معتادين عليه، ولكن ده خالد يوسف.
مؤخرا ظهرلنا بالدفعة الجديدة من النجمات في مسلسل بيتكلم عن حدث تاريخي ولكن لأنه خالد يوسف، فقدر يوظف الحاجات اللي بيحبها في العمل ده، وهو طبعا مسلسل «سره الباتع» والممثلتين هما التونسية رانيا التومي، والفنانة شمس الكويتية.
من بداية ظهور مشاهد رانيا التومي والجمهور بيستعجب من لبسها وحركاتها وتكوينها وكل حاجة، وإزاي ده موجود في رمضان، لأنها طالعة تعمل إغراء، فكان رد خالد يوسف على الكلام ده إنه دي طبيعة الدور إنها واحدة بتشتغل مع عصابة وجايين يسرقوا آثار، وجزء من دورها الإغراء، وهو كان متعمد يظهر ده.
لكن الناس اتفاجئت كمان بممثلة تاني ظاهر جسمها من غير وشها، وبعد كدة بنعرف إنها شمس الكويتية.
