هل أحمد سعد ليس له حظ مع الستات! الواضح أن قصصه مع السيدات كثيره، حتى أنه كان في فترة ما عند ظهوره في البرامج التلفزيونية يكون محور النقاش عن علاقاته النسائية، تابعونا لنكشف لكم العديد من الأسرار.
أحمد سعد مركز اليومين دول في شغله بس اللي يشوفه من سنتين تلاتة كده يقول سبحان الله الناس بتتغير فعلًا وأحمد سعد شكله عملها وقدر يغيّر من نفسه ويبقى واحد تاني خالص.. لكن مين الشخصية اللي كانت طافحة علينا في الأول دي.. حد كان بيعمل مشاكل مع الستات وبلاويه كتير معاهم.. تخيلوا فنانة تطلع تحلف إنه جوزها وهو يقول لأ محصلش؟.. التانية تطلع تقول ده ضربني ورحت المستشفى وشيلت الطحال والناس تتريق وهو يتهمها إنها لهفت منه الفيلا.. حكايات ملهاش آخر.. بس إن جيتوا للحق الستات في كفة وولاده في كفة تانية.. بيلاقي نفسه معاهم كل ما الطريق يتسد في وشه وأهي الحياة كده يوم ليك وأيام عليك.
هربان من جوازة
العلاقة بين أحمد سعد وريم البارودي قوية وكانت موجودة في حياته وهو متجوز مراته الأولانية اللي ليها منها ولد وبنت.. المهم ريم اتعرفت على أحمد سعد سنة 2011 وهما في مسلسل إحنا الطلبة وبقوا من وقتها أصدقاء ومع الوقت اتحولت الصداقة لقصة حب.. اتخطبوا وفسخوا واتخطبوا وفسخوا لحد ما جه الانفصال النهائي.. ومع آخر مرة انفصال اتفاجئ الجمهور إنهم أصلًا كانوا اتجوزوا.
الجوازة دي محدش شاف فيها فرح ولا غيره وكانت مقتصرة على الأسرتين وخلاص وفي الغالب الاتنين لما لقوا نفسهم بيتخطبوا ويفسخوا راحوا متجوزين وهما 6 أيام عدوا اتطلقوا.
وقتها أحمد سعد قالك محصلش جواز وبعدين ريم البارودي حلفت إنهم اتجوزوا واتطلقوا ولما طلّعت القسيمة راح أحمد سعد معترف وبقت دي الجوازة الوحيدة اللي حاول يهرب منها رغم إنهم بيحبوا بعض وريم كمان كانت بتحبه.
واعترفت إنها لسه بتحبه حتى بعد ما اتجوز تاني وكمان قالت بتعشق صوته وجماله وكمان هو قالها بتعيطي ليه لما أنا اتجوزت تاني مش كنتي تعيطي قدام المأذون وإحنا بنتطلق يمكن كنا رجعنا تاني بس خلاص بقى كل شيء راح لحاله.. لكن إيه علاقة ريم بمرات أحمد سعد الولانية ويا ترى كان بخونها مع ريم ولا إيه؟.
الصداقة تحكم
أحمد سعد لما اتسأل في مرة انت كنت بتخون مراتك مع ريم البارودي؟.. وقتها قال لأ.. مرات أحمد سعد الأولانية امسها لبنى بيومي وليه منها بنت وولد أحمد وجودي.. لكن الحقيقة إن ريم كانت صديقة لأحمد سعد وهو متجوز مراته وعشان كده قال إنه خانها معاها.. وفعلًا ريم كمان قالت محصلش خناقة وكنا صحاب جدًا.. وريم مينفعش يتقال عليها لهفت الراجل من مراته.
أحمد سعد شكله بيحب الرقم 3 وهوب رمى يمين الطلاق على مراته لبنى 3 مرات بردوا وبقت العشرة بينهم مستحيلة خلاص.. بس الجميل بقى إنه محافظ على علاقته الكويسة بولاده وعلطول بيشوفهم ويشوفوه وكمان كانوا موجودين معاه وقت علاقته بريم البارودي واتصوروا سوا والحياة جميلة ولحد دلوقتي لسه مع ولاده وهما الخط الأحمر في حياته واللي بيرجع ليهم كل ما الطريق يتسد في وشه.
الحكاية مع سمية
الفنانة سمية الخشاب بقى مكانش ليها حظ مع أحمد سعد وكلنا قلنا دي جوازة العمر وحتلحق تخلف حتة عيل وأول ما دخلت في علاقة مع أحمد سعد واتجوزوا كان هما يدوب سنة ونص وقالوا كفاية كده.. والمشاكل بدأت هو يعمل أغنية يدسها فيها وهي تعمل أغنية تدسه فيها طلع في البرامج وقال علهيا اللي ميتقالش وهي طلعت فضحته لحد ما الخلافات دي خدت وقتها والموضوع عدى الحمد لله بسلام.. لكن بلاويه لسه سمية فاكراها ومتسيبش فرصة تتريق عليه إلا وتنتهزها.. زي القميص الشبكة اللي كان لابسه من كام يوم في السعودية.
الرابعة تابتة
جوازة أحمد سعد الرابعة بقى كانت من علياء بسيوني مصممة الأزياء وشكلها غيّرته خالص وبقى بني آدم تاني فعلاً ورفع شعار الرابعة تابتة.. تحسه بقى بني آدم ناضج كده وعاقل.. هو نفسه قال مش هدخل في حكايات تاني وعاوز أستقر وأخوه الفنان عمرو سعد دعمه جدًا في الجوازة دي وحس إنه خلاص فعلًا عاوز يستقر بعد بلاوي كتير عملها في حياته بسبب الستات..
وأحمد قال كفاية كل اللي حصل في حياتي من ورا الستات ودلوقتي ما شاء الله خلف منها بنوتة سماها على اسمها (رومانسي الراجل أهو) وكمان دلوقتي مراته حامل تاني وعلى وش ولادة وهيبقى عنده طفل رابع.. طبعًا ده عكس جوازته من سمية الخشّاب اللي كانت فترة وعدت ومخلفش فيها.. لكن علياء اللي التزمت الصمت لما سمية الخشاب اتريقت عليه شكلها عايشة الواقع في حياتها أكتر وكمان ظهورها على السوشال ميديا مبقاش كتير زي الأول.. وأحمد قافل على حياته الشخصية وربنا يسترها عليه هنمسك الخشب ولا إيه؟!.
