مسلسل اتعرض على فنانين كتير و رفضوه، و اللي توافق عليه ميلاقوش حد تاني يشتغل معاهم ، لدرجة انهم حاسوا ان في لعنة موجودة في المسلسل ده، بس أما اتعرض كسر الدنيا بنجاحه لحد النهاردة، حكاية ريا و سكينة، و ليه نادية الجندي رفضته،و ماجدة زكي قفلت تليفونها، وفارق الفيشاوي ليه اعتذر عنه ؟!
حكاية ريا و سكينة، أشهر اتنين في اسكندرية واللي انهوا حياة ستات كتير، و على حسب كتاب رجال ريا وسكينة .. فهما عملوا الجرايم ديه علشان يسرقوا دهبهم، و اتقدمت القصة ديه بكذا شكل .
يعني فيلم و مسرحية و كمان مسلسل، وفي كل مرة بتتقدم بتكون بشكل مختلف، وبتنجح ، ومع إن المسرحية اتقدمت بشكل كوميدي و نجحت جدا مع سهير البابلي و شادية، بس اللي أكل الجو المسلسل.
مسلسل ريا وسكينة اتعرض سنة ٢٠٠٥، و من ساعة عرضه لحد وقتنا ده بيكون نسبة المشاهدة عليه عالية جدا، يعني قرب يكون زي ان أعيش في جلباب أبي، بس اللي محدش يعرفه إن المسلسل ده مكنش هيتعمل أصلا، و صناع العمل شكوا ان في لعنة موجودة فيه .
وده لانه اتعرض على فنانين كتير و رفضوه. بس خلينا نجيبلكوا الحكاية من الأول مصطفى محرم الله يرحمه أما فكر يحول كتاب ” رجال ريا وسكينة ” بمسلسل، رشح الأول نبيلة عبيد و نادية الجندي انهم يقدموه .
وساعتها النفوس مكانتش لسه بقت صافية بين الاتنين ” خناقات زمان كانت لسه مأثرة عليهم ” وانهم يجمعوهم في مسلسل ديه حاجة ممكن تكون معجزة .
بس الغريبة إن نادية الجندي وافقت و قالت هتقدم دور سكينة ” الأخت الصغيرة ” .. و طبعا كده نبيلة عبيد هتبقى هي الكبيرة” ريا”.
و كانوا هيبدأو فجأة نادية الجندي اعتذرت عن المسلسل، و الاسباب اللي اتقالت وقتها إنها مش عاوزة تقدم دور شرير علشان الجمهور ميكرهاش، بس اللي عرفناه بعد كده، انها رفضته علشان وجود نبيلة عبيد. ما احنا قولنا النفوس لسه مكانتش بقت صافية .
وفضل المسلسل الوحيدة اللي موافقة عليه نبيلة عبيد. بس اختارت انها تبقى سكينة و دوروا على حد يعمل دور ريا واترشحت اسامي للدور ده زي ميرفت أمين و فيفي عبده. بس الترشيحات ديه مفضلتش كتير. و اعتذرت نبيلة عبيد عن المسلسل. و بقوا صناع العمل بدل ما بيدورا على فنانة واحدة بقوا اتنين .
بس الحيرة ديه مفضلتش كتير لأن أما عرضوا المسلسل على عبلة كامل وافقت على طول،و عرضوا على ماجدة زكي انها تقدم دور سكينة، قالتلهم هقرا السكريبت الأول .
وفعلا قريته لكن من بعدها مبقتش بترد على التليفونات وده اللي قاله استاذ مصطفى مُحرم ..و بعد كده وافقت سمية الخشاب على تقديم دور سكينة .
و بعد ما استقروا على عبلة كامل و سمية الخشاب، رشحوا فاروق الفيشاوي انه يقدم دور عبد العال، بس بردو مش هاتيجي بسهولة كده .. أصل فاروق الفيشاوي اعتذر، وأيًا كانت الأسباب فضل المسلسل متعطل لحد ما رشحت عبلة كامل الفنان سامي العدل علشان يقدم الدور ، و فعلا وافق عليه .
المهم بردو إن المسلسل مكانتش مشاكله بس في اختيار، و فجأة بقى جمال عبد الحميد هو اللي بيخرجه .
الغريبة إن مسلسل في مشاكل كتير سواء من اختيار فنانين، أو ما بين المؤلف و المخرج، بتبان جدا في المسلسل، ومش بينجح بالشكل المطلوب، إنما ريا و سكينة حصل مع صناع العمل العكس، وديه شطارة منهم كلهم، لانه نجح جدا ،ده الناس ممكن تكون حبتهم،من حبهم في عبلة كامل و سمية الخشاب .
