قصة الجواب الذي وصل لوفاء مكي داخل السجن

لا أحد يعلم إلى أين سنصل قضية الفنانة وفاء مكي، خاصة بعد تصريحاتها الأخيرة وأنها لن تترك حقها. وخاصة بد تصريحات الفنانة ميار الببلاوي وحديثها عن برائتها ثم تغيير كلامها مرة أخرى.

بس المفاجأة اللي قالتها وفاء مكي المرة دي غير كل اللي اتقال قبل كده، وكمان ميار بتقول إن غلطة عمرها إنها فتحت القضية دي أصلًا، خليكوا معانا في الفيديو ده هحكيلكم كل الجديد.

دايرة ومكملة

الفنانة وفاء مكي عارفة تستخدم السوشال ميديا والإعلام الفترة دي صح أوي وبتقول إنها مش هتسكت تاني عن حق ليها وهتفضل تطالب بيه لحد ما تثبته للكل، عشان حياتها اتغيرت واتقلبت بعد القضية دي يعني ولا شغلانة ولا فلوس موجودة والحالة ضنك زي ما بيقولوا.

المهم محدش عارف الموضوع واصل على فين ووفاء أقسمت بالله إنها بريئة وراحت المنوفية ودورت في القضية من تاني وراحت محكمة النقض عشان تدعبس على الأوراق، لدرجة إنها والمحامي اللي معاها واللي بيساعدوها مناموش وبيحفروا في الصخر عشان إثبات برائتها.

هتتنازل عن الحق ده

وكمان وفاء مكي قالت إنها مش هتاخد الموضوع مع ميار الببلاوي بشكل شخصي حتى بعد ما غيرت كلامها هي هتاخد حقها بالقانون، ومش هتسيب حق تاني وإن الشهادة اللي ميار كتمتها هتاخد منها حقها بالقانون، ومش هتعملها حاجة في الآخر بردوا لأنها صديقتها وأم زيها، ومترضاش ليها الضرر.

لكن كلامها ده عشان زعلانة منها عشان لو قالت كلامها ده من 23 سنة كان الموضوع اتغير خالص، طيب إيه بقى المفاجأة بتاعة الجواب اللي عاوزين نتكلم عنه.

حكاية الجواب

في حوار صحفي عملته الفنانة وفاء مكي وقالت فيه مفاجأة جديدة لأول مرة إنها وهي في السجن وصلها جواب من ميار الببلاوي وده كان بعد الحكم عليها في قضية الخادمتين، وإنها ناوية تشهد معاها في قضيتها بس هي بعد كده سافرت وسابت البلد واتفاجئت بعدها إن ميار اتطلقت من جوزها بعد سنتين من القضية.

لأ وكمان الجواب ده مكتوب بخط إيد ميار إنها هتشهد بشهادة الحق بس ده محصلش وطبعًا لو الكلام ده حقيقي فتراجع ميار عن كلامها اللي قالته بخصوص الشهادة هيطلع فاشوش والجواب هيدينها.

غلطة العمر

المشكلة بقى وسط كل ده ميار الببلاوي من حوالي كام يوم اعترفت إن اللي عملته بخصوص براءة وفاء مكي والشهادة والكلام ده كان غلطة عمرها وميار عودتنا كل يومين تلاتة كده تكتب بوست على صفحتها بخصوص قصتها مع وفاء مكي رغم إنها قالت هسكت ومش هتكلم والمحاميين بتوعي هيتكلموا هوب تاني غيرت كلامها وقالت مش هسكت وهرد عليها وعلى اللي يتشددلها كمان.

وفي بوست ليها لقينا فيه تعليق وهي بترد على متابعة قالتلها “إيه اللي خلاكي تتطلعي تتكلمي أصلًا”، فقالت إن دي كانت غلطة عمرها بس اتعلمت منها كتير إن مش أي حد يصعب عليك عشان النفس اللي عندها داء مش هتسيب للخير مكان بس ربنا موجود.

تفتكروا بعد كل اللي بيحصل ده هنشوف وفاء مكي بتاخد حقها وهتطلع مظلومة فعلًا ولا الموضوع كله تريند هياخد وقته ويتوكل على الله ونستنى بقى تريند جديد؟، اكتبولنا في الكومنتات.