اللي عمله وائل مش رجولة وياسمين عبدالعزيز دي مش صاحبتي ولا أعرفها وأنا غلطانة وندمانة إني اتدخلت وسطهم.. هذا ما قالته ريم البارودي بسبب الخناقة التى حدثت بينها وبين وائل عبدالعزيز بسبب ياسمين وزوجها أحمد العوضي.
الناس مستغربة إنها طالعة بعد 4 سنين تقول إنها ندمانة على اللي عملته ولو رجع بيها الزمن مش هتتدخل بين الاخوات.. طيب ليه ريم ندمانة على اللي عملته وليه قالت على ياسمين عبدالعزيز إنها مش صاحبتها ولا تعرفها أصلا وإيه المفاجأة اللي قالتها عن الخناقة إياها؟ وليه شايفة وائل مش راجل؟ كل دي أسرار وكواليس مثيرة هتعرفوا تفاصيلها في الفيديو اللي معايا.
اللي بيتدخل في اللي ميخصوش هيقابل اللي ميرضيهوش.. ده اللي عملته بالظبط ريم البارودي اللي كانت داخلة بعشم في خناقة وائل عبدالعزيز مع أخته ياسمين عبدالعزيز بسبب جوازها من الفنان أحمد العوضي.. بس خلاص هي عرفت غلطتها ومش هتكررها بس المرة دي الكلام كان فيه شوية تحابيش كده وده اللي خلى الجمهور يتكلم على غيرة ستات والحكايات دي.
مش أصحاب
الجمهور مستغرب من كلام ريم البارودي دلوقتي بعد 4 سنين على حكاية خلصت بجوازة وأحمد العوضي طلع راجل وحياته مستقرة والدنيا ماشية.. آه في شوية زعابيب كده مرت بيها الجوازة بس هو قطع الطريق على كل لسان ممكن يتكلم على حياته الشخصية.. بس ريم البارودي شعللت الأمور من تاني وكشفت مفاجأة عن الخناقة اللي دخلتها وهي مكانش ينفع تعمل كده.
ريم ظهرت في مقابلة وقالت ياسمين عبدالعزيز دي ولا صاحبتي ولا أعرفها وأنا غلطانة وندمانة إني اتدخلتلها.. وأنا ولا عمري قابلتها ولا شوفتها أنا اللي خلاني اتدخلت هو الاستفزاز اللي عمله أخوها بس قعدت أقول لنفسي أنا مالي أنا بالكلام ده.. رغم إن كل الناس اتكلمت في الخناقة دي وعملوا الصح مع وائل بس الكل مشافش غير الكومنت بتاعي ودخلوا مسكوا فيا أنا كان مالي ما كنت في حالي بس ده علمني إني متدخلش في مشاكل شخصية تاني.
أصل الحكاية
وحكاية الخناقة دي راجعة لكام سنة فاتوا لما الفنان والمنتج محمد محمود عبدالعزيز عمل لايف بيتكلم فيه عن جوازة ياسمين عبدالعزيز وأحمد العوضي وموقف أخوها وائل من الجوازة وإن هو اللي كشف المستور في اللي حصل وخد الشو كله.. والناس كانت مستغربة إن اللي عمل كده في ياسمين هو أخوها وعشان كده وائل كان بيستقبل ألفاظ من كل الناس اللي مش عاجبها موقفه.
وناس تانية شافت الموضوع غيرة على أخته بس الأمور الشخصية دي بتتحل ما بينهم وبين بعض مش على السوشال ميديا يعني.. المهم ريم وقتها كانت اتدخلت في المشكلة وقالت في تعليق إن اللي بيعمله وائل ده عبث وقلة رجولة.. الناس وقتها سابت كل التعليقات ومسكت في اللي قالته ريم البارودي.. ومن وقتها وائل كان مستنيها تقع في مشكلة عشان يشمت فيها وده اللي حصل لما ريم كانت بتقدم برنامج مشترك مع مذيعات واتحولت للتحقيق بسبب استكمال إجراءات، لكن وائل اعتذر لريم بعدها وكمان كان مستاء من الألفاظ اللي سمعتها من الناس بسببه.
جوازة ياسمين والعوضي
سنة 2019 وبعد ما المشكلة كبرت والناس على السوشال ميديا اتكلمت اتصرف أحمد العوضي وقطع الطريق على الكل وأعلن عن حبه لياسمين عبدالعزيز والاتنين اتجوزوا.. ومن وقتها وائل عبدالعزيز سكت والموضوع اتقفل ضبة ومفتاح.. الغريبة إن ريم البارودي مش بتتعلم من غلطاتها وكانت اتدخلت في مشكلة الفنانة مي سليم وطليقها الفنان وليد فواز وقت المشكلة اللي حصلت بينهم وقلت مش هتدخل في حياة حد وبردوا اتدخلت.
تفتكروا ريم البارودي اتعلمت فعلاً تسكت امتى وتتكلم امتى ولا هتقع في غلطات تانية وترجع تندم عليها؟.. اكتبولنا آرائكم في التعليقات.
