بطلة حكايتنا في هذا التقرير فنانة جميلة جدًا شاركت في أفلام ومسلسلات كثيرة لدرجة إن من كثرة شغلها، كانت لا ترى زوجها وأبنائها إلا كل أسبوع.
لكن خدت قرار كان نادر جدًا حد ياخده وقتها واعتزلت التمثيل رغم إنها مذيعة ناجحة جدًا كمان وقدمت أكتر من برنامج، الفنانة دي كانت بطلة في فيلم الحفيد وأختها فنانة ومذيعة مشهورة جدًا برضه ومثلت مع عادل إمام، مين الفنانة دي وحكايتها إيه مع التمثيل ولبس الحجاب ومين أختها؟، خليكوا معانا هنقولكم على التفاصيل.
حكايتها مع الفن
الفنانة اللي هنتكلم عنها بدأت مذيعة وقدمت برنامج “فن الباليه” في التليفزيون المصري وده كان في التمانينات وبعدها دخلت عالم التمثيل وشاركت في أعمال كتير كان أهمها في فيلم الحفيد مع ميرفت أمين، ودورها في أولاد آدم مع أحمد مرعي وعبدالمنعم إبراهيم، ورغم إنها حققت نجاح كبير بس بعدت عن الأضواء بعد ما اعتزلت ولبست الحجاب واكتفت بحياتها الخاصة من غير ما تدخل في تفاصيل وحكايات لحد ما فاجئت ناس كتير بالظهور والكلام عن أسباب ابتعادها ده وإنها عادي ممكن ترجع للفن تاني.
بطلة حكايتنا
بطلة حكايتنا تبقى الفنانة منى جبر بنت اللوا عبد الفتاح جبر، وحصلت على ماجستير الآداب ومن أهم برامجها “اثنين على الهوا” وتولت إدارة قنوات أطفال عربية، وكانت مرات فنان الباليه عبد المنعم كامل وانفصلت عنه وبعدا اتجوزت المخرج هاني لاشين.
حكايتها مع الاعتزال
وعن حكايتها مع اعتزال التمثيل قالت إن وقت ما قررت تعمل كده مكانش الموضوع شو ولا حاجة ده كان اعتزال نهائي ومفيش حاجة معينة حصلت فاضطرت تاخد القرار ده لأ دي أسباب خاصة بيها هي وهي كانت بتأهل نفسها إن هيكون في وقت معين هتقول أنا كفاية عليا كده ونقطة بقى ومن أول السطر.
وأكدت إن يمكن ظروفها النفسية والصحية والاجتماعية وإنها مبقتش قادرة تعمل مجهود في الشغل زي الأول مع الضغوطات وابتعادها عن ولادها ودي أسباب معلنة، بس في أسباب كمان غير معلنة زي إنها لقيت ولادها بيكبروا وهي مش معاهم ولا بتستمتع بوجودهم لدرجة إنها أوقات كانت تاخد ابنها الكبير التصوير عشان ممكن تقعد أسبوع متشوفهوش وابنها كان يروحلها على السرير يبوسها وهي نايمة عشان مكانش بيشوفها تيجي تلاقيه نايم والعكس.
لبسها الحجاب
ومن ناحية الحجاب قالت إنها لما اعتزلت محصلش أذى لحد يعني ولا مرتبطة بعمل فني ولا غيره يعني ولا إنتاج هيخسر ولا أي حكاية من اللي ممكن نسمعها وهي كانت مقررة متشتغلش في رمضان عشان العبادة وقبل ما يجي عليها رمضان في سنة من السنين قررت تلبس الحجاب عشان هيبة الشهر وتدخله وهي معتزلة الفن ولابسة الحجاب وصايمة.
والبعض وقتها اتخيل إن فترة الشهر وهتعدي وبدأت الأسئلة ليه مخلعتش الحجاب وهي فين من التمثيل لحد ما الكل اتفاجئ إن ده قرار نهائي ومش هترجع فيه وهتعيش حياتها لبيتها وولادها وربنا، وبتقول وقتها مفكرتش في أي عواقب، أنا كنت عارفة محدش هيسمح لي أظهر على الشاشة مرة تانية بس خلاص كنت قررت ونفذت واللي عملته هو الصح.
أختها مثلت مع عادل إمام
وقلنا إن منى جبر هي أخت الفنانة ناهد جبر ودي بقى لعبت دور البطولة قدام الفنان عادل إمام في مسرحيته اللي أشهر من النار على العلم شاهد ما شافش حاجة.
