تباين كبير في الآراء حصل على مواقع التواصل الاجتماعي من وقت الإعلان عن عودة ستار أكاديمي تاني بعد توقف 6 سنين، رغم ان البرنامج كان محبوبوكان ينتظره العديد لمعرفة اخبار الطلاب إلا أنه به العديد من السلبيات التي كشف عنها الفنانيين الذي كان هذا المكان سبب شهرتهم.
البرايم، النومنيه،هيلدا خليفة،الأكاديمية، كلام كتير من ده كنا مفتقدينه جدا في الكام سنة اللي فاتوا.. كل اللي متابعين ستار أكاديمي كانوا بيحبوا يشوفوا المذيعة اللبنانية هيلدا خليفة وهي بتقدم الطلاب ولجنة التحكيم والضيوف كل أسبوع على المسرح.. عشان يغنوا ويرقصوا ويمثلوا ويخرج واحد من النومنيه ويرجع بلده عشان مقدرش يكمل في المسابقة
برنامج ستار أكاديمي خرج لنا فنانين كتير معروفين ومنهم نجوم مشاهير النهارده زي محمد عطيه وجوزيف عطيه وميريهان حسين ونسمة محجوب ومحمد شاهين ومحمد قماح ورنا سماحة.. وغيرهم من الناس اللي طلعت وخدت حقها .. وفيهم اللي اتظلم ومخدش السوكسيه اللي مستنيه، فا بقى معترض عليه النهارده وبيندم على التجربة دي
على قد ما تجربة ستار أكاديمي كانت ممتعة، إلا إن كان فيها اختراق كبير للخصوصية، قناة كاملة شغالة ليل ونهار بتعرض اللي بتصوره الكاميرات في كل ركن في الأكاديمية.. أوض نوم البنات والولاد كانت بتتصور، أماكن الأكل، الاستوديوهات وأماكن البروفات القعدات والسهرات والكلام وقصص الحب اللي كانت مكشوفة كده عيني عينك
جوه الأكاديمية كان الطلاب شايفين إن دي فرصة متتعوضش.. ايه يعني حياتنا تبقى مكشوفة للناس.. ده جزء من التجربة..لكن براها وبعد ما عدى سنين في ناس ندمت وقالت إنهم مكانوش مرتاحين وهما بيتصوروا في كل دقيقة وكل لحظة كده
أبرز الفنانين دول كانت زيزي عادل اللي اعتزلت الفن كله من باب مؤخرا.. وطلعت من كام يوم تقول إن لو رجع بيها الزمن مش هتشترك في ستار أكاديمي، ووصفته بإنه برنامج لا يتناسب مع العادات والتقاليد الشرقية.
ناس كتير كانت فاكرة إن الحمامات مكنش فيها كاميرات.. وإنها المكان الوحيد اللي كان أمان خصوصا بالنسبة للبنات عشان يتحركوا فيه براحتهم، لكن زيزي عادل قالت إنه حتى الحمامات كان فيها كاميرات، طب ده ينفع.
اللي احنا نعرفه إن في فنانين زي ميريهان حسين مبيحبوش يتكلموا عن ستار أكاديمي.. واللي حصلهم فيه.. وفيه فنانات يتمنوا يمسحوا كل ذكرياتهم هناك وشكلهم اللي كان غريب.. زي بسمة بوسيل مرات تامر حسني اللي عمليات التجميل غيرتها كتير عن زمان.. وسابت الغناء عشان تقعد في البيت تربي العيال.. وبدل الفن فتحت لنفسها مجال جديد في تصميم الأزياء وخطوط الموضة والماكياج عشان يعوضها نجم الجيل عن إنها سابت شغفها الأول
يمكن يكون ستار أكاديمي كان فرصة مستنيها ناس كتير من الشباب عشان يحققوا الشهرة اللي كانوا مستنينها.. لكنه أيضا بيكلفهم كتير من خصوصيتهم وبياخد من حياتهم شهور.. وأحيانا بعد ما الهيصة بتخلص معظمهم بيقعد في البيت ومحدش بيفتكره.
