كل فترة بنسمع عن فنان شاب توفى او حاله مرض صعب ، مثل ما حدث لمصطفى درويش الله يرحمه ومات فجأة من شهر، ومنذ أيام صدمنا بخبر اصابة الفنان احمد ابراهيم بشلل نصفي بعد الجلطة التي أصيب بها.
الموضوع مرعب وصعب ، يكون انسان في عز شبابه وفجأة يتصاب بمرض صعب ، ويكمل بقية حياته يحاول يتعالج ،، ونجوم كتير اتعرضوا للموقف ده منهم اللي اتعالج وخف ومنهم اللي حياته انتهت بسبب مرضه
طب ايه اللي حصل لاحمد ابراهيم ؟
الفنان احمد اللي كان بطل من ابطال مسلسل سلسال الدم ، من كام اسبوع اتعرض لجلطة في المخ واتنقل المستشفى ومن وقتها بيتم علاجه عشان حالته تتحسن ، لكن للأسف الموضوع بقى اسوأ ، وحالته بقت صعبة وجاله شلل نصفي ، وللأسف هيضطر يقعد على كرسي متحرك ويستمر في العلاج.
احمد ابراهيم اتصاب السنة اللي فاتت بجلطة في الساق ، ومن وقتها وهو حالته بتدهور ، وقال وقتها انه حصله مشاكل شخصية في حياته زعلته واحزنته كتير وده كان سبب انه يحصله جلطة في رجله ، وقال بالنص :” زعلت وجالي جلطة”.
ومن جلطة للتانية وزعل مع قهرة ، اتصاب احمد ابراهيم بشلل نصفي وكل ده بسبب الضغوط والحزن اللي عاش فيه فترة طويلة واثر على حياته بالشكل.
نجوم تانيين كتير كان عندهم معاناة مع المرض ،منهم النجم احمد حلمي تخيل ؟يمكن ناس كتير متعرفش القصة دي، بس احمد حلمي جاله كانسر ، واكتشف انه عنده ورم في ضهره سنة 2014، ووقتها كان في امريكا مع منى في رحلة علاج، واكتشف ده هناك بالصدفة ، لكنه خبى الموضوع عن جمهوره ومقالش حتى انه تعبان ، وفضل يتعالج وعمل عملية عشان يشيل الورم ده وكمل رحلة العلاج ، وبعد ما خف واطمن على نفسه ، قال انه كان تعبان وخف.
كريم عبد العزيز كمان عاش فترة صعبة في حياته في سنة 2011 ، واكتشف انه عنده 12 جلطة في الرئة بسبب التدخين لأنه كان بيشرب سجاير كتير بشكل مش معقول في اليوم ،، وعرف الموضوع بالصدفة ، وقتها كان في انجلترا مع والدته بتتعالج ، وهو حس بوجع في صدره وكشف وعمل اشعة ، وبعدها المستشفى استدعته عشان يلحقوه ، واول ما دخل الدكاترة قالتله انت ازاي واقف على رجلك ؟ انت هتموت ” .. واتحجز 60 يوم في الرعاية.
صراحة الدكتورة صدمته وخليته مقدرش يكمل معاها علاج واتقفل منها ، وكتب على نفسه تعهد وخرج من المستشفى وكمل علاج مع دكتور تاني لحد ما حالته اتحسنت ، وبعد ما خف حكى القصة دي بنفسه في كذا لقاء تلفزيوني
النجمة ياسمين عبد العزيز كمان اتعرضت لازمة صحية كبيرة السنة اللي فاتت وفضلت تتعالج في المستشفى 3 شهور، وكانت مشكلتها انها عندها حاجة اسمها اكياس الشيكولاتة وده مرض بيجي للستات في الرحم ، واسمه بطانة الرحم المهاجرة ، لكنه ممكن يعمل مشاكل كتير في المعدة.
والمشكلة دي عملت لياسمين عبد العزيز مضاعفات خطيرة وفضلت تدخل كل شوية تعمل عملية في معدتها وفي وسط كل ده حصلها كمان خطأ طبي وحالتها باظت خالص لدرجة انهم كانوا بيجهزوا المقبرة عشان لو حصلها حاجة لاقدر الله ، لكن بفضل ربنا ودعوات جمهورها ، حالتها اتحسنت بعد شهور لكنها مستمرة في متابعة حالتها الصحية باستمرار.
الاعلامية بسمة وهبة كمان لسة عايشة حالة صعبة بسبب مرضها ،، هي في الاول جالها كانسر وفضلت تتعالج منه ، وبعد كدا فجأة قالت انها عندها مرض نادر مش مصاب بيه اي حد في مصر وانها لازم تتعالج برا ، وفضلت تسافر كل شوية من بلد لبلد ، واستئصلت الرحم ، وكمان استئصلت جزء من المعدة وعشان كدا شكلها خس واتغيرت في الفترة الاخيرة ، لكن محدش يعرف تحديدا ايه هو مرضها النادر ده.
الفنان مصطفى درويش اللي مات يوم 1 مايو ، مكنش بيعاني من اي مشكلة صحية ، وليلتها مكنش عارف ينام وعنده أرق ، وفجأة حصلتله أزمة قلبية ، وعلى ماخدوه المستشفى كان اتوفى وكانت صدمة لكل جمهوره .. الله يرحمه.
