ليلة ولا في الاحلام عاشتها الفنانة الجميلة ميرنا نور الدين احدث عروسة في الوسط الفني، والتي احتفلت ليلة امس بفرحها على المدرب عمر عطية وفرحهم كان حديث السوشيال ميديا.
الفرح اتعمل في مكان في اكتوبر ، وحضره عدد كبير جدا من نجوم الوسط الفني اللي عزمتهم ميرنا وجمعها بيهم ادوار كتير في مسلسلات وافلام ، وكمان نجوم تانيين مشتغلتش معاهم لكن علاقتها بيهم كويسة.
وحضر فرح ميرنا وعمر ، دياب ومراته هاجر ، واحمد زاهر ، وكمان محمد ثروت ، وفريال يوسف ، وكمان انجي علاء زوجة يوسف الشريف ، ونجوم مسحر مصر علي ربيع واوس اوس وكريم عفيفي ، وكمان حضر المخرج خالد جلال ، وهاجر الشرنوبي ولقاء سويدان.
كمان شوفنا عمنا صلاح عبدالله وهو بيرقص مع العروسة ميرنا ، لكنه ظهر عليه التعب وكان مسنده الفنان دياب لحد ما وصله لعند العروسة ورقص معاها واتلم حوليه النجوم يسلموا عليه ويتصوروا معاه
اما مفاجئة الفرح بقى كانت بسمة بوسيل ، واللي طلعت صاحبة ميرنا ، وقررت تحضر الفرح وتكسر الدنيا وخطفت الانظار ليها ، عشان هي لسة سايبة تامر طازة وقصتهم شاغلة ناس كتير.
لكن بسمة مكنتش ضيفة عادية في فرح ميرنا، لا دي غنت ورقصت وولعت الفرح ، وطلعت وقفت مع ميرنا وعمر وغنت اغنية ” انا بدي اطير” .. اللي غنتها من كام يوم بصوتها وحصلها مشكلة بسببها لكنها تجاهلت القصة دي وغنتها تاني في الفرح وكل الناس اتفاعلت معاها
وظهر العريس عمر عطية مدرب اللياقة البدنية في اول الفرح وهو بيرقص على اغنية خلينا نتبسط لعمرو دياب وكان في منتهى السعادة وعمال يرقص ويتنطط وصحابه طلعوا رقصوا معاه
وواضح حب عمر عطية لحبيبته ميرنا ، وظهر طول الفرح وهو ماسك ايدها وبيبوسها وبيحضنها وفرحان بيها وبليلتهم
كمان فستان العروسة ميرنا كان شيك وبسيط ولايق عليها وصورها بالفستان لفت السوشيال ميديا كلها من امبارح
.
الليلة كلها كانت حلوة والكل كان فرحان ومبسوطين بميرنا العروسة ، اللي محدش كان يعرف اصلا انها مرتبطة لكنها فجأة وبدون اي مقدمات اعلنت انها هتتجوز ، دي حتى مقالتش انها اتخطبت.
وفي اسبوع واحد كتبت الكتاب من يومين ، ونزلت اول صورة ليها مع حبيبها عمر عطية على انستجرام وكتبت : الحمدلله كتبنا الكتاب ، وبعد كام يوم عملوا الفرح امبارح الجمعة وعزمت اصحابها من الوسط الفني مع الاهل والقرايب والصحاب ، ودي كانت مفاجآة كبيرة لجمهورها ومحدش كان عارف انها بتحب ولا مرتبطة.
كمان كانت المفاجاة ان عريسها عمر عطية صاحب الحيم اللي هي بتروحه وكمان هو مصري ومعاه الجنسية الامريكية ، وكانت دايما ميرنا بتروح الجيم وبتحب الرياضة وبتنشر صور وفيديوهات كتير ليها وهي في الجيم لكن الموضوع قلب معاها بقصة حب مع المدرب وصاحب المكان ودارت على شمعتها لحد ما اتجوزوا.
ميرنا قررت تتجوز من خارج الوسط الفني رغم انها طلع عليها اشاعة انها هتتجوز احمد عز بعد مسلسل الاختيار ، والقصة دي هي محبتش تتكلم عنها خالص ومدتش الموضوع اهمية ، لانه كان دور رومانسي معاه في مسلسل ومش مستاهل كل الضجة دي ، لكن الجمهور دايما بيحب يعمل قصص ويصدقها ، واكتفت بس بالتعليق على شغلها مع عز وقالت انها كانت تجربة حلوة ودي المرة التانية اللش اشتغلت معاه.
كمان طلع عليها اشاعة تانية انها هتتجوز ثري عربي ، لكن هي تجاهلت الموضوع برضه وهي مش متعودة ترد على كل حاجة بتتقال ، وملهاش في جو التريندات ده ، حتى مشوفنهاش عملت مشكلة مع حد من ساعة مابدأت تمثل من كام سنة
وخلال الفترة اللي فاتت كانت ميرنا بتروح الجيم كتير وتنشر صور وستوريهات وحركات ، لكن اتاري القصة مش بس رياضة لا ده حب كمان .. حب في الجيم وقلب بجوازة.
ويوم الاتنين اللي فات عملوا كتب الكتاب على الضيق ومحدش حضره غير اهلها واصحابها القريبين ، ومكنش في اي نجوم من الوسط، واكتفت انها تعمل كتب الكتاب في البيت وتعزم النجوم بقى في الليلة الكبيرة.
