شيرين عبد الوهات صاحب الصوت المميز، الذي ظهر من صغرها وهي طفلة فهي تتمتع بحنجرة قوية وصوت ممتع ولها نغمة مميزة، شيرين لم تحقق الشهرة بالصدفة ولكنها تعبت وكان لها حكايات كثيرة سنكشفها من خلال التقرير التالي:
يمكن فنانين كتير مقدروش يقدروا موهبتهم، ووقعوا في فخ التصريحات اللي مش محسوبة، وده خلاهم يهدوا كل اللي بنوه فنيا وأثر عليهم بشكل كبير، والوسط الفني مليان حكايات كتير، وده مش من نجوم دلوقتي بس، لكن من زمان موجود، ولو قلبنا في الدفاتر القديمة بنلاقي قصص غريبة لفنانين حبناهم.
الفنانة شيرين عبدالوهاب صوتها عظيم، ومن أهم المواهب المصرية، وكل أغنية ليها بتكون حلوة من غير مجهود، لكن قصاد ده طول الوقت بيكون حواليا هالة من المشاكل، وتقريبا كدة شيرين مع الأيام نسيت إن رحلة النجاح اللي عملتها دي حفرت بالصخر عشان توصلها ومكنتش سهلة يعني.
شيرين عبد الوهاب اتوُلدت في حي القلعة، يوم 8 أكتوبر 1980، واسمها بالكامل شيرين سيد محمد عبد الوهاب، قصتها بدأت بدري، من أيام ما كانت في المدرسة، اكتشفها المدرس بتاعها وخلا والداتها توديها للمايسترو سليم سحاب، وعجبه صوتها وانضمت لكورال دار الأوبرا.
ظهرت شيرين وهي صغيرة جدا بتغني، وكان صوتها حلو وقوي زي ما هو دلوقتي، وباردو كانت بتغني بكل مشاعرها وإحساسا عالي زي عادتها، والظاهر إن شيرين عندها فرط في المشاعر للدرجة اللي بتعملها مشاكل.
أول أغنية لشيرين عبدالوهاب كانت مع الفنان محمد محيي واسمها «بحبك» سنة 2000، ولكن بداية مشوارها الفني فعلا سنة 2002 بأغنية «آه يا ليل»، وتخيلوا إن شيرين من أول أغنية وهي مشهورة، دي حاجة مبتحصلش كتير، والأغنية دي كانت من ألبوم فري ميكس 3 مع الشاب الصاعد وقتها تامر حسني، وباعوا 20 مليون نسخة من الألبوم ده.
بعدها دخلت التمثيل ولعبت دور مع أحمد حلمي في فيلم «ميدو مشاكل»، وانطلقت بقى في مسيرتها الفنية اللي كلنا عارفينها.
شيرين ليها فيديو قديم لما كانت لسة في بداياتها، وهي بتغني، وتم تقديمها في الحفلة باسم سمراء الجمل، وده على اسم الموسيقار اللي كانت بتشتغل معاه وكان اسمه أحمد الجمل، وده كان في حفلة خطوبة، وظهرت شيرين وهي بتغني أغنية النجمة فايزة أحمد «تهجرني بحكاية» وكانت منسجمة كعادتها، والعريس والعروسة بيلبسوا بعض الدبل.
دارت الأيام وشيرين كبرت ولكن مقدرتش رحلتها المميزة كفنانة، وإنها واحدة من أهم أصوات مصر، اتجوزت مرتين وانفصلت، وبعدها اتجوزت تالت مرة من الفنان حسام حبيب، وحصلت المشاكل الكتير اللي كلنا بقينا بنشوفها واحنا مستغربين، وبعدها دخلت مصحة تتعالج، وخرجت رجعت لحسام تاني، وظهرت بتشرب سجاير وبتعمل تصرفات مش مناسبة لحجم نجوميتها.
بنقول لشيرين إحنا بنحبك، خليكي عارفة إنك شيرين عبدالوهاب.
