من مشاهد صغيرة في فيلم كوميدي جميل، أحببناها ولا يستطيع أحد أن ينساها، ليست مصرية، ولكن مثلت دور في فيلم شهير وهي تتكلم العربية، إنها لي بطلة فيلم فول الصين العظيم فكيف أصبح شكلها الآن؟
من 19 سنة ظهر فيلم كوميدي قلب الدنيا، والفيلم ده هو «فول الصين العظيم» كنا بنتفرج عليه وبنموت من الضحك على كمية الكوميديا اللي فيه، والصراحة النجم محمد هنيدي، وكمان كل الشخصيات اللي في الفيلم كانوا عاملين أدوارهم بطريقة حلوة.
فيلم «فول الصين العظيم» من إخراج وتأليف شريف عرفة، وسيناريو وحوار أحمد عبدالله، وشارك في بطولته عدد كبير من النجوم زي محمد هنيدي، سامي سرحان، وحجاج عبدالعظيم، وسليمان عيد، وسهير الباروني، وسعيد طرابيك، إلى جانب بقى مجموعة من النجوم الأجانب ومنهم بطلة حكايتنا كامالا كامبو نا أيودا.
الفيلم بيدو حوالين شاب اسمه محيي الشرقاوي واللي لعب دوره الفنان محمد هنيدي، واللي أسرته كلها بتمارس الإجرام، ولكن هو مكنش واكل معاه الجو ده، لأنه جبان ومش نافع، المهم قرر يهرب من جده جابر الشرقاوي اللي كان بيلعب دوره النجم سامي سرحان.
المهم محيي الشرقاوي، بمعاونة زوج والدته «فاروق» واللي لعبه الفنان سعيد طرابيك، سفره برة مصر، وتحديدا للصين، عشان يكون ممثل مصر في مسابقة عالمية للطبخ، ومن هنا بتبدأ مشاكل تاني بتقابل محيي الشرقاوي مع الإجرام باردو، وبيتحط في مواقف صعبة جدا عليه.
المترجمة بتاعة محيي الشرقاوي، كانت بنت في الفيلم اسمها «لي» وهي الفنانة التايلاندية كامالا كامبو نا أيودا، واللي بنتكلم عنها دلوقتي، وقدرت تقدم مشاهد مميزة، ونالت استحسان الجمهور، وبالذات لما كانت بتنطق اسمه وتقوله يا «موهي»، ولما تيجي تقوله «مالناش دعوة يا موهي»، والحقيقة الجمل دي لحد انهاردة بنستخدمها على سبيل الهزار كدة واحنا نبتكلم مع بعض.
كامالا كامبو، هي فنانة تايلاندية، مش معروف عمرها بالظبط، لكن هي عندها 3 أبناء، بنتين وولد، والبنت الكبيرة حاليا بتشتغل في مجال عروض الأزياء، ومتجوزة من مايكل بولاك، وهو ملامحة مش تايلاندية، ولكن ملامحة بتميل للأوروبية، لكن مفيش معلومات عنه بالظبط.
كامالا حاليا بتدير صالون تجميل، وكمان هي بتشارك في الأنشطة العامة، ومهتمة بالرياضة بشكل كبير، وبتتمتع برشاقة عالية جدا، وفوق كل ده بتحب رقص الصلصة.
حسب موقع imdb المتخصص في الأفلام، فهي شاركت بس في فيلم تاني سنة 2008 وهو رعب كوميدي وتايلاندي الجنسية.
من خلال حسابها على إنستجرام بتشارك كامالا صورها مع أصدقائها وأسرتها، ومن الواضح إنه بعد مرور 19 سنة على عرض فيلم فول الصين العظيم، فهي صغيرة والزمن مجاش عليها، ولا يبان عليها إن عندها 3 أبناء ماشاء الله، يلا في الاخر نقول «مالناش دعوة يا موهي».
