ضربة حظ كانت سبب في ان جورجينا تصل للشهرة التى تعيش فيها الآن، بعد ماكانت مجرد فتاة عادية ولديها مشاكل مع اسرتها ، فجأة عملت اسم من الهوا بعد ماظهرت اول مرة مع كريستيانو رونالدو ، والآن نراها على السجادة الحمراء في مهرجان كان ، ولا نجمات السينما .
تعالى نرجع بالزمن لورا 7 سنين ونفتكر حياة جورجينا قبل ماتعرف كريستيانو،، كانت بنت عادية جداً ووالدها كان متورط في بيع الممنوعات واتقبض عليه واتسجن في الأرجنتين ، وبعدها والدتها سافرت روما ، وهنا اضطرت جورجينا تبقى سترونج اندبندنت وومن وتعتمد على نفسها وتبدأ تشوف حياتها لوحدها بدون اب وام.
دورت جورجينا على شغل واشتغلت في المبيعات في فرع من فروع جوتشي سنة 2016 ، وبالصدفة البحتة قابلت كريستيانو في المحل ده ، ولفتت نظره.
بعدها بالصدفة اتقابلوا في مكان تاني وطبعا فضل فاكرها وعرفها ، وقرروا يتكلموا ويتعرفوا على بعض بعيد عن مكان شغلها ، وفعلا بدأوا يتقابلوا ومن هنا نقدر نقول ان جورجينا جاتلها الفرصة على طبق من ذهب.
اشهر لاعب كرة قدم في العالم واغناهم معجب بيها وبياقبلها ، كان من الطبيعي انها تمسك في الفرصة بايديها وسنانها ، وتبذل كل جهدها عشان تخليه يتعلق بيها ويحبها وتبقى هي صديقة كريستيانو الجديدة وصورها واخبارها تملى الصحف والمجلات.
الخطة نجحت فعلا وبعد سنة من تعارفهم على بعض ظهرت جورجينا لأول مرة مع كريستيانو سنة 2017 لما ظهرت معاه في الحفلة اللي خد فيها الكرة الذهبية.
كريستيانو كان نجم الحفلة واهم لاعب في العالم وقتها وطبيعي ان الاضواء تتسلط على صديقته الجديدة اللي متشيكة ولابسة احلى فستان وجاية معاه، ومن هنا دخلت جورجينا عالم الشهرة واسمها بقى مرتبط بكريستيانو في كل الاخبار وكل حاجة بتحصل في حياته.
وكملت جورجينا على هذا المنوال بقى وقدرت تحقق اللي هي عايزاه ، وعاشت معاه في بيته وعملوا اسرة لكن لحد دلوقتي من غير زواج ، ودي حاجة عادية عندهم.
وفي اخر سنة 2017 كانت جورجينا مخلفة من كريستيانو اول طفلة منه والسنة اللي فاتت خلفت طفلة تاني ، رغم انه كان عنده 3 ولاد اصلا من ستات تانيين ، لكن كلهم عايشين مع بعض وجورجينا مش ممانعة انهم تربيهم وتاخد بالها منهم مع بنتها ، ماهي مش دافعة حاجة بقى وعندهم مربية وخدم وحشم.
وفضلت جورجينا ملازمة كريستيانو وبدأت تعمل حاجة لنفسها ، تستغل بقى الفرصة ويكون عندها شغل خاص بيها على حس ابننا كريسيتانو ، فعملت خط انتاج ازياء خاص بيها ، وكمان مسكت مركز زراعة الشعر اللي فتحه كريستيانو في مدريد ، وكمان بقت واجهة اعلانية لاكبر واهم البراندات في العالم وبيتنافسوا عليها عشان تشتغل معاهم وتعملهم حملة دعائية.
ذكاء الانثى كان واضح في رحلة جورجينا مع كريستاينو، وعرفت تاخد كل حاجة ،، قلبه وحبه واهتمامه ، وكمان دعمه وفلوس والشهرة ،، كان هو السبب الرئيسي في شهرتها بالشكل ده بعد ممكنش حد يعرفها من الاساس.
وفي سنة 2019 طلعت اشاعة بتقول ان جورجينا وكريستيانو عملوا فرح صغير في المغرب واتجوزا رسمي بعد العلاقة اللي بينهم ، لكن طلعت اشاعة ونفتها جورجينا.
الغريبة انها دايما بتقول جملة كدا مش لايقة عليها ، قالتلك ان الثروة والرفاهية مش مهمة بالنسبالها … اه فعلا هي قالت كدا بس طبعا بتكدب واحنا مش هنقول انها بتكدب .
جورجينا اتكلمت عن علاقتها بكريستيانو وقالت اننا حبينا بعض من اول نظرة ، وانه مش سهل اكون شريكة شخص مشهور زيه ، لكن مستحيل استبدله بالعااااالم كله .. رومانسية اوي بصراحة.
كريستيانو كمان واضح انه مبسوط معاها وبيتعامل على انها مراته مش صاحبته ، ودايما بينشر صور عائلية ليه مع ولاده ومعاها.
وطبعا سافرت معاه السعودية بعد ما انضم لنادي النصر، وانهاردة سافرت جورجينا فرنسا عشان تشارك في فعاليات مهرجان كان السينمائي اللي بيتعمل كل سنة ونشرت صور ليها على انستجرام وهي في المطار والطيارة،
هي متعودة تشارك جمهورها يوميا تفاصيل حياتها، وطبعا الدنيا اتقلبت اول مادخلت على السجادة الحمرا بالفستان الدهبي وكل الكاميرات اتوجهت عليها
كلنا مستنين نشوف اطلالات وفساتين جورجينا وجمالها في مهرجان كان الأيام الجاية.
