تميزت بلطافتها وخفة دمها، واشتهرت جدا واختفت مرة واحدة، بداية ما عرفت وحبها الناس كان فيلم «العفاريت» لكن الحقيقة هي أنها قدمت أعمال قبله وبعده، لكن هذا الفيلم بالتحديد جعل الصحافة تكتب عنها «طفلة جديدة تعيد للسينما أمجاد فيروز».. من هي مين؟ تابعونا لتعرفوا من خلال هذا التقرير:
الطفلة «بلية» في فيلم العفاريت اللي كلنا حبيناها وقولنا دي ليها مستقبل كبير، وكتب عنها مدحت أبو بكر خبر بيقول فيه إنها هتعيد امجاد فيروز، وقال في المتن كدة «لم نصفق بإعجاب ولم نتوقف مندهشين أمام طفلة تمتلك إمكانات الحصول على إعجابنا بخفة ظلها وحضورها وقدراتها على الأداء منذ غياب الطفلة الأسطورة فيروز.. وتأتي الطفلة هديل خير الله لتعيد الأمل في وجود طفلة ممثلة قادرة على استقطاب دهشتنا»
مين هي هديل خيرالله وشكلها بقى ايه بعد ما كبرت وعايشة ازاي وبتعمل ايه؟ ده اللي هنتكلم عليه
سنة 1990 ظهر فيلم العفاريت بطولة عمرو دياب ومديحة كامل، كان معاهم هديل خير الله، اللي لعبت دور الطفلة «بلية»، وخطفت الأنظار الجميع، بلباقتها وخفة دمها، وقدرتها على إنها تلعب دور الطفلة اللي خطفتها عصابة واشتغالها في النشل.
اللي ناس كتير متعرفوش إن هديل شاركت في أعمال كتير قبل فيلم «العفاريت»، منها مسرحية «عيب يا محترم» من بطولة عبد المنعم مدبولي ومحمود الجندي ومحمد هنيدي ولمياء الجداوي ومن إخراج أحمد البدري وتأليف طارق الإبياري.
وكمان مسلسل «أبرياء في المصيدة» اللي شارك في بطولته أحمد بدير وسامي العدل وتيسير فهمي ورجاء الجداوي وأحمد راتب، ومن تأليف حسن المملوك وإخراج أحمد السبعاوي.
ومسلسل مسلسل «حكم الزمن» اللي شارك في بطولته فايزة كمال ويوسف شعبان ومحمد عبد الجواد ومن تأليف مدحت يوسف وإخراج يوسف شرف الدين.
إلى جانب مسلسل «ليالي الحلمية» واللي ظهرت في الجزء التاني منه، وقدمت دور «قمر السماحي» وهي طفلة، وهو من إنتاج عام 1989، وشارك في بطولته يحيى الفخراني وصلاح السعدني وممدوح عبد العليم وصفية العمري وآثار الحكيم، ومن تأليف أسامة أنور عكاشة وإخراج اسماعيل عبد الحافظ.
وشاركت في أعمال في بعض الأعمال التانية وبلغ مجموع مشاركاتها الفنية 10 أعمال كان آخرها فيلم «ليه يا دنيا» سنة 1994 واللي كان آخر عمل ليها وعمرها وقتها كان 11 سنة، عشان تبعد عن عالم الفن وتاخد طريق تاني في حياتها.
هديل خيرالله كشفت خلال لقاء تلفزيوني، إن أول مشهد اتصور في فيلم «العفاريت» لشخصيتها «بلية» كان لما اضربت بالقلم على وشها، ومشهد سرقة الخواجة كنتاكي ده اتصور الساعة 3 الصبح.
ابتعدت «هديل» عن الفن في سن 11 سنة، ومدرستش أي شيء ليه علاقة بالتمثيل، ودرست في الجامعة الأمريكية بالقاهرة، وبعدها سافرت وحاليا هي عايشة في أستراليا.
هديل بتحب الكلاب والحيوانات بشكل عام، وبتحب السفر، وكل فترة بتنشر حاجات ليها علاقة بأزياء أعمالها على حسابها على إنستجرام إلى جانب إن عندها قناة على يوتيوب بتنزل فيها فيديوهات لأعمالها الفنية.
