الملكة رانيا زوجة الملك عبدالله الثاني، ملك الأردن، معروف عنها بساطتها وذكائها واحتوائها للكل من حولها وهذا ما خلق حالة الحب التي تحيط بها من شعبها ومن كل من حولها.
وعلى مستوى مشاهير الفن والمجتمع هنلاقي في علاقات وطيدة من كتير من المعروفين حواليها من كل البلدان كمان.. ونجمات الفن ليهم في قلبها رصيد كبير وده اللي شوفنا أثره على فرح ابنها البكري ولي العهد الأمير الحسين بن عبدالله وعروسته السعودية رجوة آل سيف..
لكن مين هما النجمات القريبين من الملكة رانيا؟ وليه بتحب نانسي عجرم بالأخص؟ وليه ماجدة الرومي تبقى صديقتها؟.. وإيه اللي عملته مع الفنانة سلمى حايك؟.. يلا بينا في التقرير ده هتعرفوا كتير عن علاقات الملكة بالفنانات.
مشاهير الفن مش استثناء ويمكن علاقة الملكة رانيا بيهم جميلة وقوية.. وقدرت توصل قلب المواطن العادي البسيط وياخد حبها ويكون ليها رصيد في قلبه.. ومن المواطن وصلت للرؤساء والملكات في الدول التانية وفي بينها وبينهم مقابلات واتفاقيات ومبادرات ومشاركة في حملات وغيرها من الكواليس وتبادل الزيارات.. وجمعت الملكة رانيا المشاهير حواليها وشاكوا في مناسبات مختلفة ليها وأغلبهم بيحبوها وعملوا أغاني عشانها وقت الاحتفال بابنها البكري على عروسته.
نانسي عجرم بتغني ببلاش
من قريب شوفنا الملكة رانيا بفستان جميل جدا في حفلة موسيقية خيرية اتعملت برعايتها في عمان ودي كانت لدعم مؤسسة الحسين للداء الخبيث ومفاجأة الحفلة كانت نانسي عجرم وانتشرت ليها مع الملكة رانيا صورة من الحفل.
ودي مش أول مرة نانسي عجرم تقابل الملكة وتقعد معاها وسنة 2014 زارت نانسي الأردن مخصوص عشان تقابل طفلة صغيرة تعبانة هناك وكان كل حلمها تشوف نانسي عشان هي مطربتها المفضلة ونفسها تتصور معاها وطبعًا نانسي متأخرتش وراحت مخصوص والملكة وجهت ليها دعوة وعزمتها على الغدا.
الفرحة جمعتهم
طبعًا فرح ولي العهد الأمير الحسين كانت فيه كذا مناسبة قبلها يعني الزفة مجتش مرة واحدة كده.. يعني الملكة رانيا عملت حفل حنة لعروسة ابنها وحضرتها الفنانة الأردنية ديانا كرزون وكان ليها صورة مع الملكة وهي بتشارك بالغناء في الحنة.
ومش بس ديانا دي كمان نداء شرارة نجمة آراب أيدول مش مجرد واحدة بتغني لكن دي الفنانة المفضلة عند الملكة رانيا وبتجمعهم علاقة قوية جدًا واختارتها الملكة عشان تغني في الفرح كمان.. ومش بس كده دي دخلت القصر وسلمت على الملكة رانيا وخدتها بالحضن وراحت بيها على الملك عبدالله تسلم عليه هو كمان.
ومن سنين في لقاء جمع الملكة رانيا مع خبيرة التجميل اللبنانية جويل مردينيان والإعلامية السعودية لجين عمران، والمذيعة المغربية مريم سعيد والأردنية علا الفارس.. وكان واضح حالة الحب والعلاقة القوية اللي بينهم.
الملكة رانيا وسلمى حايك
طبعًا قولنالكم إن اللي حصل بين الملكة رانيا والممثلة العالمية سلمى حايك مش هيتصدق.. وده اللي هتعرفوه لما هما الاتنين كانوا في مهرجان المواطن العالمي السنوي الرابع سنة 2015.
واتقابلوا تاني في مهرجان المواطن العالمي سنة 2016 ووقفوا على الاستيدج سوا وسلمى حايك كانت بتتكلم على أهمية التعليم للاجئين وإنهم لازم يندمجوا في المجتمعات وأشادت بالملكة رانيا إنها واحدة من اللي عندهم الكرم والشجاعة وبيقدموا الخير للكل والملكة قابلتها بابتسامة عريضة وشكرتها على اللي قالته في حقها وقتها.
ماجدة الرومي الصديقة
كمان في وقت من الأوقات الملكة رانيا قالت على الفنانة اللبنانية ماجدة الرومي إنها صديقتها وطبعًا هما بنيهم علاقة وطيدة ووقتها نشرت الملكة رانيا صورة مع ماجدة الرومي اللي قابلتها في قصرها الملكي في الأردن وقالت: “برفقة صديقتي الفنانة الرائعة ماجدة الرومي.. لقد سعدت بلقائنا اليوم”.. وكمان الجلسة دي استمرت ساعات ودار بينهم أحاديث خاصة متكشفش عنها للإعلام.
شاركونا برأيكم شايفين علاقة الملكة رانيا بالفنانات قليلة؟ ويا ترى مين حابين تشوفوه مع الملكة من الفنانات في الفترة الجاية؟
