عالم التيك توك كبير ودائما نجد أشياء وناس جديدة، ولا نعرف سر شهرتهم وما سر حب الناس لهم ومنهم عبير الصغير التي سنعرف الكثير عنها من خلال هذا التقرير فتابعونا.
أميرة ديزني تغزو السوشيال ميديا
أميرة ديزني.. الشيف عبير الصغير.. اللي عندها 23 سنة.. بس قدرت في فترة بسيطة جدا تجمع 2 ونص مليون متابع على انستجرام.. وأكتر من 20 مليون على تيك توك.. ورغم إن شكلها بسيط جدا.. بس طلعت مش سهلة خالص
عبير الصغير قالوا عليها أميرة ديزني.. لإنها بتلبس زي أميرات ديزني بالظبط.. وبتقدم على السوشيال ميديا عندها وصفات أكلات من كل دول العالم.. وبين يوم وليلة بقت الشيف الأشهر في لبنان.. وغطت على كل الناس اللي في المجال
ناس كتير فاكرة إن عبير دي بقالها سنين بتحاول يعني وكده.. لكن الحقيقة إنها بدأت تبقى صانعة محتوى من حوالي سنة ونص بس.. وبتعرض على حساباتها شوية فيديوهات عن الأكل وترشيحات للأماكن ووصفات.. وده إلى جانب بقى الكلام عن الموضة والأزياء
مجال دراسة عبير الصغير قبل السوشيال ميديا
والمفاجأة بقى إن أميرة ديزني دي.. قصدي عبير الصغير يعني.. متخرجة من كلية الهندسة عادي.. وعايشة في لبنان.. ورايحة جاية على تركيا كده.. عشان تتابع المشروع التجاري اللي هي عملاه عن الموضة.. وشوية وهنلاقيها داخلة مجال تاني خالص عشان زي ما بتقول هي بتحب تجرب حاجات جديدة
اللي عملها شهرة كبيرة كمان هو دعمها للقضية الفلسطينية بشكل كبير ومتكرر دايما.. ونشرها لأزياء وأكلات ليها علاقة بالتراث العربي والقضية الفلسطينية.. وبتعتبر إن الكلام عن القضية حاجة جوهرية ومنطقية المفروض كل شخص عربي يعملها.
وجت مصر زيارة من كام يوم وثقت فيها كل الأماكن اللي راحتها والشوارع الأثرية اللي عدت عليها وده بشكل ما عمل على ترويج السياحة جدا وفي ملايين شافت الفيديوهات واتشجعوا إنهم يجوا يكرروا التجربة زيها
أميرة ديزني قلبت السوشيال ميديا بزيارتها لمصر
يعني واحدة مشهورة على تيك توك.. لما تيجي تتكلم عن الكشري ولا المحشي ولا الفول والطعمية أكيد هتلم عليها مشاهدات قاد كده.. وطبعا غير شكل النيل والآثار البت فادت واستفادت
فيديو من اللي صورتهم عبير الصغير عمل أكثر من 12 مليون مشاهدة على تيك توك و5 مليون على انستجرام غير طبعا فيسبوك وده من كتر ما اللقطات اللي صورتها جميلة.. ومهمة.. وساعدت بشكل كبير على ترويج السياحة
الموضوع كبير بقى واتحول من مجرد فيديو ورحلة ترفيهية.. لحملة اسمها come to Egypt.. بقت تريند على تويتر وفيسبوك كمان… والبنت بصراحة عملت معانا أحلى واجب وقالت للمتابعين اللي عندها.. أجواء مصر ملهاش مثيل.
