الفنانة الشابة الفرفوشة النعنوشة مايان السيد اللي واخدة الحياة كلها هزار وتيك توك تسببت في مشاكل في كواليس مسلسل ألف حمد الله عالسلامة.. الذي تسابق به الفنانة يسرا الزمن لكي تحقق النجاح الذي تتمناه في رمضان مثل كل سنة.
مايان السيد كل سنة عمرها بيكبر ودماغها بتصغر ومش بتركز في شغلها على قد ماهي مركزة مع السوشيال ميديا وإطلالاتها وفيديوهاتها والتيك توك.. وللاسف بتشغل باقي زمايلها معاها.
مايان بعد ما كانت ما بتصدق تلاقي فرصة تطلع فيها في مسلسل وخصوصا مع يسرا اللي عاملة منها بنتها وبتديها كل سنة دور أكبر من اللي قبلها.. شافت نفسها تقريبا وبقت بـ تتنك ع الشغل.
بتروح التصوير متأخر.. وبتلغي كتير بحجة إنها تعبانة.. ومش مركزة ولا بتحفظ الكلام المكتوب في السيناريو عشان كده بتقول حاجات مش منطقية.. وده كان سبب من اسباب تركيز الناس مع أخطاء المسلسل والتريقة عليها على السوشيال ميديا
يسرا لما قالت عاوزه أضحك الناس.. مكانتش تقصد إن الجمهور يضحك ويتريق عليها وعلى مسلسلها.. ولما بتبقى عاوزه تشجع الشباب.. وتديهم فرصة.. مبتبقاش عاوزه تقدم منتج تاف برضه.. في الآخر دي يسرا يا جدعان.
للأسف أول كام يوم في رمضان كان مسلسل ألف حمد الله عالسلامة مضحكة السوشيال ميديا كلها.. مش بس بطريقة كلام مايان السيد المعووجة.. ولا لهجة آدم الشرقاوي اللي محدش فاهمها.. ولا مشاركة عنبة بالتمثيل لأول مرة في دور سواق على قد حاله.. لا باستغلال مايان ميونة لكواليس العمل عشان تصور فيديوهات تيك توك تزود المشاهدات عندها بس تقللها في المسلسل.
مايان السيد في المسلسل بتقدم دور بنت يسرا اللي راجعين من كندا عشان يستلموا ميراث بالملايين.. فا طبيعي تبقى بتقدم شخصية شابة متربية بره مصر وعندها مشاكل في الهوية وفي طريقة لكلام والمصطلحات.
بس مايان السيد عشان مش مركزة ومش مذاكرة كويس.. الموضوع قلب منها كوميديا.. ولسانها معووج بشكل خلا الناس كلها تتريق عليها.. وطبعا لإن المسلسل لسه بيتصور فا يسرا مركزة مع ردود فعل السوشيال ميديا وحاسة إن العمل بيروح منها.. وإنها مش هتبقى فاكهة رمضان زي ما متعودة بسبب شغل عيال يعني.
فا الفترة الجاية لو مايان مظبطتش نفسها وركزت وحضرت في مواعيدها.. مش بعيد يسرا تقص الدور بتاعها وتديه لحد تاني من الشباب اللي مقدر الفرصة وعارف قيمتها احذري يا ميونة.
