يوجد مطربين تحب تسمع صوتهم في الغناء وتتسلطن بصوتهم ولكن عند حديثهم في أي موضوع آخر تجد نفسك تريد أن تسكتهم بأي طريقة، وخير دليل على هذا الفنانة شيرين عبد الوهاب وسقطاتها المتكررة عندما تتحدث.
شيرين عبد الوهاب موهبة كبيرة .. و صوتها مفيش حد يقدر يقول عليه كلمة.. وعملت تاريخ من الأغاني معلق مع الناس … لكن في الفترة الأخيرة .. أو يعني خلينا نقول من ساعة مشاكلها مع حسام حبيب و الانفصال و الرجوع و المسحة و كل الكلام ده .. ف ده أثر على شعبيتها أكيد .. و أثر كمان عليها هي شخصيا .. علشان كده رجوعها كان لازم يكون بحساب
شيرين امبارح كانت في أول ظهور ليها .. أول حفلة الرجوع وكانت في دبي .. و في وسط الحفلة اتكعبلت في السماعات ووقعت .. هو طبعا موقف محرج .. بس رد فعل شيرين كان مفاجأة .. قامت و قالت كلمتين ” شوفوا كام فنان حصل فيه كده.. والسماعات ديه لازم تكون مدفونة .. بس المنظمين مبيتعلموش.. وأنا لو مأمنه على رجلي شوفوا هطلب فلوس قد ايه” .. و بعد ما عدت الموقف رجعت و قالت ” أنا رجلي ازرقت .. هرفع عليكم قضية و هاخد تعويض.. يلا عاوزين نأمن مستقبل الولاد”…
طبعا شيرين ليها مواقف في معظم حفلاتها .. وفي منها اللي بسبب كلامها اترفع عليها قضية .. و ده حصل في سنة ٢٠١٧ كانت في حفلة في بيروت .. وطلبت منها واحدة من الجمهور انها تغني أغنيتها ” مشربتش من نيلها” .. وكان رد شيرين ” يجيلك بلهارسيا” .. ردها ناس كتير اعتبروه إساءة .. و اترفعت عليها قضية واتحكم عليها بالسجن و الغرامة .. لكن الحكم اتشال مع الاستئناف
و كانت في حفلة في تونس و حبت تألش .. بس الألشة سرحت منها .. كانت على المسرح و بتقول ان بنتها سألتها هي تونس ديه بقدونس .. قالتلها مفيش فرق بينهم علشان الاتنين خُضر .. التوانسة حسوا انها بتستهزأ بيهم .. و عبروا عن رفضهم للتريقة ديه .. بس بسرعة رجعت شيرين في كلامها و اعتذرت و قالت كنت بهزر مع الجمهور ..
تفتكروا بس كده لا .. ديه في ٢٠١٩ في حفلة الكريسماس هنا في مصر .. خادتها الجلابة شوية .. و فضلت اقول على المسرح أنا خسارة في البلد ديه .. و في وسط الحفلة اتكسر إزاز ترابيزة .. تفتكروا شيرين تسكت لا .. قالت ” عادي يا جماعة اهلا بيكم انتو في مصر ” .. وطبعا كلامها ده خلاها تطلع تعتذر قدام الناس وتقول كلمتها المشهورة ” معلش أخر مرة ” .. بس أخر مرة ديه مش بتيجي مع شيرين …
وطبعا مع ارتباطها ب حسام حبيب .. و أما تكون الدنيا بمبي .. و الحياة لونها بمبي .. تطلع تعاكسه على المسرح .. و تعالى شيلتي يا حسام .. لكن بعد الخناقات و الطلاق .. تطلع على المسرح و تقول متجبوش سيرته و أنا كده فوقت و قوية بيكم .. و بقول للبنات متتجوزوش .. الثبات عاوز منك ايه يا شيرين
طبعا وبعد كلامها على مسرح كوكاكولا في دبي امبارح .. ناس تعاطفت و زعلوا انها لسه ماتعلمتش.. وانها لسه مش بتفكر قبل أي كلمة بتقولها .. لانها لو بتقولها على نيتها .. بس ممكن ازعل ناس كتير منها .. وترجع للانتكاسة من تاني.
