الفنان محمد رمضان واحد من النجوم الأهم والأبرز على الساحة الفنية، وولذلك نجد عنده أعمال جديدة باستمرار ماشاء الله، ولذلك لابد أن يكون مرتب جدول أعماله دائما، والذي يكون له تأثير على طريقة ظهوره وقصة شعره، وحتى وزنه وشكله، وهذا يمكن أن يكون له جزء من ضريبة النجومية، إنك تكون مجبر على حاجات حتى لو لم تريدها.
الفنان محمد رمضان ظهر أكتر من مرة بشكل رئيسي خلال الفترة الأخيرة، ومنها اللي كان في أعمال فنية أو ظهور في برامج، ولكن الملاحظ إن اللوك بتاع محمد رمضان بيتم التلاعب فيه بشكل بسيط جدا في كل مرة عشان يتماشى مع الدور الجديد، وإن كان غير مقنع بالمرة، ولكن ده بسبب خطة طويلة المدى.
في مسلسل جعفر العمدة اللي حقق نجاح كبير خلال شهر رمضان، ظهر محمد رمضان بشخصية واحد من معلمين السيدة زينب بقى، بالجلابية والعبايات والحاجات دي، ولكن كان شعره طويل شوية ومرجعه على ورا كدة ومصبوغ بعض خصلاته باللون الأبيض، وكان طول الوقت لابس خواتم كتير في إيده.
لما انتقل محمد رمضان من مسلسل جعفر العمدة لفيلم هارلي أسطورة الأسفلت، لاحظنا إن اللوك اللي هو عامله الخاص بالبايكرز، كان ظاهر فيه بنفس قصة شعر جعفر العمدة، ولكن كان مزود عليها ديل حصان عشان يبقى شبه الناس دي، ويمكن اللوك مكنش مناسب بشكل كافي للدور عشان يظهر محمد رمضان متناسب مع العالم ده، وكان ممكن اختيار شكل تاني، ولكن ده كان ليه أسباب منها إنه لازم يحافظ على شعره طويل.. ولكن ليه؟
محمد رمضان بعدها في العيد ظهر في برنامج صاحبة السعادة مع إسعاد يونس وكانت سهرة لطيفة للجمهور في العيد فيها غنى واتكلم وحكى مواقف كتير من حياته، وخلال السهرة كان ظاهر بنفس لوك الشعر بتاع فيلم هارلي، وده هيكون لسببين إما إن الحلقة متصورة في نفس فترة تصوير الفيلم، أو إنه كان بيروج لشخصيته في الفيلم من خلال اللوك ده، ولكن الخواتم كانت موجودة وحاضرة.
بعد العيد طرح محمد رمضان أغنيته الجديدة tmo وفيها ظهر بنفس لوك شعر جعفر العمدة ولكن من غير الخصلات البيضا، وكأن المسؤولين عن ظهور محمد رمضان معندهمش أي طريقة جديدة يظهر بيها غير نفس طول الشعر والقصة دي.
ولكن بعدها اتجه محمد رمضان لأمريكا عشان يقوم بحولة غنائية هناك لأول مرة في مسيرته، وظهر بلوك جديد، وهو لابس جاكبت أخضر وslipper أخضر تمنه 900 دولار، وشعره بنفس الطول ولكن مسرحه على قدام، وبرغم استخدامه الاستايل بتاع الرابرز في اللبس، إلا إنه منسيش يلبس الخواتم بتاعته باردو، عشان يجمع بين أكتر من استايل في نفس الوقت.
يمكن الزحام في حياة محمد رمضان المهنية بيقلل شوية من الاهتمام بشوية تفاصيل بتفرق كتير واللي بتخلي الجمهور يقول إنه بيكرر نفسه، ولكن ممكن يحتاج إنه يهتم بالتفاصيل دي قدام.
