مسحت أبويا من حياتي..أسرار ومحطات في حياة شيماء سيف

في التمثيل في نوع من الممثلين بيسموهم الكراكترات، أدوراهم متعلقة بصفاتهم سواء كان الشكل أو الطريقة والكاريزما الخاصة بهم.

المهم يعني إنهم مش بيكون مطلوب منهم يعملوا أكتر من نوع من الشخصيات، ولكن بيكونوا محصورين في أنواع معينة من لأعمال، وده لصفاتهم الشكلية وطريقة أدائهم، ودي مش حاجة وحشة للشخص، ولكن طبعا هي مش كويسة على المدى الطويل لأنها بتقلل التنوع.. ومن أشهر الوجوه على الساحة في المنطقة دي الفنانة شيماء سيف..

الفنانة شيماء سيف، وده اسم الشهرة بتاعها لأن اسمها الحقيقي هو شيماء فتحي، ولكن هي قررت تحذف اسم الأب من حياتها لسببين، الأول بسبب أول مخرج برامج اشتغلت معاه، وكان اسمه سيف، وقالها لو كان عندي بنت كنت هتمنى تكون زيك، فاختارت يكون اسمها شيماء سيف، وقالت أحيانا بيكون المخرج أقرب من الأب.

والسبب التاني وهو متعلق بالأب، هي بتقول إنها شالته من حياتها خالص بسبب والدتها، لأنه كان في خلاف بينهم، وهي مكنتش معتبراه موجود في حياته أصلا.

شيماء سيف، هي خريجة كلية التجارة، وبدأت مسيرتها الفنية في مسارح الهواة، واشتغلت مع فرق مسرحية كتير، لحد ما جاتلها أول فرصة بعد ما قدمت في بعض الأماكن، والفرصة دي كانت من خلال برنامج «الشيكروباص» وهو من برامج المقالب، وكانت فكرته إن كل اللي في العربية بيكونوا مع بعض، وبيكون معاهم طبعا شيماء، وبيبدأوا يعملوا مقلب في الشخص الغريب اللي بيركب معاهم.

البرنامج حقق نجاح كويس في وقتها، ولكن كان ممكن يكون حاجة وعدت وخلاص، ولكن هي قدرت بعد كدة إنها تشارك في أعمال تاني، وتثبت وجودها عشان تكون واحدة من الممثلات اللي بتقدر تقدم كوميديا بشكل مختلف بين أبناء جيلها، وبتقدم تنوع للأعمال اللي بتشارك فيها.

يمكن الفنانة شيماء سيف مقدمتش أدوار مختلفة خلال مسيرتها، يعني مازالت بتشتغل بنفس الكاراكتر في كل الأعمال اللي بتشارك فيها مع اختلاف الكلام حسب طبيعة الدور اللي بتقدمه، ولكن مازالت قادرة إنها تكون موجودة بالشكل ده.

شيماء سيف خلال مسيرتها شاركت في عدد كبير من الأعمال الفنية والبرامج ومن أبرز أفلامها (مهمة في فيلم قديم، عيال حريفة)، ومن أبرز مسلسلاتها (ولي العهد، سجن النسا، إمبراطورية مين)، ومن الأدوار المميزة والمختلفة ليها كان مشاركتها في مسلسل «في بيتنا روبوت» واللي كان من الأعمال الناجحة والمميزة.

شاركت في تقديم عدد من مواسم برنامج «نفسنة» مع الفنانة انتصار والفنانة هيدي كرم، ولكن التجربة بعد كدة انتهت، بسبب خلافات بينها وبين النجمتين، وده لأنها في مرة سمعتهم بيتكلموا عليها، وبالفعل انتصار قالت إن ده حصل، وإن كانت حاولت تبرره.

شيماء سيف تجربتها انتهت مع البرنامج، والبرنامج نفسه من بعدها مبقاش بنفس الطعم، ومن بعدها انتهى البرنامج خالص، وهي بتقول الحمد لله ربنا جابلي حقي، وده لسبيين، واحد منهم إن انتصار اعترفت إنهم اتكلموا عليها، والتاني إن البرنامج مكملش من غيرها.

وبسبب كلامها الكتير على السوشيال ميديا، البعض اعتقد إن هي وجوزها انفصلوا عن بعض، لما كتبت مرة «الحمد لله كل شيء قسمة ونصيب»، وطلع كلام وقتها إنها انفصلت، ولكن هي قررت متردش، ولكن لما ردت قالت إن الموضوع مكنش ليه علاقة بالانفصال خالص، ولكن كان ليه علاقة بإنها كانت بتصور عمل والفنانة دنيا سمير غانم جالها كورونا، وكمان الفنانة دلال عبدالعزيز، ومن بعدها العمل خرج من الموسم الرمضاني، فكتبت الكلام ده، ولكن اتعلمت إنها متكتبش كل حاجة على السوشيال ميديا.

شيماء سيف بتشارك خلال الموسم الرمضاني الحالي بمسلسل «1000 حمدالله على السلامة» وهو من بطولة الفنانة يسرا، والعمل مش محقق صدى كبير واتعرض لعدد من الانتقادات.