حياة النجوم الشخصية دايما مرتبطة بما يقدموه على الشاشة ، سواء مشاهد جريئة او ادوار مؤثرة بتعلم مع الجمهور ، ومنهم نجوم اتعرضوا لمشاكل كتيرة في حياتهم الخاصة بسبب مشاهد لم يكن من الأفضل أن يقدموها وندموا عليها.
الفنانة غادة ابراهيم حصلها كدا بالظبط ،، عملت مشهد في منتهى الجرأة اتسبب في طلاقها ، اه زي ما بقولك كدا .. تعالى احكيلك قصة المشهد اللي خلى جوزها يستعجل في قرار الانفصال ومقدرش يستحمل يشوفه مراته كدا على الشاشة زيه زي الجمهور اللي بيتفرج ، واول ما شافه راح مطلقها.
سنة 1999 عملت نادية الجندي فيلم الامبراطورة ، وشاركت فيه الفنانة غادة ابراهيم ، وظهرت في مشهد جرئ حبتين مع احمد بدير طبعا اكيد كلكم فاكرينه وفاكرين الفيلم
وبعد ما عدى 24 سنة على عرض الفيلم ، طلعت غادة ابراهيم في حلقتها الاخيرة مع الاعلامي المثير للجدل نزار الفارس ، وفجرت مفاجآة وقالت انها اطلقت بسبب المشهد ده
طبعا نزار مسابش غادة ابراهيم ومكنش سؤال عابر ،، ده طلع موبيله وجابلها المشهد الجرئ بتاعها في الفيلم وفرجها عليها وكل ده اتسجل ضمن الحلقة ، ونفس الحركة دي عملها برضه مع حورية فرغلي ،، ده ولا كأنه ماسك عليهم ذلة
المهم غادة بقى قالت ايه لنزار عن المشهد ده ؟
قالت ده المشهد الجرئ الوحيد في حياتي وتاريخي ومعملتش غيره خالص وكان في بداياتي ، وكان في مشاكل بيني وبين جوزي اصلا وكنا متفقين على الانفصال من شهور طويلة ، لكن المشهد ده عجل بالانفصال بسرعة
كمان قالت انها اتفاجئت بالمشهد ، ومكنش مكتوب كدا على الورق لكن المخرج زود شوية تحابيش عشان يخلي المشهد يطلع بالشكل ده وهي اضطرت تعمله لانها كانت في بدايات مشوارها الفني
ولما جوزها شاف المشهد ده في الفيلم قالها : مش انتي كنتي عايزة تنفصلي ؟ طب يا حبيبتي تمام واطلقنا فوراااا
غادة حاولت في الاول تخبي الفيلم ومتتكلمش عنه مع جوزها ولا كأنها عملت حاجة لكن ولاد الحلال كتير وهما اللي وروله المشهد الجرئ بتاع مراته ، والراجل مقدرش يتقبل اللي شافه وراح رامي عليها اليمين على طول
وانفصلت غادة ابراهيم عن جوزها الاول بسبب المشهد ده فعلا بعد خلافات كتير حصلت بينهم ، لكن بعد فترة ارتبطت تاني لكنها خافت يحصلها نفس اللي حصل مع جوزها الاوني ، وقبل ما تتجوزه قررت تقوله الحقيقة عشان متتعرضش لنفس الموقف
وقالت غادة لجوزها التاني : على فكرة انا عندي مشهد واحد جرئ في حياتي المهنية كلها عشان نكون على نور من اولها
حلقة غادة ابراهيم مع نزار الفارس كانت قوية جدا وقالت تصريحات كتير عنها وعن حياتها واتكلمت كمان عن لبسها الجرئ وقالت غادة : لبسي ده مش من الكبائر وبعمل حاجات خير كتير عشان ربنا يغفرلي ذنوبي لكن مبجيش جنب الكبائر
مش بس كدا ، قالت كمان : انا بحب البس على الموضة ومش شايفة ان اللبس اوفر ، وانا لسة راجعة من العمرة من كام يوم ، وعملت عمرة قبل كدا برضه ، عشان ربنا يسامحني على اي حاجة ،، انا بقرأ كتير في الدين وبصلي باستمرار ومش بسيب فرض بقالي 20 سنة ، ولبسي ده الجرئ ممكن يكون من الموبقات مش من الكبائر لاني مش بعمل حاجة كبيرة زي اكل مال اليتيم ولا الاسحار والحاجات المحرمة دي.
