بنعلن في النبأ العاجل إن الهضبة غير سينجل، مفاجأة من العيار الثقيل سنكشف تفاصيلها في هذا التقرير فتابعونا.
ناس كتير مستنية تعرف مين اللي هتوقع عمرو دياب من تاني.. وتنضم لقائمة طويلة من الستات اللي كانت متسمية على اسمه في يوم من الأيام بداية من شيرين رضا وزينة عاشور أم أولاده ودينا الشربيني ومن قبلها خطوبته لأخت إلهام شاهين
الفنان عمرو دياب بيعيش قصة حب مولعة في الدرة بقاله يجي سنة.. مع ملكة جمال مصر السابقة.. موني هلال.. اللي مخلية الهضبة مقيم في دبي طول الوقت.. بعد ما كان رايح جاي ع الساحل والجونة.. بقى مقر إقامته في ناموس دبي “nammos dubai”
شلة عمرو دياب في دبي مش سايبينه لوحده دايما عشان متبقاش قصة حبه الجديدة مكشوفة بس على مين احنا عندنا الحصري كله وعرفنا حبيبة الهضبة الجديدة هي مين وايه أصلها وفصلها.
موني هلال ملكة جمال مصر 2018 عندها دلوقتي حوالي 31 سنة وبعد ما كسبت اللقب وخدت التاج بقت انفلونسر مشهورة جدا بعد ما كانت مديرة علاقات عامة حياتها خدت منحنى تاني خالص
جمال موني هلال لفت نظر الهضبة ورجع عيل معاها من تاني وبتصوره لقطات غريبة محدش يصدق إنها تطلع منه احنا اه عارفين إن عمرو دياب كل ما يكبر بيصغر بس مش للدرجة دي.
موني هلال بتشتغل عارضة أزياء دلوقتي وصانعة محتوى وكمان بتقدم برامج تلفزيونية لا دي كمان عاملة خط إنتاج ملابس باسمها ست قوية يعني مبتهزرش بس قصاد الهضبة كل الصعب يهون.
موني هلال كمان بتحب العمل الخيري جدا وبتشارك في إيفنتات خيرية وبتشتغل مع مؤسسات لذوى الاحتياجات الخاصة وبتقضي وقت كبير مع الأطفال وليها مجهودات في مجال رعاية وحماية الحيوانات.
وبعد ما أعلن الهضبة في النبأ العاجل إنه بقى سينجل شكله قريب جدا هيعلن إنه وقع على بوزه وبقى بيحب من جديد وقرر يفك ويعيش ويتهنى مع ملكة الجمال اللي قدامكم دي
بتقع عليهم فين يا هضبة قولنا بس ناس كتير بدأت طبعا المقارنة بين دينا الشربيني وبين موني هلال وزي ما كانوا مستنيينهم يرجعوا لبعض بقوا دلوقتي بيتابعوا الصور واللقطات اللي بيظهروا فيها سوا
هل هتقدر موني هلال تغير وجهة نظر الهضبة في الجواز وتوقعه من تاني ولا هيفضل مخبي ومداري على شمعته صحيح إنه عمرو دياب مركز في شغله وكمان عنده فرح بنته نور قريب بس مبيعرفش ينسى نفسه أبدا
