قال لصحابه أريد أن أذهب للبحر وليته لما يذهب، لكن هذا عُمر ومكتوب ولا يوجد تأجيل ولا تقديم.. ربنا استرد أمانته في الشاب الصغير عبدالله حسن يوسف ابن الفنان الكبير حسين يوسف والفنانة المعتزلة شمس البارودي.
لكن اللي محدش كتير يعرفه إن ابن حسن يوسف الصغير مش عايش في مصر أصلا وكان جاي يقضي إجازة وده اللي خلى صدمة رحيله أكبر بكتير.. طيب إيه بقى تفاصيل اللحظات الأخيرة في حياة عبدالله حسن يوسف اللي مليانة تفاصيل وأهله شاكين يكون ساب الدنيا بفعل فاعل؟ وإزاي كان عايش بره مصر؟ وليه مش بيحب الفن؟ وكمان هتعرفوا السبب الحقيقي اللي خلاه فارق الحياة حسب ما قال الكشف الطبي.. يلا بينا أقولكم كل التفاصيل:
حسن يوسف وشمس البارودي بيعتبروا عبدالله ليه مكانة خاصة في قلوبهم.. آخر العنقود بقى وكده ورغم إنه اتمرد على الفن واختار يشق طريقه في اتجاه تاني محدش من أهله وقف قصاده وعرف فعلاً يعمل كل اللي نفسه فيه.. عكس أخوه عمر اللي نداهة الفن طلبته وراحلها.. وفي الأول والآخر ده نصيب وكل واحد بينام على الجنب اللي يريحه.
آخر العنقود
عبدالله حسن يوسف ورث من أبوه خفة الدم وممكن في قعدة واحدة يضحك كل اللي حواليه أكتر من مرة.. إنسان محبوب وسط أسرته وعيلته والاهتمام بيه كان أكبر من أي حد فيهم.. وقدر عبدالله يلهف كل القلوب حواليه بس قصاد كل ده اتمرد على الفن وقال مش همثل وليا طريق تاني وأبوه وأمه كانوا في صفه وسابوه يختار اللي هو عاوزه رغم إنه مش هيعيش معاهم وطول الوقت هيكون بره مصر.
بس ما باليد حيلة والأمل فيه إنه يكون حاجة في المستقبل.. وفضل الأب والأم والأخ والأخت واقفين جنبه وبيتواصلوا معاه عادي لحد ما يرجع لحضنهم من تاني.. بس للأسف مرجعش غير للي خلقه.
ليه اتمرد على الفن؟
عبدالله اتمرد على الفن عشان شاف نفسه مش في المنطقة دي خالص.. وقرر يدرس الطيران في أمريكا وفعلاً عمل كده وبعدها راح لبنان وقرر يدرس الإعلام هناك وليه لحد دلوقتي مخلصش دراسته.. ولما كان في الساحل كان في فترة إجازة.. زيه زي أي طالب في سنه أو أي واحد شغال طول السنة وقرر ياخد إجازة عشان يفصل شوية ويرجع يكمل.
مفاجآت اللحظات الأخيرة
عبدالله حسن يوسف رجع مصر من شهر واحد بس عشان خد إجازته وقال يقعد كام يوم في القاهرة مع أبوه وأمه ويقضي إجازته.. بعدين ودعهم واتفق مع صحابه يطلعوا يقضوا كام يوم في الساحل عشان البحر وحشه أوي.. ومن هنا بدأت الحكاية.. طلع عبدالله مع صحابه واتفقوا ينزلوا البحر في الساعات الأولى يوم الأحد 30 يوليو.. طبعاً كل واحد خد الغُطس بتاعه ورجع على أوضته بس اكتشفوا بعدها إن عبدالله مرجعش ومن وقتها الدنيا اتقلبت.
سبب الرحيل
عبدالله حسن يوسف معرفش ياخد نفسه وهو في البحر والموجة عليت عليه لحد ما فارق الحياة.. نزلوا المنقذين عشان يشوفوه وفعلاً لقيوا الجثمان بس كان خلاص الروح صعدت للي خالقها.. اتنقل على مستشفى العلمين وتقرير الطب الشرعي قال إنه رحل بسبب اسفكاسيا الغرق ودي معناها دخول كمية كبيرة من المية للرئة وده كان صعب يخليه يوصله الهواء وعشان كده غادر دنيتنا.
كان في صعوبة بعد ما الأطباء ما عرفوا إن دي النهاية إنهم يبلغوا أسرته وتحديداً أبوه وأمه اللي هما أصلا كبروا وصعب يتقبلوا خبر زي ده ربنا يصبرهم طبعاً على اللي هما فيه.. لكن واحد من أصدقاء عبدالله اتصل بحسن يوسف وبلغه وبعدها دخل في صدمة وشمس البارودي دخلت في غيبوبة وأخته ناريمان انهارت من البكاء عشان هو كل يوم كان بيكلمها.
واتحركت نقابة المهن التمثيلية وراح أشرف زكي ومعاه أعضاء النقابة نهال عنبر وأحمد سلامة عشان يخلصوا إجراءات خروج الجثمان وتصريح الدفن.
المفاجأة بقى إن في شكوك يكون اللي حصل بفعل فاعل وإن في شبهة جنائية ورا الحكاية.. وعشان كده لحد دلوقتي الجثمان مخرجش وفي قرار إنه هيروح المشرحة عشان يعرفوا السبب الحقيقي ورا رحيله من الدنيا.
تفتكروا رحيل عبدالله حسن يوسف يكون طبيعي ولا الموضوع بفعل فاعل وفي شبهة جنائية؟ اكتبولنا آرائكم في التعليقات.
