هذا العام لدينا كومبو وتوليفة متنوعة في مسلسلات رمضان،ما بين الكوميدي والأكشن والدراما الشعبية، والأحداث الاجتماعية، وكل مسلسل فيهم يقدم قصة حب من نوع خاص، وأيضا يقدم الانتقام والصراعات بشكل مختلفة، تابعونا لمعرفة التفاصيل
موسم دراما رمضان السنة دي بيشهد عدد كبير من الأعمال المميزة.. وكمان هيظهر فيه مسلسلات كانت غايبة عننا أبرزها التاريخي والديني في نفس الوقت.. وهترجع أعمال كنا بنحبها في أجزاءها التانية.. زي رمضان كريم اللي الناس كلها مستنياه
وفي وسط القصص دي هنشوف ثنائيات رومانسية.. كل اتنين فيهم بيعيشوا قصة حب مختلفة وفي زمن غير الزمن.. منها اللي هيبقى له حكاية أسطورية.. ومنها اللي الصراعات والمشاكل هتقف في طريقهم
زي مثلا أمير كرارة ومي عز الدين.. اللي هياخدونا معاهم لزمن تاني.. ويرجعوا بينا ورا شوية للعشرينات.. أيام الرومانسية واللبس الشيك.. والحياة الرايقة شويتين
مي عز الدين وأمير كرارة هيعيشوا قصة حب قوية جدا في “سوق الكانتو”.. بس طبعا هيبقى في مشاكل قدامهم ليها علاقة بفرق المستوى الاجتماعي.. ومعايير الزمن.. بس هيتغلبوا عليها وهنشوفهم بشكل تاني خالص
أما بقى العلاقة “الحرشة”.. هتبقى بين مهرة وجابر.. أو ياسمين عبد العزيز وأحمد العوضي.. اللي جايبين بقصة حب دمار في مسلسل “ضرب نار”.. بنت شبرا هتوقع ابن الصعيد.. بس للأسف الصراعات هتفرق ما بينهم
ناس كتير كانت خايفة من تكرار قصة حب ياسمين وأحمد العوضي في المسلسلات..بس هما عندهم رأي تاني.. والمرة دي حبهم هيبقى أقوى من صراعات رجال الأعمال وهيصمد شوية قصاد المشاكل .. ربنا يستر
لكن كل ده كوم.. والحب الكبير اللي هنشوفه بين أحمد السعدني وحنان مطاوع في “سره الباتع”.. كوم تاني.. حب مش بس قايد النار في قلوب صحابه.. لا ده ولع في البلد كلها.. وكان السبب في إنه تقوم ثورة ويشهد عليهم التاريخ
صافية والسلطان حامد.. قصة حب بتدور حواليها أحداث مسلسل المخرج خالد يوسف في رمضان.. اللي بيستعرض بطولات المصريين والفلاحيين في محاربة الحملة الفرنسية.. وأحداثه رايحة جاية ما بين العصر الحالي وسنين كتير فاتت .. وهي حكاية واسطورة تاريخية مستوحاة من قصة للأديب الكبير الراحل يوسف ادريس
وفي وسط كل ده منقدرش ننسى قصة الحب الكوميدية المسخرة اللي بين مربوحة والكبير..اللي بدأت بجوازهم في الجزء السادس.. والسنة دي في رمضان راجعين تاني بس المرة دي بينهم مشاكل كبيرة
مربوحة والكبير على قد حبهم لبعض بس هيمروا بأزمات في جوازهم.. هتستدعي يروحوا لمستشار علاقات زوجية.. يا كده .. يا الكبير هيتجوز عليها ويجيب لها ضرة.. وشكلها كده لورديانا هتروق عليه وعلينا السنة دي.. هنشوف.
