الواحد بياخد الصدمة وبيفوق.. يمكن الأول كانت تبكي لكن مع الوقت الدموع تجف ويكون فيه مناعة من كل شئ يحدث ولكن هل من السهل أن يكسر رجل قلب امرأة أو تكسر امرأة قلب رجل؟
الحقيقية هي علاقة مثيرة للجدل والتساؤلات بين المطرب تامر عاشور واللي كانت مراته سمر أبو شقة وكمان اللي كانت خطيبته..
صراحة دي حاجة كده غريبة عجيبة الفنان يقول كنت عايش في نكد طيب خلاص يقطع عرق ويسيح دمه ويشوف غيرها عادي بتحصل لكن تعلق واحدة وتخدع واحدة تانية وتغامر بحياة وعندك طفلة هي دي العلاقة الملعبكة اللي هنتكلم عنها في الفيديو وإيه مصير الطفلة أيام اللي ملهاش دعوة بكل اللي حصل ده؟..ومين اللي اتخدعت ومين للي اتظلمت ولا ظلمت يلا بينا.
شهرة وجوازة
شهرته الواسعة خلن شركات الإنتاج تتنافس عليه وقبل ما يوقع مع واحدة منهم كان عامل ألبوم كامل الكلام ده كان سنة 2006 وحقق نجاح كبير جداً وده زود المنافسة لحد ما جت أواخر سنة 2008 ووقع تامر مع شركة كبيرة عشان شغله ويوم ورا يوم وألبوم ورا التاني النجاح مسيطر ما شاء الله امسكوا الخشب.. بس كل أغانيه حزن وسجن ومفيش فرح وده بقى اللي عرفنا سره بعدين.
تامر راح يقصي الخدمة العسكرية سنة 2011 وخطب سنة 2012 وقعد 5 سنين خاطب ودي كانت فتاة من بره الوسط الفني واسمها سمر أبو شقة .. اتجوزوا سنة 2017 وخلف بنته الأولانية سنة 2019 وكان اسمها أيام على نفس اسم ألبوم صدر في نفس السنة.. الغريبة إنه في نفس السنة أعلن خطوبته على ملكة جمال العالم دارين حلمي وبعد مدة قصيرة فشكلوا يا سلام إيه الحكاية؟.
انفصال وخداع
بعد الحكايات دي ما حصلت كل حاجة عدت عادي لحد ما اتفاجئنا من كام يوم إن تامر عاشور ومراته انفصلوا رسمي.. هو الوقت ده ومكانش حصل انفصال.. هقولكم: في 2019 فعلاً حصل انفصال مش رسمي يعني بعد سنتين جواز.
راح تامر عاشور خطب دارين حلمي ودي تبقى ملكة جمال مصر وقالها إنه طلق مراته خلاص ودخل البيت من بابه وقعد مع باباها والموضوع بقى رسمي فهمي نظمي وأعلنوا .. بس مع الوقت عرفت دارين حلمي إنها مخدوعة ومراته متطلقتش ولا حاجة وبينهم محاكم وحكايات قالت طيب وأنا آخد واحد من على مراته ليه؟ بالسلامة يا عنيا طريق وردي وخليني بعيد أحسن عن القصة دي وخلعت خالص.
محاولة ومصير
حاول تامر عاشور يرجع لمراته وقال ألمْ نفسي بقى عشان بنتي والشمل يرجع من تاني .. بس مراته حالفة ماهي راجعة.. وكملت في المحاكم واتطلقت رسمي من 11 شهر بس ما اتعرفش الموضوع ده غير اليومين دول.. طيب مصير البنت الصغيرة أيام إيه بقى؟.. اللي اتقال على لسان مامتها إنها عايشة معاها وبتتابع كل اللي طلباتها وقايمة بكل حاجة ناحيتها أول بأول.
مين دارين حلمي؟
بعد ما دارين حلمي اتعرفت للجمهور وإنها كانت هتلبس في الحيط مع تامر عاشور.. هقولكم بقى مين هي.. دارين فازت بلقب ملكة جمال الكون للسياحة والثقافة الدولية لمصر سنة 2019.. مثلت مصر في المسابقة الدولية لملكة جمال الكون للسياحة والثقافة الدولية، بس مفازتش بيها وخدت منها اللقب الأسترالية جوليانا نيكول.
ودارين قالت عن مشاركتها دي إنها حققت حلمها بالمشاركة وربنا مبيضيعش تعب حد.. وكفاية إنها حافظت على تقاليد بلدها وموقفتش ببكيني عشان تاخد لقب ولا وافقت تلبس قصير.. ودارين بتحب السفر والترحال والمشاركة في الأعمال الخيرية والتطوعية.. وعملت دشنت حسابها الرسمي على “إنستجرام” في سبتمبر سنة 2018، وعندها متابعين قربوا على نص مليون دلوقتي.
تفتكروا بعد الطلاق الرسمي ما اتعرف ممكن دارين حلمي وتامر عاشور يرجعوا لبعض تاني؟.. وياترى حياة تامر هتتغير ونشوف أغاني تانية بدل جو الأحزان والنكد اللي إحنا عايشينه ده؟.
