خلال الساعات الماضية انتشرت صورة البلوجر عمرو راضي وخطيبته هدير النحاس، واثارت الجدل بصوىة كبيرة على مواقع التواصل الاجتماعي بسبب شخص ثالث ظهر في الصورة، تابعونا لمعرفة القصة كاملة:
لو انت بلوجر فانت دخلت عش الدبابير برجيلك، مترجعش بقى تزعل لما يلدعك، ما هي اللعبة كدة، مش كلها حلو بس، في وش تاني ليها يجيبك الأرض، عموما لو انت عايش في العالم ده، فانت متعود عليه، وعارف الدنيا ماشية ازاي، المهم إن البلوجر عمرو راضي وهو واحد من المدقدقين في الشغلانة يعني، كانت المرة دي من نصيبه هو.. ايه اللي حصل؟ وكواليس الخطوبة وقصة حبيبها القديم؟ تعالوا نشوف
عمرو راضي بقى حب يعمل حركة جامدة كدة، أهو منها بياكل عيش وبينزل ويكسب مشاهدات، ومنها باردو يكسب قلب حبيبته، راح مأجر قاعة سينما، ولامم صحابه، وعاملها مفاجأة وقعد يكتب its time وعايش بقى الخيال، والبنات تصوت والشباب تسقف.
ظهر عمرو راضي في القاعة وهو داخل ومتوتر، وهي مصدومة متفاجأة، وايه اللي بيحصل ده ايه اللي انا شايفه ده، وبعدين اتقدملها وهي اتكسفت وقبلت عرض الجواز، وناس اتريقت وناس اتبسطت وأهو هي دي الحياة.
مين عمرو راضي؟ ده بلوجر مشهور، وبيتابعه ملاييين على منصات التواصل، وفي سنة 2016 قدم كام حلقة من برنامج اسمه «ميصحش كد» على قناة النهار، ولكن التجربة تقريبا متكتبلهاش النجاح، فمطولتش كتير ولا سابت أثر، بس هو كاتب على إنستجرام عنده إنه مقدم برامج في قناة النهار.
عمرو راضي كمان بيستغل عدد المتابعين الكبير اللي عنده، في إنه ينزل دعاية وإعلانات لمحلات وتوكيلات وحاجات من دي، ودي حاجة معروفة عن كل البلوجرز، إلى جانب إنه عنده مجموعة كافيات ومطاعم، وبيقلب رزقه.
طب خطب مين؟ بلوجر تاني اسمها هدير النحاس، بس هدير نص بلوجر يعني، لأن هي مش بتعمل كل الأنشطة، هي مركزة مع اللبس وكدة، وتقعد تتصور بهدوم جديدة للبنات، ومن فترة عملت براند على قدها كدة، وعملتله باردو صفحة على إنستجرام، وربنا يوفقها.
لحد هنا كدة عرفنا إن عمرو راضي عمل مفاجأة واتقدم لهدير النحاس، وطبعا وكعادة الوش التاني للسوشيال ميديا، الناس هاجمتهم وقعدوا يقولوا إن البيوت بتتدخل من أبوابها، وطبعا انتوا عارفين نوعية التعليقات دي مش محتاجين نكمل.
لكن الأهم، واللي عرضهم لانتقاد حقيقي، لما بلوجر تالت خالص بيشتغل في عروض الأزياء، اسمه محمد عاصم جمال، نزل صورة وهو واخد عمرو وهدير كدة بين إيديه ومتصور معاهم، وبيقول لهدير «أنتي فعلا أجمل ما شافت عينه»، وعمرو راضي رد بقلوب، وهي قالتله «إنت أحلى إكس في حياتي»، وحاجة كدة يعني مهلبية خالص ومش فاهمين في ايه.
طبعا الناس اتريقت، وناس افتكرت مشهد ظهور أحمد سعد في مسلسل «موسى» لما كان فرح محمد رمضان وسمية الخشاب، وظهرت صورة ومحمد رمضان شايل سمية وأحمد سعد بيضحك، وطبعا للي ميعرفش، سمية كانت مرات أحمد سعد في الحقيقة قبل كدة، فاللي هو حاجات غريبة شوية.
وناس افتكرت هاني بتاع مسلسل «هذا المساء»، لما زوج نائلة جه من برة لقاها نازلة هي وهاني من فوق، وقالها ايه ده وبيعمل ايه، فهاني قاله كنت بنيم الولاد، ولما الراجل جوزها اتعصب، قالتله في ايه انت اتحننت.. ده هاني!
المهم عمرو راضي طلع عاملنا فخ بقى، أولا لإنه كان خاطب هدير فعلا من فترة، ومنشرش الصور، وكان دخل البيت من بابه.
وبالنسبة لموضوع الفخ ده كانت الحاجة الأهم، إن محمد عصام الجمل طلع الإكس بتاعه هو مش بتاع هدير.
والفكرة إنه كان صاحبه من 15 سنة، وإن هو أنتيمة، وجت هدير خدتهم من بعض، وده إيفيه بينهم يعني، فخلاص يا جماعة ميصحش كدة بقى.
