تزوجت مرة واحدة في حياتها وقالت توبة من بعدها كما لو أنها أصيبت بعقدة من الرجال ووأقسمت بان لا يدخل رجل حياتها مرة أخرى. كلامنا عن الإعلامية رضوى الشربيني التي تزوجت مرة واحدة في حياتها وقيل إنه تزوجت 13 مرة أخرى في السر ولا أحد يعرف عنهم أي شئ.
حياة رضوى الشربيني مليانة حكايات.. وكله كوم وجوازتها الوحيدة كوم تاني ودي اللي اتقال إنها السبب في حملة الهجوم اللي عاملاها على الرجالة في برامجها التلفزيونية عشان جالها عقدة من الرجالة، يا ترى إيه المفاجأة اللي ورا رفض رضوى الشربيني الجواز من تاني؟ وإيه حكاية جوازتها الوحيدة وإزاي شيرين عبدالوهاب كانت السبب في انفصالها؟.. وهل يا ترى.. خليكوا معايا في الفيديو ده هقولكم تفاصيل الحكاية.
قالوا عن رضوى الشربيني كلام كتير والشائعات دايما ملاحقاها وهي معظم الوقت مبتردش، عندها بنتين وكانت عاملة سور حوالين حياتها الشخصية لحد ما في يوم طلعت وقالت أسرار كتير ومقدرتش تخبي أكتر من كده لكن كله كوم وإنها تقول كلمة مش كويسة في حق أبو بناتها كوم تاني وعاملة حساب إن في بينهم عيال ملهمش ذنب حتى لو شافت منه مرار طافح.
واللي هيشوف الفيديو يعرف إنها استحملت كتير في حياتها لحد ما بصت في المراية وكلمت نفسها وخدت قرار نهائي إنها متكملش في العيشة دي حتى لو مش معاها فلوس تصرف على نفسها هي وبناتها.. وعشان كده بتقول إنها شافت كرم ربنا في وقفته جنبها واتحولت مش الفشل للنجاح من واحدة معاها جنيها لواحدة بتلعب بالفلوس لعب.
حكاية الجوازة الوحيدة
ورضوى الشربيني اتجوزت في حياتها مرة واحدة بس وده اللي الناس كلها عارفاه واللي هي بنفسها قالته.. وجوزها اتقال إن اسمه محمود حسن فهمي والمعلومات عنه قليلة جداً وهو رجل وسيم ويبقى أبو بناتها الاتنين تيا وتمارا.. وهي مش بتطلع تتكلم عنه ولما سيرته بتيجي بتتكلم عنه بكل خير وتقول إن بينهم كل احترام وتقدير ومش بتتكلم عنه غير بالخير عشان البنات اللي بينهم.
وكمان هي مش بتحب الإهانة اللي بيتعرض ليها عشان مش هو السبب في هجومها على الرجالة زي ما بيتقال.. وكل الحكاية إن حصل بينهم شوية مشاكل كان صعب معاها يكملوا حياتهم ولازم ينفصلوا.
انفصال رضوى الشربيني
في يوم من الأيام رضوى الشربيني قررت تنفصل خالص عن جوزها قعدت تفكر في القرار ده فترة طويلة.. والغريبة إنه جه بعد 4 شهور من ولادة بنتها التانية تمارا.. وبتقول إنها خدت القرار ده وهي بتاخد شاور في الحمام وكان وقتها في أغنية شغالة اسمها المرايا بتغنيها شيرين عبدالوهاب.
قامت بصت لنفسها في المراية وقالت إنها حست كل كلام الأغنية عليها وعدى قدام عينيها شريط حياتها وكان في أكتر من موقف حصل بينها وبين جوزها خلاها تفكر في قرار الانفصال عشان حاسة إنها مش هينفع تكمل حياتها كده.
خرجت وصلت استخارة وتاني يوم انفصلت وكانت حياتها بعد الانفصال صعبة جداً عشان هي ملهاش لا أب ولا أم واتعرضت لمشاكل مادية كتير وبدأت تبيع في حاجاتها عشان تقدر تصرف على بناتها.. لحد ما ربنا كرمها من وسع وقدرت تقف على رجليها من تاني.
حكاية عقدة الرجالة
اتقال إن رضوى الشربيني جالها عقدة من الرجالة بسبب جوازتها الوحيدة دي وإن جوزها وأبو بناتها هو السبب اللي خلاها تطلع تهاجم الرجالة كده وتقف ضدهم في برنامجها لدرجة إنها اتقال عليها إنها بتشجع على خراب البيوت.. وفي ناس قالت إنها رافضة تتجوز تاني خالص وبقت العقدة هنا أكبر لكن رضوى الشربيني طلعت وقالت إنها معندهاش أي مشكلة إنها تتجوز تاني.
ولما يحصل حاجة زي كده هتعلن ومش هتخبي.. لكن هي مش بتخطط لأي جواز دلوقتي ومش مؤهلة إن يكون في حياتها راجل.
مشكلة في الإنجاب
لما رضوى الشربيني اتجوزت قالت إنها بتتمنى يكون عندها 6 عيال عشان يملوا عليها حياتها بس للأسف طلع عندها مشامل في الخلفة وكانت كل ما تبقى حامل الجنين ميكملش ولما حملت أي بنتها الكبيرة تيا كانت بتتابع مع دكتور شاطر قالها تنامي شهور الحمل كلها ومتعمليش ولا حركة وفضلت في السرير 9 شهور لحد ما كملت على خير.
وبعدها خلفت بنتها التانية تمارا بعد محاولات كتير بردوا.. وفي الغالب ممكن تكون مشكلة الخلفة دي سبب قوي يمنعها من الجواز تاني لو هي لسه عندها حلم الـ6 عيال وعاوزة تحققه.
حياة رضوى الشربيني
ورضوى الشربيني من مواليد يوم 30 سبتمبر سنة 1981 وكانت أمنية حياتها تكون كابتن طيار أو مصممة أزياء معروفة لكن باباها هو اللي صمم إنها تكون مذيعة ودخول كلية الإعلام وفعلاً ده اللي حصل ويمكن إصرار والدها ده هو السبب ورا شهرتها دلوقتي.
اتخرجت البنوتة الصغيرة وقتها وبدأت تتدرب في قناة ART وبعدها راحت تقدم برنامج دراما شو على قناة الحياة وهي أول مذيعة تقدم برنامج عن السيارات اسمه أوتو كار والتلفزيون المصري كان ليه نصيب من برامجها وقدمت عليه برنامج أنا مصر.. بس هي مستمرتش فيه.
اضطرت رضوى الشربيني إنها تسيب الإعلام خالص وتشتغل في مجال البترول وده بسبب زيادة الوزن اللي اتعرضت ليه بسبب جوازها وإنجاب بنتين وكان عندها شعور إن الوزن ده مش مناسب لمذيعة تظهر في برامج في التلفزيون لحد ما قررت تتابع مع دكتور تغذية وتعمل نظام غذائي سليم وكمان تروح الچيم وتمارس الرياضة عشان ترجع لوزنها المثالي وفعلاً حققت المراد وفي 4 شهور بس خسرت 30 كيلو من وزنها.. وبعد كده رجعت لشغلها في الإعلام وانضمت لقناة CBC سفرة سنة 2017 وقدمت برنامجها هي وبس ومنها بدأت حكاية رضوى الشربيني.
تفتكروا رضوى الشربيني ممكن تتجوز تاني فعلاً ولا بقى عندها عقدة من الرجالة ومبتفكرش في الموضوع ده تاني؟ اكتبولنا آرائكم في التعليقات.
