بالرغم من أزمة ساعات التصوير اللي عملها فيلم “هارلي” للفنان محمد رمضان واللي بينافس بيه في السينما الفترة دي إلا إن الأمور مخلصتش على كده وواضح كده إن كل عمل هيجمع بين رمضان ومحمد سامي هيكون فيه حكاية وراه بس المرة دي الحكاية جت في نجم كبير بحجم الفنان محمود حميدة اللي مشارك في الفيلم ده.
طيب إيه اللي حصل في أزمة التتر وياترى إيه علاقة مي عمر مرات محمد سامي بالقصة دي لإنها مشاركة قدام محمد رمضان في الفيلم خاصة إن البعض قال إن اللي حصل ده مجاملة لسامي عشان مراته، كل الحكاية اللي حصلت هنعرفكم عليها في الفيديو ده.
محمود حميدة يفجر الأزمة
بيقولوا إن العقد شريعة المتعاقدين لكن محدش عارف مدى الالتزام بالجملة دي دلوقتي عشان في حسابات تانية بتدخل في المواضيع ومحدش عارف آخرتها إيه، المهم إن محمود حميدة غضبان اليومين دول بسبب اللي حصله في فيلم “هارلي” زي ما كتبت إيمان حميدة بنته ومديرة أعماله لما هاجمت منتج الفيلم عشان طريقة وضع اسم أبوها على التتر بيخالف العقد اللي وقعوا عليه سوا، وده اللي كشفت عنه بالمستندات.
وشاركت إيمان حميدة صورتين من العقد على حسابها في فيسبوك وقالت إن احترام الغير بييجي من احترام النفس لكن اللي حصل في أبوها عدم احترام أو تقدير أو حتى مهنية وعدم احترام الحقوق الأدبية والمعنوية وعدم التزام بالعقود، ووده اللي اكتشفته لما شافت الفيلم لإن ده جزء من شغلها والغريبة إنها متبعتلهاش دعوة خاصة تحضر عرض الفيلم قبل ما ينزل للجمهور زي العادة ما بتقول ده غير إنها طالبت المسؤولين عن الفيلم أكتر من مرة قبل عرضه بـ3 أيام إنها تشوف إزاي اتعمل التتر عشان تتابع تفاصيل شغلها لكن ده محصلش.
واضطرت إيمان تقطع تيكت وتشوف الفيلم في السينما زيها زي الجمهور عشان تكتشف إن اسم محمود حميدة مكتوب بعد اسم الفيلم لأ وبعد اسم أحد أبطال العمل طبعًا تقصد مي عمر وده مخالف للبند الخاص بالتترات وعكس اللي تم الاتفاق عليه في العقد مع الشركة المنتجة واللي تم عن طريق وبعلم المنتج المنفذ محمود الشيخ.
مجاملة محمد سامي
بوست إيمان حميدة دفع الجمهور لاتهام شركة الإنتاج بمجاملة محمد سامي وقال بعضهم إن مش كفاية إن محمود حميدة كنجم تقيل بيشارك محمد رمضان ووافق يكون اسمه قبله عادي ليه بقى يكون اسم مي عمر قبله وده مش عدل وإن اللي حصل لازم يتحقق فيه ويترد اعتبار محمود حميدة، ل ده كمان في ناس قالت إن محمد سامي اتدخل في الموضوع ده بصفته كاتب مشارك في الفيلم عشان يجامل مراته على حساب أستاذ كبير.
حقيقة اللي حصل من الكواليس
الحقيقة بقى واللي عرفناها من مصادرنا إن الموضوع مش مقصود إطلاقًا ومفيش مجاملة ولا غيره ولا محمد سامي اتدخل وغن كل اللي حصل غلطة من فريق الإنتاج والمونتاج بسبب ضيق الوقت فعدت عليهم حتة كتابة اسم محمود حميدة قبل مي عمر وإنهم مفتكروش موضوع العقد والكلام ده، وكان المهم بالنسبة ليهم إن الفيلم يخرج للنور في عيد الفطر (يعني مش كفاية أكتر من 50 ساعة تصوير عشان ينجزوا).
موقف محمود حميدة
والمصادر أكدت بردوا إن الموضوع وصل للفنان محمود حميدة بالشكل ده واتوضحتله الأمور وتقبل المشكلة اللي حصلت وإنها مش مقصودة وتم الاتفاق على تعويضه بالشكل اللي يرضيه.
