كل مرة نفكر فيها نحن حياتنا تشبه فيلم أو مسلسل قصته كيف، فبعض الأعمال الفنية تلمس أشياء فينا لانها تشبهنا أو تعبر عن حالتنا ، وفي رمضان هذا العام نجد العديد من القصص من أرض الواقع، ونحن سنقول لك ي عمل يشبهك.
المسلسلات في رمضان السنة دي اجتماعية من الدرجة الأولى.. كلها بتتكلم وبتناقش تفاصيل وحكايات بنعيشها ونشوفها كل يوم.. خصوصا العلاقات الأسرية والمشاكل بين الأزواج.. سواء في الأول أو على مدار السنين.
لو انت لسه عريس جديد.. وعاوز تعرف أزمات ومشاكل أول كام سنة جواز.. ننصحك متشوفش الهرشة السابعة.. لإنه بيديلك الخلاصة اللي تخليك تلف وترجع تاني.. أزمات الملل والخرس الزوجي.. والحياة اللي بتبوظ مع الأطفال.. والشغل والمستقبل اللي بيضربوا في الخلاط.. بص هيبهدلك.
لو انت بقى مزواج وبتحب الستات الكتير.. وفاكر إنك لما تعمل فيها الحاج متولي.. وتتجوز أربعة وكل واحدة تدلعك على طريقتها.. تبقى غلطان.. تعالى شوف جعفر العمدة متجوز 4 ستات كل واحدة فيهم غير التانية.. بس كل واحدة فيهم عاملة عليه حوار ومشاكل أنقح من اللي قبلها.. اللي بتعمله سحر عشان تخلف منه.. واللي متجوزاه مصلحة.. واللي ملهاش في شغل الستات بس وقعته كده في غفلة.
طب لو انت بتمر بأزمة منتصف العمر!.. مسلسل مذكرات زوج اللي بيقدمه الفنان طارق لطفي معمول مخصوص عشانك.. الراجل فجأة لقى نفسه بيدور في ساقية ومراته مبتقولوش كلمة حلوة.. وكل اللي مطلوب منه فلوس ومصاريف.. وهنا بيقرر يتمرد ع الوضع الحالي.. ومقولكش بقى.. اتفرج واحكم.
فاكرين فيلم عالم عيال عيال.. رشدي أباظة اتجوز سميرة أحمد وكل واحد فيهم مخلف عيال قاااد كده.. أهو القصة دي رجعت تاني بمعايير الوقت الحالي.. في مسلسل كامل العدد.. دينا الشربيني وشريف سلامة هيتجننوا بسبب عيالهم.. بس في نفس الوقت بيقابلوا مواقف لذيذة يمكن تشجعك تجرب تحب وتتجوز تاني بعد الطلاق.
أما بقى لو انت راجل محترم وناجح ورجل أعمال محقق نفسه.. وعايش في أسرة مستقرة وحياتك ماشية كويس.. وفجأة السكرتيرة لعبت في دماغك.. فا أنصحك تتفرج على مسلسل علاقة مشروعة.
الفنان ياسر جلال كان راجل كمل كده وحياته ماشية زي الفل.. وقعته مي عمر في ثواني.. ورغم إنه حريص ميغلطش.. إلا إنه في غفلة من الزمن.. اتجوزها.. وحامل منه.. وهي أصلا كانت مرات صاحبه.. ودلوقتي مش عارف يروح فين ويجي منين
وغيرها وغيرها من المسلسلات اللي بتناقش الميراث والستات اللي متعرفش حاجة عن أجوازها وبتتفاجيء لما يموت إنه ليها ضرة وحياتها تتقلب زي ما حصل مع الأستاذة يسرا في ألف حمد الله ع السلامة.
