شهدت الساعات الأخيرة الماضية، انتشار خبر على مواقع التواصل الاجتماعي بأن ريم طارق، زوجة حسن شاكوش، قد قدمت بلاغاً يتهم زوجها بطردها من المنزل والاستيلاء على منقولات الزوجية وإيصال أمانة لكي تنتهي القصة بعد 55 يوم زواج فقط بعد جدل كبير.
فوجئنا من شوية بخبر انتشر في كل المواقع الإخبارية بيقول إن ربة منزل اسمها ريم طارق راحت قدمت بلاغ في شخص يدعى حسن منصور، وشهرته حسن شاكوش، أيوة هو مغني المهرجانات المعروف، وهي زوجته اللي اتجوزها من فترة قصيرة.
البلاغ زي ما ظهر بالصيغة الرسمية بيقول: «لقيامه بطردها من منزل الزوجية منذ أيام والاستيلاء على المنقولات الزوجية وشبكتها وإيصال أمانة لصالحها بديل مؤخر الصداق».
وفي البلاغ ريم قالت إنها اتأخرت في عمل المحضر كام يوم ربما يوصلوا لحل ولكن لما محصلش، قررت إن هي تاخد الإجراءات القانونية ضده، بعد ما بعتلها رسالة وقالها فيها إنه عايز ينهي العلاقة دي.
قصة العلاقة بين حسن شاكوش وريم كشفها في لقاء قبل كدة، وقال إن هو كان بيحبها من 3 سنين قبل ما يتجوزها، وكان بيشوفها في منطقته في بولاق الدكرور، وهي كانت بتروح وتيجي من هناك تشتري حاجات وكدة، وعارف أهلها، ووقتها اتقمدلها بالفعل، ولكن هي كانت مخطوبة وقتها، فعشان كدة الموضوع منفعش.
ولكن بعد كدة رجع واتقدملها تاني بعد ما انتهت علاقتها الأولى، عشان توافق عليه ويحددوا معاد الفرح فعلا واللي كان 10 مارس اللي فات، واللي أحياه عدد كبير من النجوم والمشاهير، ووقتها خرج حسن شاكوش هاجم كل الناس اللي محضرتش، وقالهم هردهالكم.
المهم إن ريم طارق في الفرح سجدت بفتسان الفرح، وده كان تعبير مفرط منها عن سعادتها بجوازها من حسن شاكوش، واللي بسببه اتهاجمت من رواد مواقع التواصل، لأنها سجدت وفي أجزاء من جسمها مش متغطية، وحاطة ماكياج وكدة، وفي ناس طبعا حسوا إن الأفورة دي بتكون نتيجتها مش حلوة.
وفي لقاء ببرنامج العرافة كان أول خلاف بين شاكوكش وريم، لما قال شيخ العرافين إن حسن شاكوش متجوز عليها، وإن الزوجة التانية دي هي اللي جايباله السلسلة اللي لابسها، ومدياله الكلب اللي راح أهداه بعد كدة لريم زوجته الجديدة.
ريم وقتها اتصدمت على الهوا، وقالت خلاص كدة الموضوع خلص، فحسن فهم إنها تقصد إن الكلام اتقفل يعني في الموضوع، ولكن هي قالت لا موضوعنا إحنا اللي خلص، عشان تخرج بسمة وهبة لفاصل تهدي الجو بين الطرفين، وتتحل المشكلة.
ريم وحسن شاكوش علاقتهم يا دوب استمرت 55 يوم بس، وملحقوش يقضوا فترة طويلة تحصل فيها خلافات، ولكن لسة الساعات الجاية هيكون فيها تفاصيل كتير عن العلاقة دي.
