معظمنا شاهد المشهد السينمائي العظيم بين ريم البارودي وريهام سعيد أمام حمام السباحة، وكل واحدة فيهم تقول للأخرى أنتي صديقتي وحبيبتي ولنك مجنونة، وظهرت بينهم أجواء الصداقة بعد أزمة كبيرة وصلت للمحكمة، فهل تصالحا؟
بعد ما الأزمة بين ريهام سعيد وريم البارودي وصلت للمحاكم.. والمذيعة الشهيرة كانت مصممة تاخد حقها بالقانون.. ظهروا فجأة سوا في حلقة تلفزيونية مليانة بالحقايق والمكاشفات.. وتفسير سبب وصول الأزمة بينهم للمستوى ده
ريهام سعيد اللي كانت طول الوقت بتأكد على إنها مش صديقة ريم البارودي.. وإنها شافتها في حياته يجي 6 مرات بس.. كانت من أوائل الناس الموجودين في عزاء والد الفنانة الشهيرة من فترة ودي كانت بداية الصلح الحقيقي بينهم
ريم البارودي وهي بترمي ريهام سعيد في حمام السباحة.. قالتلها أنا مش صاحبتك وحبيبتك بس أنا أختك.. رغم إن ريهام في لقاء تلفزيوني قبل كده قالت إنها مش صاحبتها قوي ومش مقربين للدرجة دي.. واتفاجئت بإنها بتغلط فيها.. وده اللي عملها صدمة كبيرة.. ورفعت قضية عشان تحافظ على كرامتها
من فترة طلبت ريم البارودي من المحامي بتاعها يحفظ كل القضايا ويسوي المشكلة اللي حاصلة مع ريهام سعيد.. ورغم إن الأخيرة نفت وقتها وقالت إنه محصلش وإن الممثلة صاحبتها مدفعتش الغرامة اللي مفروضة عليها.. سكتوا شوية والموضوع انتهى في صمت
ماهي برده حاجة غريبة لما ريم بتعتبر ريهام سعيد أختها وحبيبتها.. والتانية بتنكر إنهم صحاب أوي يعني.. فا في لحظة غضب غلطت فيها جامد والتسجيل راح للتانية.. قامت رافعة عليها قضية.. واتحكم لها بغرامة 20 ألف جنيه
ورغم أجواء الدباديب والقلوب واللذاذة اللي كانت في لقائهم الأخير.. إلا إن التجربة بتقول إن في أسرع وقت واقرب مشكلة هيقلبوا على بعض تاني.. وده اللي قالته ريهام سعيد قبل ما تترمي في حمام السباحة.. إن ريم مجنونة وعصبية.. ناقص تقولها ملهاش أمان
وفي اللقاء وضحوا هما الاتنين إن في شخص وصل كلام غلط بينهم.. وقال إن ريم طلبت من صحفيين إنهم ميدعموهاش في فترة إيقافها.. واعتبرت ريهام سعيد إنها كده بتتخلى عنها وإنها ماتت بالنسبة لها
بس ريم بتحلف إن الكلام ده محصلش.. وياريت الشخص ده يواجهها.. بس الأكيد الأكيد يعني.. إن الأزمة بينهم مش سببها زينة.. أللي بتدافع عنها ريم دايما في كل اللقاءات في حين إن ريهام سعيد مش رحماها
المهم إنهم اتصالحوا.. والأزمات القديمة خلصت وراحت لحالها.. وربنا يستر وميقلبوش على بعض تاني.
