منافسة كبيرة حاصلة بين مسلسلات رمضان ولكن بعد مرور الربع الأول من الشهر بقى، فكل واحد قرر هو عايز ايه وهيتفرج على ايه، وفي أعمال كتيرة اتقدمت، وفي أعمال لقيت لنفسها وجود وجمهور خاص بدون كلام كتير ودوشة، وفي أعمال تصدرت الدوشة دي، ومن بينهم بقى مسلسل «الأجهر» اللي بيلعب بطولته الفنان عمرو سعد..
الأعمال الدرامية اللي بتتنافس في رمضان كتيرة أوي، وعشان كدة عملية الفرز حصلت خلاص، وكل واحد بقى محدد الأعمال اللي بيحب يتابعها، وخلال الكام موسم الأخرانيين، ظهر النجم عمرو سعد كواحد من أهم نجوم الموسم ده، فبقينا نلاقي الناس على القهوة قاعدين مشغلين مسلسله بيتفرجوا، وعلى السوشيال ميديا بيتابعوه.
الفنان عمرو سعد بقاله كام سنة واخد نفس الخط الجماهيري، واللي بيعتمد على ابن البلد الرجولة اللي محدش بيقدر عليه، وكمان بيعرف يتكلم ولسانه زي الكرباج، وبيقول كلام كله مترتب وجمل كلها في الجون.
المهم يعني إن عمرو سعد بمسلسل الأجهر قدر إن هو يجمع قاعدة عريضة من الجمهور، ولكن مش بس في مصر، ولكن كمان في السودان.. وده لأنه واحد من أبطال العمل هو ممثل سوداني الجنسية، وده خلى عيون السودانيين على العمل عشان يوشوفوا ابنهم وهي بيمثل «كتف بكتف» مع الفنان عمرو سعد، هنا في مصر أم الدنيا والفنون.
الفنان السوداني اللي مع عمرو سعد هو اسمه قصي الأمين، درس في جامعة النيلين، وعايش في مصر وتحديدا في إسكندرية، مهتم بالتمثيل من بدري، وكمان بيعمل فيديوهات مواقف على تيك توك، وبيقلد كمان فيها نجوم مصريين ومشاهد بتاعة الممثلين المصريين الكوميدية.
قصي الأمين اللي بيعب دور «ويشي» في مسلسل الأجهر، هو من أبناء ولاية كسلا في السودان، وليه جذور نوبية.. وقدر إن هو خلال مشاركته في المسلسل إنه يلفت الانظار وإعجاب الجمهور المصري والسوداني، خصوصا لطريقته في الكلام والتعبير المميزة، وإنه بيتقن اللهجة المصرية، ومناسب جدا للدور.
قصي الأمين في دور ويشي المفروض إنه متربي مع الفنان عمرو سعد اللي بيلعب دور مصطفى الأجهر في ورشة سعداوي من وهما صغيرين، من ساعة ما مصطفى الأجهر هرب من السجن، وخدوه ربوه هناك.
الفنان قصي الأمين في بداية مسيرته الفنية وبيحلم بالدعم وإنه يحقق النجاح، وعلى السوشيال ميديا الشباب بيعتبروه مثال للمجتهد اللي بيتعب وبيفتح باب الأمل لغيره من أبناء السودان عشان يقدروا إنهم يحققوا النجاح عن طريق بوابة مصر.
واتعرض مسلسل الأجهر لانتقادات كبيرة بسبب استخدام لغة حادة وألفاظ اعتبرها البعض خارجة ولا تصلح إن هي تكون موجودة على الشاشة، وخصوصا إن إحنا في شهر رمضان الكريم، وكان ويشي اللي بيلعب دوره قصي الأمن، واحد من أبطال المشاهد دي.
وظهر في مشهد وهو بيرد على واحد بيتنمر منه وبيقوله «طبعا انت لقيت أهلك في الأدغال»، فرد عليه ويشي وقالة «لا يا خفيف لقيت أمك هناك»، وده كان في الحلقة التانية من المسلسل واللي اتسبب في موجة هجوم على صناع العمل ده.
مسلسل الأجهر بشكل عام عامل نجاح كويس.. ومن بين الأعمال اللي بتجذب الجماهير بشكل كبير، خصوصا إنه في مشاهد أكشن وحركة وأحداثه حماسية معظم الوقت.
