الساحر محمود عبدالعزيز لا هو واحد من أبرز أسماء السينما والدراما المصرية، وله بصمة كبيرة على أغلب الأعمال التي قدمت في الفن المصري وأهمها على الإطلاق، حياته كان فيها تحولات كتير وبدأها كجان، ولكن انتقل بعد ذلك لمرحلة الكوميديا، ومنها أصبح واحد من النجوم الذين قدروا يقدموا كل حاجة، وكل مرحلة في حياته كان بيتم اكتشاف إمكانيات جديدة جواه.
الفنان محمود عبدالعزيز، الولد الإسكندراني الجان، اللي كان نفسه يكون ممثل ولكن والده كان رافض، فدخل كلية الزراعة، ورغم كدة دخل مسرح الكلية، ومنه ابتدى يدخل المجال الفني في أعمال صغيرة عشان يكون عندنا النجم اللي اتلقب بالساحر وأبو كرتونة، ورأفت الهجان، وحاجات كتير.
محمود عبد العزيز من النجوم اللي تميزوا بموهبتهم الكبيرة، وهو من النجوم القلائل اللي يتعدوا على صوابع الإيد الواحدة، اللي فضلوا يقدموا أدوار بطولة، ومش بس كدة بتتبني أعمل فنية عليهم، رغم تقدمهم في العمر، ودي حاجة يمكن مش معروفة عندنا في مصر، وإن كانت موجودة في أوروبا.
الساحر محمود عبدالعزيز ابتدى مسيرته من خلال أدوار صغيرة من أول فيلم كلاب حراسة، وفضل يكبر ويتدرج وينجح في المجال الفني، وصولا لنقلة تاني في مسيرته الفنية، وهي اللي كانت من خلال فيلم العار، واللي كان ميلاد لشخصية جديدة لمحمود عبدالعزيز الكوميديان.
قبل العار كان محمود عبدالعزيز بيلعب أدوار الجان، والدراما، ومكنش في مساحة للكوميديا واكتشاف جوانب جديدة منه، ولكن مع علي عبدالخالق في فيلم العار لما لعب دور الدكتور عادل، كانت دي البذرة للشكل الجديد لمحمود عبدالعزيز، اللي شوفناه بعد كدة في الكيف والشقة من حق الزوجة وجري الوحوش وأعمال تاني كتير.
على الجانب الإنساني، الفنان محمود عبدالعزيز اتجوز سنة 1978 من السيدة جيلان زويد، ودي السيدة اللي أنجب منها أولاده الاتنين كريم ومحمد، واللي بقوا حاليا من أهم نجوم الفن على الساحة، وبيكملوا مسيرة والدهم وكل واحد منهم عامل كارير خاص، إلى جانب كمان شركة الإنتاج اللي بيملكها محمد محمود عبدالعزيز.
العلاقة بين جيجي زويد والفنان الراحل محمود عبدالعزيز استمرت لمدة 20 سنة، ولكن الانفصال حصل فجأة ويمكن محدش عارف سببه ايه، ولكن محمود عبدالعزيز كشف إن الخلافات بينهم زادت في الفترة الأخيرة قبل الانفصال ووصلت لحيطة سد، وكمان في مرة من المرات ظهر في لقاء كريم محمود عبدالعزيز، واتكلم عن موقف جمعه بوالده الراحل.
كريم كان بيتكلم إن موضوع انفصال الأب والأم ده كان بالنسباله مشكلة من وهو صغير وإنه في مرة في المدرسة حصل موقف مع طالب في الفصل مدرسته طلبت منه إن الأب والأم يحضروا وهما كانوا منفصلين فده سبب ألم نفسي للولد، وبعدها بفترة حصل إن والده ووالدته هما كمان انفصلوا، وده سببله أزمة نفسية.
بيقول إحنا كنا أسرة بنسافر ونحب بعض ونضحك مع بعض، وفجأة بقى في بيتين وكل واحد عايش في مكان بعيد عن التاني، طيب هقد هنا ولا هنا، هقعد مع مين فيهم.
حصل في نهاية العلاقة إن جيجي زويد رفعت قضايا نفقة وحاجات من دي على محمود عبدالعزيز، والموضوع أزعجه ولكنه حل الأزمة وتم تسويتها بالاتفاق، وفضلت علاقة الأولاد ممتازة بالأب والأم، وخلال الساعات اللي فاتت نشر محمد محمود عبدالعزيز صورة بتجمعه بوالدته وأخوه، خلال احتفالهم بعيد ميلادها.
اللي كان مفاجئ في انفصال جيجي زويد ومحمود عبدالعزيز، هو زواجه بعد فترة قصيرة من الإعلامية بوسي شلبي، والبعض اعتقد إن بوسي كانت السبب وإنه خرابة بيوت، خصوصا إنها هي والزوجة الأولى كانوا أصدقاء، ولكن المقربين بينهم قالوا إن الكلام ده مش حقيقي، وكمان محمود عبدالعزيز قال إنه كان واخد قرار الانفصال من قبل ما يتجوز بوسي شلبي.
