هذا العام مسلسلات رمضان فيها أشكال والوان من القصص والأبطال، لكن مسلسل سره الباتع يستحق جلسة منفردة، لو تحدثنا عن كل فنان في المسلسل لن ننتهي ولكن أبرز ما لفت نظر الجمهور هو الفنانة التونسية رانيا التومي فمن هي؟
بملابس جريئة وإطلالات شكلها ميدلش على المرحلة اللي بيتكلم عنها المسلسل خالص.. بدأت التونسية رانيا التومي تظهر في أحداث “سره الباتع”.. بتتكلم فرنساوي لبلب.. وعلى رأي الجمهور على السوشيال ميديا.. غلبت رانيا يوسف اللي غايبة عننا السنة دي.
رانيا التومي اللي بتقدم شخصية فرنسية وعايشة في مصر.. ودي أول تجربة ليها هنا بعد ما اتشهرت في بلدها تونس بإنها مذيعة النشرة الجوية الجميلة.. والموديل المشهورة برضه.
رانيا التومي عندها 33 سنة.. اختاروها قبل كده ملكة جمال الطقس فى تونس.. لإنها واحدة من اجمل المذيعات في تونس والعالم العربي.. وبتقدم نشرة الأرصاد الجوية وهي لابسة ومتشيكة وفي قمة تألقها.
ظهرت مع المخرج خالد يوسف لأول مرة في مصر على سجادة حفل افتتاح مهرجان القاهرة السينمائي في نوفمبر اللي فات.. وكانت دي بداية انطلاقتها الحقيقية وإن الجمهور يعرفها قبل ما تظهر في المسلسل.
وبعدها بكام يوم اتجوزت خطيبها.. والسوشيال ميديا كلها كانت بتتابعها وبتتفرج على شهر العسل.. والحياة الرومانسية الجميلة اللي هي عيشاها.. قبل ما تطل عليهم في رمضان بالشكل اللي الناس كلها اتفاجئت بيه ده
الناس كانت فاكرة إن ظهور رانيا التومي في مسلسل مع خالد يوسف.. هيعتمد على موهبة وحاجات تانية كتير غير الشكل والإثارة.. بس اللي حصل هو المعتاد.. المخرج المعروف بيختار بنات حلوة تطلع معاه في أعماله تشد انتباه المشاهدين.. وحصل.
وبما إن المسلسل بيتكلم عن مصر في زمن الحملة الفرنسية.. وفي ناس كتير من الفنانين بيقدموا شخصيات من الزمن ده زي الفنان حسين فهمي وايمن الشيوي.. الجمهور أطلق على رانيا التومي اسم فرجينيا سره الباتع.
على غرار فرجينيا جميلة الجميلات.. اللي قدمتها الفنانة ليلى فوزي في فيلم الناصر صلاح الدين.. لفتت رانيا التومي الأنظار بجمالها وملامحها الغربية.. وفي وسط كل ده مش بتشغل بالها بتعليقات الجمهور السلبية أو الانتقادات.
وهي شايفة إنها بتعيش حياتها وبتحقق طموحاتها من غير ما تبص وراها.. ودايما عندها أمل في المستقبل.. ومش بيهمها الناس اللي مركزة مع عيوبها.. هي كده كده بتحب نفسها وعارفة إنها حلوة.. وليها طموح وإن شاء الله هتحققه على يد سره الباتع أو على إيد المخرج خالد يوسف اللي دايما بتشهد له في كل مكان وبتقول عليه متربي وابن ناس.. واكتشفها من أول وجديد.
