رغم حب الجمهور الذي هو أساس شهرتهم وما هم فيه ، إلا ان بعضهم يتصرفوا بطريقة خاطئة احيانا مع معجبيهم وهذا يعرضمه لانتقادات كثيرة بالتأكيد، وهذا بالضبط مع حدث مع عمرو دياب في فرح إبنة حميد الشاعري.
امبارح كان حفل زفاف عبير بنت حميد الشاعري في فندق فخم بالقاهرة ، وطبعا عمرو دياب جه حضر وغنى في الفرح وعمل اجواء جامدة جدا
وبعد ما خلص، خرج عمرو دياب بسرعة جدا وحاول يهرب من الناس والمعجبين عشان ميقفش يتصور بقى والكلام ده ، فكان مستعجل وعايز يطلع باقصى سرعة.
ولأن هو الهضبة وكلنا بنحبه ونفسنا نتصور معاه ، حاول واحد من معجبينه انه يقرب منه عشان ياخد صورة مع الهضبة يفرح بيها ، إلا ان عمرو دياب اتصرف بطريقة وحشة معاه وزقه بايده وبعده عنه وكمل مشي بسرعة وسابهم وخرج
طبعا المشهد ده اتصور و بقى تريند السوشيال ميديا، وكل الناس بتهاجم عمرو دياب بسبب تصرفه ده مع واحد من معجبيه ، وشافوه تنك ومغرور ومكنش في داعي يزقه بالشكل ده وكان ممكن يخرج من الموقف بشكل ألطف من كدا
الغريبة ان دي مش اول مرة عمرو دياب يعمل كدا مع جمهوره ، وعملها حوالي مرتين تلاتة قبل كدا ، كان منهم حفلة في الساحل الصيف اللي فات ، و 3 شباب من اللي كانوا قاعدين في عمالين يطلبوا منه يغني اغنية “قال فاكرينك”، لكن عمرو دياب رد عليهم بسخافة وقال : والله ما هقولها. …إنت لو قعدت 100 سنة تطلبها والله ما هقولها”…
واحد من الشباب التلاتة دول اتكلم عن الموضوع ده على فيسبوك ، ونشر بوست مخصوص عشان يحكي اللي حصل بالظبط وقال : اللي حصل ان انا واتنين صحابي قعدنا نقول قال فاكرينك، فقالي يا عم مش هغنيها، انا لو عايز كنت نزلتها في الألبوم، انت مش هتمشيني علي مزاجك، لو مش عجبك متسمعنيش. فضحكت و قولت اسف، راح ضحكلي وقالي: ايوة كدة”.
وفي حفلة تانية برضه احرج عمرو دياب واحد من معجبينه وقاله : إنت هتمشيني على مزاجك؟ مش عاجبك ما تسمعنيش”.
وفي حفلة خاصة من حوالي 6 سنين ، كان بيغني عمرو دياب ، وطلع واحد من الحضور وقرب منه عشان يصوره فيديو على تليفونه ، لكن الحركة دي استفزت الهضبة وخلته فقد اعصابه و زقه بعيد عشان ميصوروش.
ونفس الموقف اتكرر في حفلة قديمة وكان في واحد عايز يصوره برضه بتليفونه الا ان عمرو اضايق وشد منه التليفون وبعده عنه .
يمكن تكون دي حاجات غير مقصودة من عمرو دياب خاصة ان هو ليه كاريزما حلوة على المسرح وبيتفاعل مع الجمهور وبيهزر معاهم ، ومرة طلب من واحد من اللي قاعدين انه يطفي السجارة ، والموقف ده عجب الجمهور واعتبروها حركة حلوة وانه بيشجعهم على عدم التدخين باعتباره نجم و قدوة.
ومع ذلك عمرو دياب في حفلة من قريب عمل لقطة حلوة اوي مع واحد من الجمهور ، لكن المرادي العكس بقى كان لطيف وظريف ،، وحاول واحد من المعجبين يطلع على المسرح عشان يتصور مع الهضبة ، فجري عليه البودي جارد عشان يبعدوه عنه ، لكن عمرو اضايق وفضل يضرب الحارس بتاعه بهزار ، عشان يسيبه يطلع ويتصور عادي.
وفعلا وقف عمرو دياب واتصور مع الشاب والناس قعدت تصفر وتسقفله ، وكانت حركة لطيفة من الهضبة اللي بيقولوا عليه مغرور ومبيعرفش يتعامل مع جمهوره.
المشاهد دي كلها فكرتنا بموقف عمله الفنان محمود العسيلي على المسرح في حفلة من حفلاته ، لما حاول واحد من الجمهور يتصور معاه لكنه احرجه جدا وقاله جملة قلبت الدنيا.
قال محمود العسيلي : معاك واسطة او حاجة او جامد جدا يعني ؟ ، فتقريبا المعجب رد عليه وقاله انه بيحبه وعايز يتصور معاه عادي.
لكن محمود العسيلي كمل في احراج الراجل وقاله : “إنت بتحبني وكل الناس دي بتكرهني مثلا؟”يعني لو اتصورت مع حضرتك مش لازم أتصور مع كل الناس دي صح ولا أنا غلطان “.
