رغم إن الوسط الفني مليان بصداقات قوية جدًا بين النجوم لكن الغيرة كانت سبب في إنهيار كتير من قصص الصداقة دي، وأكبر مثال على هذا الخلاف بين النجمين الكبار عادل إمام والراحل محمود عبد العزيز.
عادل إمام ومحمود عبد العزيز
عادل إمام ومحمود عبد العزيز من النجوم اللي كانوا بينهم صداقة عمر وده كان قبل ميتشهروا أو يدخلوا مجال التمثيل أصلا، وكانو زمايل من أيام الدراسة في كلية الزراعة، وفي بداية مشوارهم الفني مثلوا مع بعض فيلمين «شباب يرقص فوق النار» «عيب يا لولو يا لولو عيب».
بس علاقة الصداقة دي بدأت في الانهيار بعد معمل محمود عبد العزيز مسلسل رأفت الهجان، واللي في الأساس كان معروض على عادل إمام بس هو رفضه، وأما نجح المسلسل وكسر الدنيا، الغيرة دخلت بينهم واتسببت في فتور كبير في علاقتهم استمر لسنين طويلة.
وفي سنة 2008، كانت القشة اللي قصمت ضهر البعير أما محمود عبد العزيز رفض يعمل دور البطولة قدام عادل إمام في فيلم حسن ومرقص وعمل الدور مكانه الفنان العالمي عمر الشريف، عشان تنتهي صداقة العمر بين الساحر والزعيم للأبد.
سميرة عبد العزيز ومحمد رمضان
محمد رمضان من النجوم الشابة اللي فرضت نفسها على الساحة في العشر سنين الأخيرة، وحقق نجاح كبير خلاه دايما متربع على عرش الإيرادات، وده بيخلي أغلب النجوم حابة تشاركه أعماله عشان متشافة وبتحقق مكاسب كبيرة، بس الفنانة القديرة سميرة عبد العزيز كان ليها رأي تاني إما اتعرض عليها تعمل دور ام محمد رمضان في مسلسل، ورفضت التمثيل معاه، وقالت مينفعش يكون اسمي «أم العظماء» واعمل دور أم بلطجي شايل سلاح.
تصريحات الفنانة سميرة عبد العزيز عملت ضجة كبيرة أوي، خصوصا إنها قالت كمان إن رمضان تطاول عليها وقال إن هو بياخد 20 مليون وهي شحاته بتاخد 20 ألف، وده اللي خلى النجم محمد رمضان يسجل مقطع فيديو ينفي فيه التصريحات دي تماما.
غادة عبد الرازق ورنيا يوسف
غادة عبد الرازق ورانيا يوسف، تقريبا الجمهور عرفهم في نفس التوقيت ساعة ماشتركوا في مسلسل عائلة الحاج متولي اللي اتعرض سنة 2001، ومن ساعة المسلسل النجمتين فضلوا صحاب بعيدا عن المجال لحد ما في سنة 2012 اشتركوا مع بعض في فيلم ريكلام واللي كان سبب إن علاقتهم ببعض تتقطع خالص، بعد ما رانيا اتهمت غادة بانها كانت سبب في ان مشاهد ليها كتير تتشال من الفيلم، وقالت كمان إنها مش هتمثل تاني مع غادة.
منى زكي ومصطفى شعبان
الفنانة منى زكي كانت من النجوم المشاركة في بطولة فيلم مافيا، اللي يعتبر البداية الفعلية للنجم مصطفى شعبان في السينما، واتشاركوا مع بعض بعدها في بطولة فيلم أحلام عمرنا اللي منى زكي عملت بسببه مشكلة كبيرة وبتتعامل كأنه مجاش في مشوارها الفني أصلا، وده بعد الخلافات الكبيرة اللي كانت وقت التصوير بينها وبين مصطفى شعبان وكمان المخرج عثمان أبو لبن، وده خلاها متكملش دوبلاج الفيلم واستعان المخرج ساعتها بفنانة شابة تعمل صوت منى زكي.
وبعد سنين من الفيلم اتسألت منى زكي في برنامج تلفزيوني عن التمثيل مرة ثانية مع الفنان مصطفى شعبان، وتكون إجابتها لأ بدون تفكير.
