ليس من قلة المصريات ؟ فما الذي يجعل رجل مصري يتزوج أجنبية، بعد أن قام العديد من الفنانيين بهذه الخطوة وتزوجوا من أجنبيات فما السبب ومن هم أشهر هؤلاء الفنانيين ، هذا ما نتعرف عليه من خلال التالي:
مش بيقولك أى حد عينه خضرا مبيجيش من وراه خير ؟الحقيقة ولا سوده كمان مش هرغى كتير ما تيجوا نعرف مين النجوم دول اللى أتخلوا عن ملامح الستات المصريات وفضلوا الملامح الأجنبية؟
لا اللى يغيظك أكترإن فى منهم فشل فى الجواز من مصريات ،لا وكمان فشل فى الجواز من أجنبيات اللى هو طيب العيب فى مين يازمن ولا الغلط فى مين؟لا دى قسمة ونصيب امال إنت فاكر إيه؟
نبدأ بحكيم فى حوار له سابق مع الإعلامى عمرو أديب قال إنه إتجوز مرتين الأولى مصرية وام أبناءه والتانية بقى هى اللى أجنبية ،ربع يونانى وربع مصرى ونص فنزويلى ومكنتش بتتكلم عربى خالص،لكن دلوقتى وبعد 14 سنة جواز هى الوحيدة اللى بتتكلم معاه صعيدى فى البيت،وقولوا إنه خان مراته المصرية ولما عرفت بجوازته دى إنفصلت عنه.
أما أحمد فلوكس خرج أه عن بنات بلده بس متجوزش أجانب أوى لكن هى كانت نص مغربي ونص أسبانى ،وكانت شغالة عارضة أزياء وأنجب منها إبنه الوحيد والكلام دة كان سنة 2008. ،سنة واحدة وأنفصل عنها فى 2009 بحجة القسمة والنصيب طيب ماشى.
على سيرة المغربيات بقى تعرف إن أحمد رزق متجوز من مغربية من خارج الوسط وإسمها أحلام محسن وعنده 3 أولاد منها ،وده طبعا بعد خطوبته من حنان مطاوع فى .2006
مش ممكن نجيب سيرة المغربيات وننسى بسمة بوسيل مرات تامر حسنى ،اللى الفترة اللى فات كان فى شائعات كتير عن خبر إنفصالهم والخلافات بينهم الكتير أكيد سمعتوا عنها ولا إيه؟ ربنا يسترها عليهم بقى.
الفنان عمرو واكد أهو عينه خضرا وجه من وراه خير عادى ،الراجل إتجوز مرتين الأولى كانت فرنسية لمده 4 سنين والتانية مصرية ملكة جمال مصر سارة شاهين ولحد كلامنا ده متجوزين لسه.
كان بيسأل فى أغنيته بيقول عارف إيه اللى يتعبنى ويأثر فيا؟ إحنا أخيرا عرفنا بعد سنين يا نجم ،ساموزين بدأ حياته بالجواز من واحدة بريطانية وأكبر منه ب6 سنين وهى أم بنته الوحيدة ،تفتكروا كان بيحبها ولا متجوزها علشان الشهرة والنجومية؟
ساموزين من فترة إنتشرت شائعات عن إرتباطته للمرة التالتة ولكنه نفى ده، أصله بعد إنفصاله عن كريستينا البريطانية إتجوز المذيعة المصرية دينا صالح اللى خلف منها إبنه الوحيد محمد.
على سيرة البريطانيات بقى والعيون الخضرا للفنانين لو قعدنا نوصف فى كاريزما مصطفى فهمى هنحتاج حلقات ماإنتو عارفين.
مصطفى فهمى كانت الزوجة الأولى هو خدها من قصيرها وإتجوز إيطالية مجربش المصرية وفشل لا ،ده جرب الإيطالية وفشل بردوا بعد جواز 26 سنة متخيلين ولادهم دلوقتى ما شاء الله فى التلاتينات،ولكن مش عايشين فى مصر.
خدوا دى بقى الوحيد اللى إتكلم عن جوازه ده وقال مفيش فرق بين ست مصرية وست اجنبية،أمال إتجوزت الأجنبية ليه؟ ها
الحقيقة رد وقال اختياري لزوجة أجنبية في بداية حياتي لا يتعلق بكونها أجنبية، إنما بتقارب المستوى الفكري والاجتماعي، وهو ما اعتبره أمرا مهما جدا.
عينى فى عينك كده يا فنان ،بذمتك تقارب فكرى وإجتماعى ؟ إستنى ماهو قالك إنها الست لو عايزة تسعد الراجل هتسعده مش عايزة كله بمزاجها التكوين واحد الست ست فى كل حتة ،الإختلاف بسيط جدا.
أما اللى حقق الرقم القياسى فى الجواز من أجنبيات ،كان الفنان إيهاب نافع،وبعد إنفصاله عن ماجدة إتجوز سيدة إسترالية ،وبعدها ألمانية و خليجية وأمريكية وأردنية اللى إتجوزها علشان كلام الناس وميقولوش مصاحبها ،لكن إنفصل عنها بعد كده لإنها كوشت على فلوسه.
عندك بقى جميل راتب إتجوز من فرنسية،وسمير صبرى من أمريكية ،وأحمد رمزى من سيدة يونانية كانت بتشتغل محامية وإستمر جوازه بها لحد ما رحل 2012.
مش لازم تبقى عينه خضرا وشعره أصفر ووسيم يعنى.تصدق إن الشاويش عطية الفنان رياض القصبجى إتجوز 4 مرات بشكل رسمى منهم واحدة إيطالية؟ أه والله وأنجب منها إبنه الوحيد فتحى ،وإتجوز 5 مرات كده وكده.
كمان يوسف فخر الدين جرب حظه مع اليونانيات، وده بعد رحيل زوجته نادية سيف النصر ساب الفن وحالته النفسية ساءت كمان ،سافر اليونان وإشتغل فى فندق وهناك قابل سيدة يونانية وإتجوزها.
أما بقى سي السيد يحيى شاهين أتجوز من سيدة مجرية كانت مطلقة ومعاها طفلين وإنفصل عنها بعد 6 سنين وإتجوز بعدها من مشيرة عبد المنعم.
إتعرف بادوار الشر لكنه فى الحقيقة غير كده ،وعلى عكس فنانين كتير أكتقى بزوجه واحدة بس وكانت أرمنية ،هو الفنان صلاح نظمى اللى خلاها أسلمت وغيرت إسمها ل رقية نظمى ،وإستمر زواجهم 40 سنة لحد مار حلت بعد صراع طويل مع المرض وهو بعدها بسنتين.
شاركونا برأيكوا فى التعليقات هل شايفين إنه عادى إيه المشكلة الراجل يتجوز أجنبية وهل بيكون علشان بيحبها فعلا ولا لتحقيق اهداف من ورا جوازته دة؟ وهل كنتوا تعرفوا الأسرار دى ولا أول مرة تسمعوا عنها؟
