بعد الازمة التي حدثت بين نزار الفارس وحورية فرغلي واشاعة خطوبتهم منذ أيام ، والتي خرجت الفنانة ونفتها ، ذاعت قناة دجلة لقاء الاعلامي العراقي مع حورية وكشفت فيها تفاصيل كتثر جدا عن حياتها.
حورية فرغلي قلبت الدنيا لما نزار الفارس نشر فيديو ليه معاها وقال انهم اتخطبوا وريهام سعيد ذاعت الخبر والفيديو ، لكن الحقيقة ان ده كان هزار ضمن الحلقة واتفاجئت حورية باللي عمله المذيع وانه استغلها عشان يعمل تريند زي ده وقالت انه كداب وهي مكنتش تعف انه هيعمل كدا وكانت مستنية الحلقة تتعرض عشان الجمهور يتفرج عليها ويعرف الحقيقة.
الحلقة اتصورت في بيت حورية فرغلي في الزمالك ، واكتشفنا في الحلقة انها عايشة في شقة الموسيقار الراحل محمد عبد الوهاب ، وابنه هو اللي باعلها الشقة بعد ثورة يناير ومن سعتها وهي عايشة فيها.
نزار الفارس الاعلامي العراقي اللي بيعشق التريند وبيجيب الضيوف يسألهم اسئلة محرجة عشان الحلقة تفرقع ، عمل نفس الكلام مع حورية فرغلي ، وفي بداية الحلقة طلب منها انه يقوم بدوره كمذيع ويسلها اسئلة محرجة ، وقالها تسمحيلي احرجك ؟ وهي وافقت تجاوب على اسئلته.
محدش يقدر ينسى اول دور عملته حورية فرغلي في حياتها ، في فيلم كلمني شكرا ، وكان دور جرئ شويتين خاصة وان الجمهور اول مرة يشوفها ، واتعرضت لهجوم وانتقاد كبير بسبب الجرأة دي وسببلها مشاكل مع خطيبها وندمت على الدور
نزار بقى يسكت ؟ لا طبعا لازم يستغل الموقف ، وسألها سؤال صعب ، قالها انتي اغريتي جيل كامل في فيلم كلمني شكرا وربنا عاقبك باللي حصلك بعد كده عشان متكمليش في الادوار دي .
كان سؤال صادم لحورية واتوترت ومكنتش عارفة تقول ايه وفضل يعيد عليها نفس الجملة كتير ان ده عقابك من ربنا على مشاهدك الجريئة ، وهي مش عارفة ترد.
بس حورية قالت انها بعد الحادثة اللي حصلتلها ووقعت من على الحصان ومناخيرها اتكسرت ، راحت عملت حج 7 مرات وقربت من ربنا اكتر ، لكن نزار علق تعليق مش في محله وقالها انتي مفتكرتيش تعملي حج وعمرة الا لما ربنا ابتلاكي.
وحكت حورية فرغلي حكاية غريبة عن الجن ، وقالت انها بعد ماعملت مسلسل ساحرة الجنوب اتلعنت ، وحياتها اتغيرت ، وانها بقت تشوف حاجات غريبة في شقتها بس حاولت متركزش معاها وبقت تشوف ولد وبنت صغيرين في الشقة كل فترة.
، وكل ما واحدة تيجي تشتغل عندها في البيت متكلمش وتمشي ،، مش بس كدا ، ده في واحدة متعرفهاش بتقرا التاروت والكلام ده قالتلها انك عندك حاجات في البيت مش طبيعية ، يعني جن او حاجة ومن هنا اتاكدت حورية فعلا ان في حاجة غلط لكن من كتر حبها للشقة اللي عاشت فيها 13 سنة مش راضية تسيبها وتمشي.
حورية شخصيتها اتغيرت تماما عن اول ماظهرت ، وبقت تبص للحياة بمنظور مختلف بعد المعاناة اللي عاشتها السنين الي فاتت ، وقالت : مكنتش حاسة ان الموت قريب للانسان كدا ، وبعد اللي حصلي اكتشفت ان الموت قريب اوي ، ونفسي اكون حورية من حوريات الجنة وربنا يبقى راضي عني ويسامحني على كل حاجة غلط عملتها.
حورية فتحت قلبها وقالت انها زي اي انسان يغلط بس معملتش حاجة من الكبائر عشان ربنا يغضب عليها ، وقالت انها ممكن تكون عملت حاجات غلط وحرام بس مكنتش تعرف، زي انها اكلت حلم خنزير بس البياع ضحك عليها ومقالهاش الحقيقة بس فضلت استغفر ربنا ومكنتش اعرف واخويا اللي قالي.
اما عن الوسط الفني ، فحورية اشتغلت مرتين مع محمد رمضان زمان في بدايتها وعملت معاه عبده موتة وقلب الاسد ، وقالت ان علاقتها بيه كويسة وعلى طول بيسأل عليها وهي تعبانة ولسة كان بيكلمها من اسبوعين ومقطعش علاقته بيها رغم انهم ممثلوش مع بعض من سنين.
كمان قالت انها كانت عندها صحاب كتير حواليها لكن بعد اللي حصلها بعدوا عنها عشان مبقاش ليهم مصلحة خلاص معاها وكانوا بيمثلوا عليها الحب والصحوبية ، واتصدمت فيهم لما كلهم اختفوا من حوليها.
واضح ان حورية فرغلي مرت بايام صعبة محدش يتحملها لكنها لسة عندها امل في الحياة وكلنا مستنين نشوفها على الشاشة تاني.
